Iha Janeiru 2023 mak hamutuk tinan 50 husi tempu neʼebé Testemuña ba Jeová komesa uza sukursál iha Normandy, Fransa. Iha loron 9 Juñu 1973, irmaun sira halaʼo dedikasaun ba sukursál, neʼe mak fulan neen liutiha husi tempu neʼebé sira komesa uza sukursál neʼe.

Antes harii sukursál iha Normandy, Betel Fransa halaʼo serbisu iha sidade Boulogne-Billancourt, besik París. Maibé, ikusmai irmaun sira haree katak fatin neʼe kiʼik demais se kompara ho númeru ba haklaken-naʼin neʼebé aumenta ba beibeik iha rai neʼe. No mós, publikasaun sira print no haruka husi Estadus Unidus Amérika ba Fransa liuhusi portu iha sidade Le Havre nia parte oeste, neʼebé dook maizumenus kilómetru 200 husi sukursál. Atu bele hamenus tempu, viajen, no gastu sira, entaun irmaun sira komesa buka rai entre sidade rua neʼe atu bele harii tan fatin sira ba Betel.

Ikusmai irmaun sira hetan no sosa rai iha sidade kiʼik Louviers iha Normandy, neʼe dook husi París no Le Havre maizumenus kilómetru 100. Konstrusaun komesa iha tinan 1972 no laʼo ba fulan ualu.

Iha tinan sira tuirmai, númeru ba haklaken-naʼin aumenta sai barak. Ho mudansa neʼe, neʼe katak presiza haluan liután sukursál iha Normandy. Tan neʼe, sukursál sosa rai pedasuk ida neʼebé besik no irmaun sira harii hela-fatin ba ema Betel, no iha tinan 1996, família Betel neʼebé sei hela iha Boulogne-Billancourt ikusmai bele muda ba Normandy.

Ohin loron, iha irmaun-irmán naʼin-162.000 liu neʼebé haklaken liafuan diʼak iha nasaun 13 neʼebé sukursál Fransa tau matan. No maski tinan 1998 serbisu atu print publikasaun sira para iha Normandy, maibé fatin neʼe hafoun fali atu bele apoia serbisu seluk neʼebé liga ho serbisu haklaken no hanorin. Neʼe inklui serbisu atu tradús publikasaun sira neʼebé bazeia ba Bíblia ba língua 24. Sukursál mós tau matan ba serbisu atu halo vídeo oioin. Agora daudaun, iha irmaun-irmán naʼin-400 liu neʼebé serbisu iha sukursál.

Ita kontente atu haree Jeová halo lalais serbisu haklaken iha Fransa!—Isaias 60:22.