Durante fulan-Novembru, Testemuña ba Jeová iha mundu tomak fahe Livru Haklaken edisaun públiku No. 2 2020 ba sira-nia família, kompañia sira, no mós ba ema seluk neʼebé hakarak simu. Sira mós fahe revista neʼe ba ulun-naʼin sira iha governu no postu administradór oioin. Neʼe mak halo kampaña neʼe espesiál tebes. Sukursál sira simu ona karta agradesimentu barak.

Iha rai-Serra Leoa, Vise-Ministru ba Rai no Propriedade no mós Obras Públikas naran Rex Bhonapha hakerek karta agradesimentu ba irmaun sira. Iha ninia karta nia hatoʼo obrigadu, hodi dehan: “Imi-nia revista anima tebes haʼu no haʼu aprende buat barak husi revista neʼe. Agora haʼu lee imi-nia revista loroloron.”

Iha rai-Samoa, Primeiru Ministru haruka karta ida atu hatoʼo obrigadu no fó sai katak nia hafolin duni orasaun Ami Aman. Xefe Estadu nian, Tuimalealiifano Vaaletoa Sualauvi II mós hatete katak nia rasik hafolin duni ita-nia hakaʼas an atu hanorin ema kona-ba Bíblia. Nia mós hatete katak ita-nia serbisu haklaken “ajuda ema, no hanorin ema kona-ba Bíblia ajuda sira atu troka sira-nia moris”. Nia mós gaba irmaun-irmán sira tanba durante pandemia COVID-19, irmaun-irmán sira la halibur hamutuk iha Reuniaun-Fatin, no la haklaken husi uma ba uma.

Iha rai-Xile, Sekretáriu Munisípiu naran Osvaldo Cartagena García, hatete: “Haʼu hein katak imi-nia kampaña neʼe bele eduka autoridade sira iha nasaun neʼe, no motiva sira atu halo buat diʼak iha komunidade nia leet. Liuliu iha situasaun susar neʼebé agora daudaun ita hasoru iha ita-nia nasaun neʼe, no mós iha mundu tomak.”

Parlamentu nia membru ida iha rai-Alemaña (Deutcher Bundestag) hakerek karta ba Sukursál iha Europa Sentrál neʼebé iha rai-Alemaña, hodi dehan: “Imi-nia relijiaun laʼós buat foun ba haʼu. Haʼu admira tanba ema husi imi-nia relijiaun sempre brani atu fó sai katak sira mak Testemuña ba Jeová. . . . Haʼu mós hatene katak imi hetan terus makaʼas durante Nazi nia ukun.”

Membru ida husi governu iha rai-Alemaña mós hatoʼo obrigadu ba Testemuña sira, tanba sira fó kmaan ba ema durante pandemia COVID-19. Nia esplika: “Hodi fó kmaan ba ema, imi ajuda ona komunidade atu mantein sira-nia unidade.”

Iha rai-Kolómbia, membru naʼin-rua husi governu, hakerek karta ba sukursál hodi hatoʼo obrigadu tanba simu ona Livru Haklaken no sira dehan katak sira sei fahe mós ba ema seluk. Membru ida husi Ministériu ba Meiu Ambiente no Dezenvolvimentu Sustentavél, hakerek hodi dehan: “Obrigadu barak tanba haruka ona Livru Haklaken ida mai haʼu, informasaun iha livru neʼe bele duni salva ema nia moris!”

Rai-Gana nia embaixadór iha rai-Japaun, naran Frank Okyere, hatete: “Tuir haʼu-nia hanoin, informasaun iha livru neʼe mak kapás loos tanba neʼe koʼalia kona-ba solusaun sira ba problema oioin neʼebé ema hasoru daudaun.”

Embaixadór ida husi rai-Azerbaijaun mós hatete: “Obrigadu barak tanba haruka ona Livru Haklaken neʼe ba ami-nia embaixada. Haʼu gosta tebes lee livru neʼe.”

Irmaun Amaro Teixeira neʼebé tau matan ba Departamentu Informasaun ba Públiku iha Sukursál Mosambike, hatete: “Kampaña neʼe lori rezultadu diʼak liu fali buat neʼebé ami imajina. Ita bele fahe liafuan diʼak kona-ba Maromak nia Ukun ba ema sira neʼebé baibain ita labele hasoru kuandu haklaken husi uma ba uma.” Ita hotu konkorda duni ho irmaun neʼe nia liafuan.

Ita fiar duni katak ita sei kontinua simu karta agradesimentu husi autoridade sira no mós husi ema seluk nuʼudar liafuan diʼak husi Bíblia habelar ba “sira hotu neʼebé iha pozisaun aas”.—1 Timóteo 2:2.