Iha 27 Maiu 2023, irmaun Mark Sanderson husi Grupu Administradór fó sai Bíblia Sagrada Tradusaun Mundu Foun primeiru iha língua jestuál Rúsia (RSL). Ema naʼin-148 mak asiste reuniaun neʼe iha reuniaun-fatin. No mós, ema naʼin-5.000 husi nasaun 15 mak haree husi live stream ka gravasaun ba programa neʼe. Bíblia neʼe agora bele hetan iha jw.org no iha aplikasaun JW Library Sign Language.

Irmaun ida ho defisiente tilun hatete: “Bainhira haʼu haree Bíblia iha língua jestuál, neʼe hanesan haʼu haree Jesus nia reasaun bainhira nia haree ema iha susar laran. Neʼe kona tebes haʼu-nia laran!”

Antes fó sai Bíblia iha língua jestuál Rúsia, Testemuña barak neʼebé defisiente tilun uza deʼit Bíblia neʼebé print ona. Maibé, haklaken-naʼin balu sente susar atu komprende signifikadu husi fraze barak neʼebé sira lee tanba sira toman uza língua jestuál Rúsia neʼebé fó esplikasaun klaru.

Porezemplu, iha 1 Reis 17, feto-faluk husi Sarepta fó-hatene profeta Elias katak nia no ninia oan-mane sei mate depois sira han hotu. Haklaken-naʼin balu neʼebé defisiente tilun hanoin liafuan sira-neʼe signifika katak feto-faluk neʼe nia hahán iha venenu. Iha tradusaun língua jestuál Rúsia, esplikasaun neʼe klaru liu katak neʼe mak sira-nia hahán ikus.

Ema husi rai no kultura oioin uza língua jestuál Rúsia. Tan neʼe, tradutór sira la haluha katak área ida-idak dala ruma uza sinál ba língua jestuál iha dalan la hanesan. Tradutór ida hatete: “Sinál ida karik signifika ‘sala’ maibé iha área seluk signifika ‘Maromak’. No mós, sinál ba ‘dixipulu’ iha área ida signifika ‘ikus’ ka ‘kiak’ iha área seluk. Nuʼudar team tradusaun, ami koko atu uza sinál no espresaun neʼebé ema barak hatene.”

Ami kontente hamutuk ho irmaun-irmán sira neʼebé uza língua jestuál Rúsia no agradese ba Jeová tanba haraik ona bensaun liuhusi prezente furak neʼe.—Provérbios 10:22.