27 MAIU 2024
NOTÍSIAS GLOBÁL
Bainaka husi rai 60 liu tuir dedikasaun ba sukursál Bretaña
Iha loron 18 Maiu 2024, irmaun Kenneth Cook, Jr. membru husi Grupu Administradór, hatoʼo diskursu dedikasaun ba sukursál nia fasilidade sira iha Chelmsford, Inglaterra. Irmaun-irmán naʼin-1.518 mak asiste programa neʼe iha aula 4 iha sukursál neʼe. Membru husi grupu Administradór balu hamutuk ho sira-nia ajuda-naʼin mós asiste reuniaun neʼe. No iha mós ema naʼin-10.085 mak asiste reuniaun neʼe liuhusi vídeo konferénsia iha Salaun ba Asembleia no sentru ba edukasaun kona-ba Bíblia iha área oioin iha Irlanda no Bretaña. Iha irmaun-irmán maizumenus naʼin-11.000 neʼebé hola parte iha serbisu konstrusaun ba sukursál neʼe, no husi sira-nia leet, irmaun-irmán naʼin-3.000 liu mak asiste reuniaun neʼe.
Irmaun-irmán sira rona didiʼak ba diskursu dedikasaun iha Salaun ba Asembleia East Pennine iha Rotherham, Inglaterra
Loron tuirmai, ema naʼin-172.834 mak asiste reuniaun espesiál neʼebé tranzmite ba kongregasaun 1.821 iha sukursál neʼe nia área hotu.
Iha semana dedikasaun nian, bainaka sira iha oportunidade atu vizita fasilidade sira iha sukursál neʼe. Iha ezibisaun interativu atu ajuda bainaka sira hatene kona-ba serbisu neʼebé halaʼo iha Betel atu apoia serbisu haklaken no hametin kongregasaun sira iha área sukursál Inglaterra nian no mós iha mundu tomak. Porezemplu, Grupu Grava Vídeo hatudu prosesu ida-idak ba preparasaun no produsaun filme kona-ba Bíblia no mós konvida bainaka sira atu asiste bainhira ema halo daudaun gravasaun filme.
Sorin karuk: Irmán ida prepara sobremeza. Sorin loos: Grupu Grava Vídeo hatudu oinsá ita-nia organizasaun halo filme sira
Irmaun-irmán sira haree dokumentu antigu husi Ciro (Cyrus Cylinder) iha muzeu Bretaña iha Londres, Inglaterra
Irmaun-irmán sira mós bá vizita fatin seluk neʼebé laʼós iha Betel. Neʼe inklui ba fatin istóriku sira iha sidade Londres no área Kent atu aprende liután kona-ba istória Bíblia nian iha Inglaterra.
Bainhira hanoin fali ba semana furak neʼe, irmaun Richard Cook, membru husi Komisaun ba Sukursál Bretaña, hatete: “Furak tebes haree irmaun-irmán sira husi rai oioin mai halibur hamutuk ba programa espesiál neʼe. Ita admira ho atividade hotu tanba Jeová hasai tiha susar sira hodi nuneʼe bele organiza programa dedikasaun neʼebé nakonu ho ksolok no fó hahiʼi ba ninia naran.”
Ita kontente tebetebes hamutuk ho irmaun-irmán iha área sukursál Inglaterra nian, neʼebé “haksolok tebes” tanba fasilidade furak sira iha sukursál neʼe dedika ona ba ita-nia Maromak Jeová.—Neemias 12:43.