Iha 1 Juñu 2023, Betel barak iha mundu tomak komesa simu fali ema atu vizita. Tanba pandemia COVID-19, Betel la simu vizitante sira ba tinan tolu liu. Neʼe mak tempu espesiál ba membru Betel sira iha mundu tomak no mós ba ema rihun ba rihun neʼebé vizita Betel.

Bainhira vizitante sira toʼo, ema Betel sira fó benvindu ba sira ho sinál, knananuk, oin-midar no hakoʼak. Irmaun Ellis Bott neʼebé komesa serbí iha sede-jerál iha Warwick durante pandemia, hatete: “Furak tebes atu haree ema Betel sira forma hamutuk iha entrada ho sinál benvindu! Hodi haree ema barak nia matan-been suli tanba kontente, neʼe fó-hanoin haʼu katak Betel mak fatin espesiál duni.” Irmán Alexis Alexander neʼebé serbí part-time iha Betel sente kontente tebes bele hola parte atu kumprimenta no simu ema neʼebé vizita Betel. Nia hatete: “Furak tebes atu haree irmaun-irmán sira-nia domin ba Jeová no ninia uma.”

Irmán Mi-yeon Jo sente kontente tanba bele lori ninia oan-mane neʼebé tinan 8 naran Yoon bá vizita sukursál iha Koreia Súl. Yoon hein namanas atu vizita Betel toʼo susar atu toba-dukur iha kalan antes nia bá vizita. Mi-yeon hatete: “Bainhira ami hadeer, ami rona kedas Caleb no Sofia nia knananuk kona-ba vizita Betel. No ami loke knananuk neʼe iha karreta laran durante iha dalan atu bá sukursál.” Yoon kontente tebetebes bele vizita Betel, nia hatete: “Buat neʼebé Betel presiza mak animál sira, no neʼe sei halo Betel sai paraízu ona.”

Irmaun Noah Johnsen mak joven mane ida husi Alberta, Kanadá, neʼebé iha moras sériu ida. Nia sempre hakarak atu vizita Betel iha Novaiorke, Estadus Unidus Amérika. Ninia kondisaun hanetik nia atu labele halo viajen ho aviaun, tan neʼe ninia inan-aman tula nia ho karreta hodi halo viajen maizumenus kilómetru 4.100 atu vizita sukursál Estadus Unidus iha Wallkill, Novaiorke. Kona-ba ninia vizita neʼe, Noah hatete: “Haʼu bele esplika haʼu-nia esperiénsia neʼe ho liafuan ida, domin. Haʼu sente Jeová nia domin no irmaun-irmán sira-nia domin.”

Irmaun Fyodor Zhitnikov neʼebé tinan 76 no ninia feen Yulita sente kontente tebes bele vizita muzeu iha Betel Kazakistaun. Parte ida iha muzeu neʼe hatudu kona-ba irmaun-irmán sira neʼebé tahan hasoru susar ho laran-metin ba tinan barak. Fyodor gosta liu ezibisaun neʼe tanba nia serbí Jeová hamutuk ho sira barak. Fyodor fó sai ninia sentimentu agradese ba serbisu neʼebé irmaun-irmán sira halo atu prepara ezibisaun neʼe. Nia hatete: “Se irmaun-irmán sira rai didiʼak relatóriu kona-ba ita-nia serbisu ba Jeová durante tinan hirak-neʼe, sá tan Jeová, nia hanoin-hetan duni buat hotu no hafolin serbisu neʼebé ema ida-idak halo.”

Ami kontente bele simu fali ema atu vizita Betel iha mundu tomak. Ami hein namanas atu fó benvindu ba ema rihun ba rihun neʼebé sei vizita iha futuru!—Salmo 122:1.

Iha kraik mak foto balu kona-ba irmaun no irmán sira neʼebé vizita fatin no muzeu oioin iha Betel.