Iha 9 Outubru 2022, irmaun-irmán sira hetan Bíblia Sagrada Tradusaun Mundu Foun edisaun revizaun iha lian Samoanu. Irmaun Geoffrey Jackson husi Grupu Administradór mak fó sai Bíblia neʼe liuhusi diskursu neʼebé grava ona, no Testemuña sira iha Samoa Amerikana, Austrália, Novazelándia, no Samoa mak tuir reuniaun espesiál neʼe. Depois diskursu, sira hotu neʼebé tuir reuniaun simu Bíblia foun no Bíblia dijitál mós fó sai atu ema hotu bele download.

Testemuña ba Jeová komesa haklaken iha Samoa iha tinan 1931, no hahú kongregasaun primeiru iha Apia iha tinan 1953. No Bíblia Tradusaun Mundu Foun iha lian Samoanu fó sai iha tinan 2009. Neʼe halo haklaken-naʼin no ema seluk kontente tanba Bíblia neʼe tradús ho loloos no fasil atu hetan.

Ho edisaun revizaun nian, tradutór sira hakaʼas an duni atu uza liafuan neʼebé modernu, fasil atu komprende, no anima lee-naʼin sira atu kontinua lee, no iha tempu hanesan tradús tuir testu orijinál. Tradutór ida dehan: “Ema Samoa hatudu respeitu boot ba Bíblia. Tan neʼe, grupu tradutór uza liafuan neʼebé simples no fasil atu komprende, maibé nafatin hatudu respeitu. Ho Jeová nia ajuda, ami iha Bíblia edisaun revizaun nian iha lian Samoanu, no neʼe sei lori benefísiu ba ami hotu.”

Ita fiar katak tradusaun Bíblia neʼe sei ajuda lee-naʼin sira atu komprende liután ita-nia Maromak Jeová nia hanoin neʼebé folin-boot.—Salmo 139:17.