Grupu Administradór husi Testemuña ba Jeová fó sai anúnsiu katak sira hili sukursál balu atu komesa halaʼo fali reuniaun iha Reuniaun-Fatin. Sukursál sira-neʼe sei hili Reuniaun-Fatin sira iha área sira neʼebé ema barak mak hetan ona vasina no ema uitoan deʼit mak hetan COVID-19. Klaru katak arranju neʼe sei apoia malu ho governu lokál nia regulamentu kona-ba halibur hamutuk iha uma. Anúnsiu neʼe fó sai ona ba família Betel iha mundu tomak iha loron-sesta, 15 Outubru 2021.

Rezultadu husi arranju neʼe mak sei determina se kongregasaun sira seluk mós bele halaʼo fali reuniaun iha Reuniaun-Fatin. Anúnsiu mós temi katak organizasaun nia atividade hotu sei halaʼo hanesan agora daudaun toʼo maizumenus loron 1 Janeiru 2022.

Ami agradese tebes ho Grupu Administradór neʼebé tau matan irmaun-irmán sira iha mundu tomak ho kuidadu no tetu didiʼak kona-ba desizaun atu halaʼo fali organizasaun nia atividade sira hanesan baibain. Favór halo orasaun ba Jeová atu nia kontinua dirije no haraik bensaun ba arranju sira-neʼe.—Provérbios 14:16.