Husi fulan-Novembru 2023 toʼo fulan-Janeiru 2024, Testemuña ba Jeová naʼin-19.000 liu hola parte iha kampaña espesiál atu haklaken iha rai-Bolívia no Kolómbia. Sira fahe Bíblia nia mensajen neʼebé fó esperansa ba ema iha lian Españól no mós iha língua 18 tan, inklui língua jestual neʼebé uza iha rai-Bolívia no rai-Kolómbia.

Irmaun ida neʼebé koʼalia lian Españól iha Guadalupe, rai-Kolómbia, hakfodak loos bainhira feto ida loke odamatan no hasé hodi dehan: “Ami hein hela ita!” Feto neʼe hatutan katak loron balu antes neʼe, nia no ninia laʼen koʼalia hela kona-ba loron-boot sira no sira dúvida se diʼak atu selebra ka lae. Feto neʼe nia laʼen dehan katak nia haree ona Testemuña sira haklaken besik sira-nia fatin. Nia fiar katak lakleur Testemuña sira sei toʼo sira-nia uma no sei hatán ba sira-nia pergunta. Ita-nia irmaun sira kontente atu ajuda família neʼe aprende saida mak Bíblia hanorin no halo arranju atu ema kontinua vizita sira.

Irmán naʼin-rua haklaken hela iha knua naran Cuatro Cañadas iha rai-Bolívia no sira hakbesik ba feto ida naran Miguelina. Nia hamriik hela iha loja nia oin. Bainhira sira rona katak Miguelina foin lakon ema neʼebé nia hadomi tanba mate, irmán sira-neʼe lee ba nia Apokalipse 21:3, 4. Miguelina hakarak aprende tan kona-ba Bíblia. Maibé, susar ba nia tanba nia hela iha fatin izoladu no la iha telefone. Loron balu tuirmai, irmán naʼin-rua neʼe haklaken ba feto joven ida iha uma ida neʼebé iha knua neʼebé hanesan. Derrepente deʼit Miguelina sai husi uma neʼe. Irmán sira-neʼe hakfodak atu aprende katak feto neʼebé sira haklaken bá mak Miguelina nia oan-feto. Sira hotu kontente tebes! Sira halo planu atu família tomak atu estuda Bíblia.

Ami fiar duni katak Jeová hafolin tebes irmaun-irmán sira-nia hakaʼas an iha kampaña neʼe no sei kontinua fó bensaun ba ninia povu nuʼudar ita haklaken liafuan diʼak “ba kriasaun hotu iha lalehan nia okos”.—Koloso 1:23.