Kuandu funu hahú, irmán klosan ida tinan 46 naran Iryna Makukha bá estasaun komboiu iha Kharkiv. Nia hanoin katak seguru liu ba nia atu bá rai seluk. Situasaun mak runguranga, ema barak saʼe deʼit komboiu maski la hatene komboiu neʼe atu bá neʼebé. Komboiu neʼebé irmán Iryna saʼe taka metin janela hodi naroman labele sai ba liʼur atu ema la ataka komboiu neʼe. Depois komboiu komesa halai mak nia hatene katak komboiu neʼe atu bá Eslovákia.

Iha 3 Marsu 2022, irmán Iryna toʼo sidade kapitál Prague iha Repúblika Xeka, no toʼo agora nia hela iha sidade neʼe. Nia hetan serbisu atu halo limpeza no hela hamutuk ho irmán naʼin-rua seluk neʼebé mós refujiadu husi Ukránia. Iryna aprende língua Xeka no komesa fali serbí nuʼudar pioneiru, loloos nia pioneiru ba tinan 20 ona.

Iryna dehan: “Haʼu haree ho haʼu-nia matan rasik oinsá Jeová tau matan ami liuhusi irmaun-irmán sira. Neʼe hametin tebes haʼu-nia fiar.”

Besik irmaun-irmán naʼin-23.000 mak bá rai seluk nuʼudar refujiadu. Karik sira hetan fatin neʼebé seguru liu, maibé sira presiza buka serbisu no hela-fatin, trata dokumentu, no hatama oan sira ba eskola foun, no sira presiza halo buat hotu neʼe hodi aprende língua foun. Sira rekoñese katak sira-nia oráriu espirituál no irmaun-irmán sira mak ajuda tebes sira durante tempu susar neʼe.

Irmaun Anatoli Perceac ho ninia feen Olena, no sira-nia oan-feto Alina neʼebé tinan 17, hahú moris foun iha Roménia depois bomba estraga sira-nia área iha Mykolaiv Oblast iha Ukránia. Iha loron 6 Marsu 2022, família neʼe muda ba fatin seluk. Tanba Anatoli mak sidadaun Moldávia, nia hetan lisensa atu lori ninia família ba Roménia. Kona-ba muda ba nasaun seluk, Olena dehan: “Neʼe hanesan fokit sai ai-hun ho ninia abut no kuda fali iha fatin seluk.”

Hodi simu ajuda husi irmaun sira iha Roménia, agora família Perceacs iha sira-nia apartamentu rasik. Laʼós neʼe deʼit, Anatoli no Olena hetan ona serbisu, no Alina konsege kumpre ninia TPC husi eskola iha Ukránia liuhusi internét.

Irmaun-irmán sira husi Roménia laʼós deʼit ajuda família neʼe nia presiza iha dalan fíziku, maibé apoia mós iha dalan emosaun no espirituál. Irmaun-irmán sira uza sira-nia tempu beibeik ho família neʼe hodi sira la sente mesamesak. Olena no Alina aprende língua Roménia hodi uza aplikasaun JW Language no haklaken hamutuk ho irmaun-irmán sira iha kongregasaun foun. Irmaun Anatoli koʼalia língua Roménia husi kiʼik kedas.

Anatoli dehan: “Ami haree Jeová nia liman husi primeiru kedas. Liuhusi organizasaun no irmaun-irmán sira-nia ajuda, ami sente Jeová nia domin.”

Irmán Alina Havryliuk neʼebé sai faluk ona antes funu neʼe komesa, no ninia oan-mane Vladyslav neʼebé tinan 16 muda husi Vinnytsia iha Ukránia ba Suwalki iha Polónia iha loron 27 Fevereiru. Alina dehan: “Foufoun, haʼu hanoin barak kona-ba haʼu no haʼu-nia oan sei hela iha neʼebé no oinsá atu buka moris, maibé haʼu mós fiar metin katak Jeová sei tau matan mai ami.”

Alina mak tinan 37, no nia komesa kedas buka serbisu neʼebé la hanetik nia atu tuir reuniaun. Nia hetan serbisu ida atu hamoos eskola. Nia dehan: “Buat neʼebé importante liu mak serbisu neʼe bele ajuda haʼu atu sustenta família no fahe tempu barak ba haklaken.”

Alina no Vladyslav aprende língua Polónia no serbí nuʼudar pioneiru estra iha kongregasaun neʼebé koʼalia língua Polónia. Vladyslav mós tama ona eskola sekundária.

Ita-nia irmaun-irmán sira iha Ukránia hasoru susar boot oioin, maibé Jeová kontinua fó sira kbiit neʼebé la hanesan baibain. Sira sente liafuan neʼebé hakerek iha 2 Korinto 4:8 mak loos: “Ami hetan terus makaʼas oioin husi sorin-sorin, maibé ami bele book an. Ami la hatene atu halo saida, maibé neʼe laʼós katak la iha dalan atu sai.”