Ba tinan lima ona, irmaun-irmán sira iha mundu tomak kontente atu haree programa espirituál fulan-fulan iha JW Broadcasting. Ita hein namanas ba programa foun iha tinan serbisu nian 2020. Programa primeiru fó sai iha fulan-Outubru 2014. Haree toʼok saida deʼit mak JW Broadcasting konsege halo durante tinan lima neʼe.

Tradús ona ba língua 185. Bainhira foin komesa, programa JW Broadcasting iha lian Inglés deʼit. Maibé iha fulan-Maiu 2015 Grupu Administradór aprova atu tradús programa neʼe ba língua 40 liu. Liutiha tinan haat, programa neʼe tradús ona ba maizumenus língua 185.

Vídeo husi rai oioin. Tanba Grupu Administradór halo programa iha JW Broadcasting ba irmaun-irmán iha mundu tomak, programa neʼe inklui vídeo barak husi Departamentu Áudio/Vídeo iha rai oioin. Baibain programa remata hodi hatudu vídeo badak husi kongregasaun neʼebé iha fatin dook, porezemplu Etiópia, Izlandés, Mongólia, Saipan, Tuvalu, no Uganda. Ema iha rai 230 mak haree ona JW Broadcasting, no neʼe inklui fatin dook hanesan illa Heard no McDonald. La iha ema neʼebé hela metin iha neʼebá no illa neʼe maizumenus dook kilómetru 1.600 husi Antártida. Bainhira Broadcasting foun foin sai, ema loke ka download programa neʼe maizumenus dala millaun 8,6 durante fulan neʼe nia laran.

Vídeo barak. Ami prodús vídeo barak neʼebé hamutuk toʼo oras 60 liu no inklui diskursu, entrevista, esperiénsia, notísias foun, no drama. Husi tempu neʼebé ami prodús knananuk primeiru husi Broadcasting, The Best Life Ever, ami kontinua halo knananuk foun fulan-fulan. Agora knananuk sira-neʼe tradús ona ba língua 368.

Aprezentadór. Uluk membru husi Grupu Administradór deʼit mak halo knaar neʼe. Depois, ajuda-naʼin ba komisaun Grupu Administradór mós komesa aprezenta Broadcasting hamutuk ho membru ida husi Grupu Administradór ka mesak deʼit. Númeru totál ba irmaun neʼebé aprezenta ona Broadcasting mak 29.

Komentáriu sira. Irmaun ida husi Estadus Unidus hetan estrok no nafatin moras. Nia hafolin tebes knananuk sira husi Broadcasting no hatete: “Múzika furak neʼe ho tema kona-ba Jeová no ninia Liafuan halo haʼu iha hanoin neʼebé pozitivu no ajuda haʼu hasoru haʼu-nia problema. Haʼu kontente atu haree oinsá múzika neʼe ajuda haʼu haburas hahalok kristaun. Obrigadu barak ba ai-han espirituál neʼe!”

Família ida husi Estadus Unidus iha oan-mane neʼebé mate tanba kankru. Bainhira sira haree Broadcasting iha fulan-Novembru 2016 sira hakerek: “Kuandu ami haree vídeo múzika Besik daudaun ona ami-nia matan-been suli. Ami imajina katak ami mak inan-aman neʼe iha mundu foun. Kuandu haʼu sente katak haʼu labele tahan ona, Jeová sempre ajuda hodi hatudu katak nia hanoin ami no sei apoia ami iha ami-nia tempu susar. Haʼu sente loloos Jeová hatán ami-nia orasaun liuhusi vídeo neʼe.”

Feen-laʼen husi Ukránia agradese ba Broadcasting fulan-fulan nian no dehan: “Tanba JW Broadcasting, membru sira husi Grupu Administradór sai hanesan ami-nia família rasik!”

Ita agradese tanba Jeová fó buat neʼebé ita presiza agora. Neʼe hametin ninia povu nia unidade iha mundu tomak.—1 Pedro 2:17.