Parte 1 no 2 husi série neʼe esplika kona-ba oinsá ami uza website jw.org atu fó sai vídeo no publikasaun iha formatu dijitál no mós fahe notísias neʼebé loos kona-ba irmaun-irmán sira iha mundu tomak. Neʼe mak parte ikus ba série neʼe, neʼebé sei esplika oinsá jw.org apoia ona serbisu haklaken iha mundu tomak.

Língua: Bainhira fó sai website foun neʼe iha Agostu 2012, iha língua 139. Língua iha website neʼe saʼe ba 500 iha Agostu 2014, neʼe inklui língua jestuál hamutuk 22. No iha tinan neʼe mós Testemuña ba Jeová halo kampaña atu fahe panfletu kona-ba website jw.org. Agora, ita bele hetan informasaun iha website neʼe iha língua 1.070 liu, inklui língua jestuál 100 liu.

Informasaun iha tempu neʼebé loos: Iha Outubru 2019, ami hafoun pájina primeiru iha website jw.org atu hatudu informasaun importante ida ho dezeñu furak hamutuk ho informasaun tolu seluk iha kraik iha parte rekomendasaun. Modelu neʼe atu dada ema nia atensaun ba informasaun neʼebé liga ho serbisu haklaken. Tuirmai Departamentu Hakerek no Departamentu Dezeñu kria prosesu foun neʼebé fó sai lalais informasaun importante hamutuk ho dezeñu iha pájina primeiru, hodi nuneʼe ita-nia website sempre fó sai informasaun tuir akontesimentu iha mundu. Porezemplu, pájina primeiru fó sai informasaun sira kona-ba pandemia COVID-19 no mós funu entre Rúsia no Ukránia no susar sira neʼebé refujiadu sira hasoru tanba funu neʼe.

Informasaun kona-ba Testemuña ba Jeová: Liuhusi website jw.org, ema neʼebé interese ba lia-loos bele hetan informasaun loos kona-ba ita-nia organizasaun no serbisu haklaken. Website neʼe mós loke dalan ba ema atu kontaktu Testemuña ba Jeová se sira hakarak aprende liután Bíblia. Feto ida neʼebé defisiente tilun estuda Bíblia ho Testemuña ba Jeová bainhira nia sei eskola sekundária, maibé lakon kontaktu bainhira nia muda uma. Nia hakarak atu estuda fali maibé seidauk iha Testemuña ba Jeová ida ba vizita ninia uma foun. Nia hanoin-hetan kona-ba website jw.org no husu vizita hodi prenxe formuláriu online. Iha loron balu nia laran deʼit, pioneiru espesiál naʼin-rua ba vizita ninia uma. Nia laʼós deʼit komesa estuda maibé mós komesa tuir reuniaun sira. Agora nia hetan ona batizmu no hanorin ninia oan naʼin-tolu kona-ba Jeová. Nia hatete: “Haʼu agradese ba Jeová tanba haʼu bele prenxe formuláriu online. Se lae, haʼu la hatene bainhira loos mak haʼu bele hasoru Testemuña ba Jeová.”

Nuʼudar ita haklaken ba ema barak liután, ita kontente tanba hatene katak Jeová nia organizasaun sei kontinua fó ekipamentu neʼebé kapás atu ajuda ema neʼebé interese ba lia-loos.—Isaias 60:22.

• Vídeo neʼebé download kada fulan

• Vizitante ba loron ida-idak iha fulan ida nia laran

• Fó sai logo ofisiál ba jw.org, Marsu 2013

• Fó sai website iha língua jestuál sira, Jullu 2014

• Hafoun pájina primeiru atu bele dada ema nia atensaun, Outubru 2019

• Anúnsiu kona-ba fó sai livru Moris Haksolok ba Nafatin, Janeiru 2021