Komemorasaun ba Jesus nia mate iha tinan 2020 mak komemorasaun neʼebé úniku tebes no espesiál. Ba dala primeiru, programa Memoriál neʼe fó sai iha televizaun no estasaun rádiu iha língua balu no fatin barak iha Áfrika.

Tanba arranju neʼe, haklaken-naʼin hamutuk 407.000 bele haree programa memoriál neʼe, inklui ema rihun ba rihun neʼebé laʼós Testemuña, maibé sira mós haree programa. Maski ita la hatene ho loloos ema naʼin hira mak haree programa neʼe, maibé neʼe fó sai liuhusi televizaun ba área ida iha Áfrika ho populasaun hamutuk millaun 150 liu.

Tanba pandemia COVID-19, maioria ema iha mundu tomak tuir Memoriál liuhusi vídeo call, maibé haklaken-naʼin barak iha Áfrika hela iha área neʼebé pakote internét karun atu download no haree vídeo sira. Tan neʼe Grupu Administradór fó lisensa ba sukursál balu atu halo kontratu ho estasaun televizaun no rádiu lokál no mós nasionál. Rezultadu mak sukursál sira-neʼe bele fó sai programa Memoriál ho folin baratu.

Antes Komemora Jesus nia mate, sukursál 11, neʼe katak sukursál iha Angola, Benín, Kamaroins, Kosta Marfín, Repúblika Demokrátika Kongu, Gana, Malavi, Mosambike, Senegál, Zámbia, no Zimbabué kontaktu estasaun televizaun no rádiu atu arranja programa Memoriál ba públiku neʼebé fó sai iha fatin 36 liu iha nasaun 16.

Angola

Estasaun rádiu neen konkorda atu fó sai diskursu Memoriál iha língua neen: Ibinda, Kikongo, Kimbundu, Nyaneka, Portugés, no Umbundu. Estasaun rádiu sira-neʼe fó sai diskursu neʼe ba área balu iha Angola neʼebé iha populasaun barak.

Repúblika Demokrátika Kongu

Estudante Bíblia ida halo planu atu haree programa Memoriál mesak deʼit tanba ninia família kontra makaʼas bainhira nia estuda Bíblia. Maibé bainhira nia prepara an atu haree diskursu Memoriál, ninia apá bolu nia husi sala vizita hodi dehan: “Programa hahú ona!” Nia laʼo ba sala vizita no hakfodak tebes kuandu haree ninia família tomak halibur hamutuk atu haree programa Memoriál iha televizaun. Ema naʼin-sanulu husi ninia família mak tuir Memoriál.

Iha knua kiʼik ida besik sidade Luena, ema ida neʼebé laʼós Testemuña dehan: “Ami-nia pastór sira la halo buat ida. Maibé imi kontinua halaʼo adorasaun ba imi-nia Maromak maski situasaun susar tanba pandemia COVID-19. Ami sei tuir memoriál!”

Gana

Estasaun televizaun nasionál ida prontu atu fó sai programa Memoriál iha lian Twi. Estasaun neʼe mós halo iklan hodi konvida ema atu haree diskursu Memoriál. Estasaun televizaun neʼe mós loke vídeo Tanbasá Jesus mate?, Tanbasá mak Maromak husik terus akontese?, no mós knananuk sira husi Broadcasting ho títulu Paraízu neʼebé atu mai no Besik daudaun ona.

Senegál

Irmán ida dehan: “Kalan neʼe, ema bele aprende kona-ba Jeová liuhusi sira-nia televizaun no rádiu. Neʼe furak tebes! Ami orgullu bele serbí Maromak Jeová!”

Irmán seluk mós dehan: “Bainhira haʼu rona katak diskursu memoriál sei fó sai iha televizaun no rádiu, haʼu dehan ba haʼu nia an, ‘Tanba pandemia COVID-19, ita labele halaʼo kampaña atu konvida ema tuir Memoriál, maibé fó sai programa Memoriál iha televizaun mak oportunidade kapás atu konvida ema’. Haʼu telefone kedas haʼu-nia estudante sira, ema neʼebé haʼu baibain vizita no ema seluk neʼebé haʼu koñese no laʼós Testemuña atu fó-hatene sira kona-ba programa memoriál neʼe. Haʼu-nia estudante naʼin-sia no sira-nia família haree diskursu Memoriál. Haʼu nia prima ida neʼebé mós haree diskursu Memoriál liuhusi televizaun iha sidade Ziguinchor husu atu ami bele koʼalia liután kona-ba neʼe, no ho laran kontente haʼu hatán bele.”

Arranju espesiál neʼe fó prova dala ida tan katak ba Jeová “buat hotu bele deʼit”.—Mateus 19:26.