Iha loron 7 Abríl 2020, durante pandemia virus corona, Testemuña ba Jeová iha mundu tomak komemora Memoriál hodi hanoin-hetan Jesus nia mate. Irmaun Stephen Lett husi Grupu Administradór hatete: “La iha virus ka moras ida iha mundu neʼebé bele hanetik ita-nia agradese ba Jeová no Jesus no ba buat neʼebé sira halo ona mai ita. La iha buat ida mak bele hamenus ita-nia hakarak atu komemora Naʼi nia Han Kalan.” Oinsá mak ida-neʼe sai loos iha tinan neʼe?

Neʼe mak artigu primeiru iha série husi parte “Notísias” neʼebé sei fó sai dalan neʼebé ita-nia irmaun no irmán sira iha mundu tomak komemora Memoriál durante pandemia virus corona. Iha artigu primeiru, ita sei haree oinsá Testemuña ba Jeová komemora Memoriál iha Betel sira iha Estadus Unidus.

Tanba halo tuir lei atu la halibur hamutuk ho ema barak, Grupu Administradór deside atu halo programa Memoriál ida deʼit ba família Betel iha Estadus Unidus. Irmaun Anthony Morris mak hatoʼo diskursu husi Betel Warwick no ema hotu husi família Betel iha Estadus Unidus bele haree no rona diskursu husi sira-nia kuartu. Maski ema uitoan deʼit mak han paun no hemu tua-uvas, ho laran-diʼak Betel mak prepara paun no tua-uvas ba ema hotu iha família Betel.

Família Betel mós bele tuir programa Memoriál hamutuk ho sira-nia kongregasaun rasik liuhusi vídeo call. No ema Betel neʼebé iha knaar nuʼudar katuas mós iha opsaun atu hatoʼo diskursu Memoriál liuhusi vídeo call ba sira-nia kongregasaun.

Iha família Betel, ema barak dehan katak neʼe mak Memoriál neʼebé espesiál tebes neʼebé sira tuir iha sira-nia moris. Maski ketak husi irmaun-irmán sira, maibé sira sente unidade tanba hatene katak irmaun no irmán sira iha mundu tomak komemora Memoriál neʼe hamutuk no neʼe hatudu sai kona-ba Maromak Jeová no ninia Oan doben Jesus Kristu nia domin neʼebé boot.—João 3:16; Mateus 20:28.