Ita-nia joven sira iha mundu tomak nafatin hatudu laran-manas hodi halaʼo atividade espirituál nian hodi uza dalan foun atu haklaken, no neʼe book maluk fiar-naʼin sira seluk durante pandemia virus corona.

Iha Novazelándia, ema iha komunidade sira komesa tau brinkedu, boneka no dezeñu sira iha janela atu hatudu ba labarik sira neʼebé laʼo liu. Labarik sira iha kongregasaun oioin haree ida-neʼe nuʼudar oportunidade atu haklaken, tan neʼe sira halo sinál sira ho dezeñu kona-ba Caleb no Sofia no hakerek “Haree haʼu iha jw.org”.

Emilia, neʼebé tinan 9 husi rai-Suisa, iha sistema imune neʼebé fraku. Nia hakerek karta sira ba ema neʼebé hela iha uma ba idozu sira. Emilia tau iha karta neʼe dezeñu kona-ba Noé no ró boot. Nia esplika katak Noé ho ninia família mós sulan, maibé neʼe ajuda sira atu seguru. Nia fó laran-manas ba ema sira-neʼe atu “hakmatek iha laran, hanesan Noé”. Kuandu virus la iha ona, Emilia hakarak bá vizita ema sira-neʼe.

Ema balu resposta Emilia nia karta no nia mós hakerek fali ba sira. Reportajen ida rona kona-ba Emilia no hakerek kona-ba nia iha jornál ida.

Peyton no Ella Kempf, biin-alin neʼebé hela iha Ontario, Kanadá, sira nafatin kontaktu ho kongregasaun durante tempu neʼe. Sira-nia aman, Jared, hatete: “Durante adorasaun família, ami-nia oan sira ajuda ami halo lista kona-ba ema sira neʼebé ami atu kontaktu.” Sira-nia inan Jessica hatete: “Ami hakarak hanorin ba ami-nia oan sira katak importante ba irmaun-irmán no mós ita-nia família no belun sira atu hatene katak ita la haluha sira.”

Hanesan neʼe mós iha Colorado, Estadus Unidus, Stella neʼebé tinan sia, no ninia inan fokus atu kontaktu irmaun-irmán ferik-katuas sira iha sira-nia kongregasaun. Sira halo lista no kontaktu ema ida-idak liuhusi telefone.

Jonathan no Sean McKampson, tinan 12 no 15 serbí hamutuk ho sira-nia inan aman iha kongregasaun Xinés iha Arizona. Sira kontinua haklaken liuhusi hakerek karta iha lian Xinés dadeer-dadeer antes bá eskola. Tanba sira sei aprende língua neʼe, entaun presiza tempu no hakaʼas an atu hakerek hotu karta neʼe. Maibé sira hakarak fahe mensajen husi Bíblia ba ema neʼebé koʼalia lian Xinés.

Labarik naʼin-neen, husi tinan 2 toʼo 15, uluk toman atu vizita uma ba idozu sira iha Michigan. Sira baibain bá hamutuk ho sira-nia inan no irmán pioneiru ida. Maibé agora tanba virus corona, autoridade sira la fó lisensa ona atu ema mai vizita fatin neʼe. Agora labarik sira nia inan-aman grava no haruka deʼit knananuk reuniaun nian neʼebé oan sira kanta, no mós eskritura sira neʼebé oan sira lee ba ema neʼebé hela iha fatin idozu neʼe. Ema ida neʼebé serbisu iha neʼebá hatete ba labarik sira-nia aman, katak vídeo ida fó kmaan duni ba ema ida neʼebé hetan depresaun tanba haree notísias kona-ba virus corona neʼebé halo ema mate.

Ita fiar katak Jeová hafolin labarik sira-neʼe nia hakaʼas an hodi hatudu domin ba ema seluk no fó hahiʼi ba Jeová ho sira-nia dalan atu haklaken.​—Salmo 148:12, 13.