Maski Jeová nia povu ho matenek halo buat neʼebé bele halo atu proteje an durante krize saúde neʼebé agora kona mundu tomak, maibé impaktu aat husi ida-neʼe mós bele kona ita. (Eclesiastes 9:11) Triste katak, toʼo agora iha mundu tomak, ita-nia irmaun-irmán na’in-872 mate tanba virus corona. Ita-nia maluk fiar-naʼin sira lalais atu fó ajuda no konsola sira neʼebé triste tanba família mate. (1 Korinto 12:26) Loloos, ita-nia maluk fiar-naʼin sira nafatin sadere ba Jeová, ida-neʼebé sempre kumpre ninia promesa iha Filipe 4:7 atu fó “nia dame” mai ita.

Irmán ida neʼebé simu daudaun kmaan no ajuda husi Jeová nia organizasaun mak Hannchen Unnützer, pioneiru tempu-tomak ida iha Bolzano, rai-Itália parte norte. Triste katak ninia laʼen, irmaun Manfred Unnützer, mate iha data 28 Marsu 2020 tanba virus corona. Irmaun Unnützer hola parte iha serbisu tempu-tomak maizumenus tinan 58, no ninia feen serbí hamutuk ho nia maizumenus tinan 54. Sira serbí hamutuk atu halaʼo katuas área nia knaar ba tinan 25. Irmaun-irmán maizumenus na’in-1000 husi rai oioin asiste ninia diskursu funerál neʼebé halaʼo ho vídeo call.

Irmán Unnützer dehan: “Haʼu hafolin tebes haʼu-nia maluk fiar-naʼin sira. Sira nunka husik haʼu mesak, ba oras ida deʼit mós lae. Haʼu sente sira nia domin hanesan mota neʼebé suli ba haʼu! Sira tau matan mai haʼu iha parte emosaun no fíziku nian no mós fó kmaan mai haʼu husi Bíblia. Haʼu hadomi haʼu-nia irmaun-irmán sira hotu.”

Feen-laʼen ida neʼebé mós simu daudaun ajuda no kmaan durante sira-nia tempu triste mak Maria José Moncada no ninia laʼen, Darwin. Sira serbí iha rai-Ekuadór, iha área foho sira neʼebé koʼalia lian Quichua. Triste katak irmán Moncada nia inan-aman mate tanba moras neʼe, ida mate uluk no liutiha loron 6, ida seluk mós mate. Ninia inan naran Fabiola Santana Jordan, ho tinan 56, no serbí nuʼudar pioneiru regulár, no ninia aman naran Ricardo Jordan, ho tinan 60, no serbí nuʼudar atan ba kongregasaun iha kongregasaun Praderas, Guayaquil. Irmán Moncada nia maun-alin naʼin-rua mós hetan moras COVID-19 maibé sai diʼak fali.

Tanba mout iha triste laran, irmán Moncada hakarak halo viajen ba oras haat atu asiste funerál ho ninia família hodi ajuda no apoia sira. Maibé ho orasaun, sira deside katak ladún matenek atu ba Guayaquil. Entaun duké bá, sira koʼalia ho sira-nia família liuhusi vídeo call. Irmán Moncada esplika: “Se ami bá no hasoru duni ami-nia família, neʼe sei lori perigu ba ami-nia saúde no mós ba ema seluk.”

Klaru, irmán Moncada sente “laran-kanek tebes no hanoin barak”, maibé nia no ninia laʼen kontinua halaʼo sira-nia atividade espirituál, no “la para atu harohan ho laran ba Jeová hodi husu ninia matadalan”. Durante tempu neʼe, família Moncada mós prepara atu Komemora Jesus nia mate hodi fahe konvite ba estudante Bíblia sira no lee Bíblia kona-ba Jesus nia loron ikus sira iha rai. Sira mós hola parte atu haklaken hodi hakerek karta no asiste reuniaun iha sira-nia kongregasaun liuhusi vídeo call. Irmán Moncada nia família naʼin-sia, neʼebé laʼós Testemuña, simu ninia konvite no asiste Memoriál iha língua Españól liuhusi vídeo call.

Irmán Moncada dehan: “Ami kontente loos hodi haree estudante Bíblia sira tuir reuniaun liuhusi sasán eletróniku, loloos, ida-neʼe la fasil ba sira”. Nia hatutan: “Ami hakfodak no kontente atu haree haʼu-nia família husi rai seluk mós liga hotu.”

Irmán Moncada hatutan tan: “Esperiénsia neʼe hanorin ami katak, maski ami-nia situasaun halo ami sente susar tebes, maibé dalan neʼebé diʼak liu atu tahan hasoru susar neʼe mak hodi badinas atu serbí Jeová, atu nuneʼe Jeová bele haraik bensaun mai ita.

Ita-nia maluk fiar-naʼin sira iha mundu tomak triste hamutuk ho sira neʼebé lakon família no maluk doben tanba pandemia neʼe, no ita sei kontinua halo orasaun ba sira. Ita hein namanas ba futuru bainhira Jeová sei halakon buat hotu neʼebé hamosu laran-susar, hanesan moras-peste, no bainhira nia sei fó moris-hiʼas ba ninia atan fiar-naʼin hotu neʼebé mate ona.—1 Korinto 15:21, 22.