Iha loron 28 Juñu 2023, projetu konstrusaun iha Ramapo, Novaiorke, Estadus Unidus Amerika simu lisensa importante. Membru hotu husi Komisaun Planeamentu ba Sidade Ramapo aprova planu ba projetu neʼe. Maski sei iha buat balu tan neʼebé presiza halo, maibé lisensa neʼe loke dalan atu kontinua projetu neʼe.

Buat neʼebé interese mak durante enkontru ho Komisaun Planeamentu, ema neʼebé hela iha área neʼe no autoridade sira la fó sai ideia neʼebé kontra projetu konstrusaun neʼe. Irmaun Keith Cady neʼebé serbí iha Komisaun ba Projetu Konstrusaun (KPK), hatete: “Antes hatama ami-nia planu konstrusaun ba komisaun neʼe, ami uza fulan balu atu prepara planu neʼe hodi kumpre regra hotu. Ami-nia objetivu mak atu halo fasil ba sira atu aprova ami-nia formuláriu.” Komisaun Planeamentu rekoñese katak irmaun sira hakaʼas an atu halo tuir regra hotu no membru hotu konkorda ho rezolusaun ida-idak kona-ba projetu neʼe. Irmaun David Soto neʼebé mós serbí iha KPK dehan: “Enkontru neʼe tomak la toʼo oras ida! Ami fó obrigadu ba Komisaun Planeamentu tanba serbisu makaʼas no apoia ami. Ami hein namanas atu serbisu hamutuk ho sidade Ramapo nia departamentu planeamentu iha futuru.”

Tanba lisensa foun neʼe, serbisu importante ba projetu iha Ramapo bele komesa. Irmaun Cady esplika: “Bainhira hamoos tiha ai-hun sira neʼebé tesi ona iha konstrusaun fatin, badaen sira bele komesa halo serbisu. Depois neʼe, ami sei presiza voluntáriu barak atu komesa serbisu iha tinan 2024 nia rohan. Ami hotu neʼebé asiste enkontru sente kontente tebes rona kona-ba lisensa neʼebé Komisaun Planeamentu fó tanba neʼe katak ita bele komesa serbisu lakleur tan.”

Nuʼudar organizasaun ida iha mundu tomak, ita agradese ba Jeová tanba aprova importante neʼe. Ita halo orasaun ba Jeová atu kontinua haraik bensaun ba sira hotu neʼebé hola parte iha projetu neʼe nuʼudar sira “prepara sira-nia an hodi halo serbisu diʼak neʼe”.—Neemias 2:18.