Iha loron 1 Outubru 2019 revista Matan-moris bá! fó sai ona durante tinan 100. Tinan-tinan ami print revista Matan-moris bá! hamutuk millaun 280 liu iha língua 211. Revista neʼebé tradús barak liu no fahe ba ema barak liu iha mundu tomak mak Livru Haklaken no segundu mak revista Matan-moris bá!

Irmaun Samuel Herd, membru ba Grupu Administradór hatete: “Revista Matan-moris bá! ajuda ona ema barak atu hatudu interese ba Bíblia nia mensajen tanba revista neʼe esplika kona-ba tópiku oioin. Maski durante tinan barak iha mudansa ba revista neʼe nia modelu, maibé revista neʼe nafatin ajuda ami halaʼo ami-nia serbisu haklaken. Ami kontente tebes tanba revista Matan-moris bá! fó sai ona durante tinan 100 no neʼe mós sai nuʼudar evidénsia katak Maromak ajuda ami liuhusi ninia espíritu santu.”

Foufoun, Testemuña ba Jeová fó sai revista The Golden Age durante reuniaun boot importante ida iha Cedar Point, Ohio, Estadus Unidus, iha fulan-Setembru 1919. Naran primeiru ba revista Matan-moris bá! mak The Golden Age. Iha tinan 1937 revista The Golden Age nia naran troka ba Consolation. Mudansa neʼe atu hatudu katak ema presiza hetan kmaan. Ikusmai, iha tinan 1946 revista neʼe nia naran troka ba Awake! (Matan-moris bá!) atu hatudu katak lee-naʼin sira presiza komprende saida mak Bíblia hatete kona-ba mundu nia situasaun.

Ami kontente tebes tanba revista Matan-moris bá! fó sai ona durante tinan 100 no ami sei kontinua uza revista neʼe iha serbisu edukasaun nian atu hanorin ema kona-ba Bíblia, no “fó sasin ho loloos ba liafuan diʼak”.—Apóstolu 20:24.