Foin daudaun, iha update ba Livru atu ajuda Testemuña ba Jeová buka informasaun neʼebé fó sai iha aplikasaun JW Library. Neʼe iha lista ba referénsia barak liután neʼebé esplika kona-ba eskritura sira.

Husi tempu neʼebé fó sai iha 2013, Livru atu buka informasaun inklui mós índise ba eskritura neʼebé iha referénsia husi publikasaun foun.

Durante tinan balu nia laran, publikasaun sira neʼebé tuan aumenta mós iha JW Library. Publikasaun barak neʼebé iha Watchtower BIBLIOTEKA ONLINE agora bele hetan iha aplikasaun neʼe. Update ba Livru atu buka informasaun neʼe inklui mós publikasaun tuan sira, hanesan Pemahaman Alkitab. Iha JW Library, Livru atu buka informasaun inklui liafuan husi referénsia ida-idak, atu nuneʼe Ita bele asesu maski la liga ba internét.

Update neʼe mós inklui referénsia sira iha livru Moris Haksolok ba Nafatin. Irmán ida naran Kari hatete: “Haʼu nakdedar bainhira haklaken liuhusi telefone, maibé haʼu hatene katak ema barak presiza simu kmaan. Dala ruma haʼu hanoin-hetan eskritura sira maibé presiza hetan ajuda atu hatoʼo iha dalan neʼebé simples, atu bele kontinua konversa neʼe. Haʼu sente kontente no iha konfiansa atu haklaken tanba haʼu bele hetan kedas eskritura no referénsia iha Livru atu buka informasaun, inklui lisaun sira husi livru Moris Haksolok ba Nafatin.”

Ami mós halo simples liután oinsá atu prodús Livru atu buka informasaun hodi nuneʼe bele halo iha língua barak liután. Irmaun ida naran Ivo neʼebé serbí iha sukursál Xile hatete: “Neʼe mak primeiravés ami halo Livru atu buka informasaun iha língua Mapudungun. Haʼu seidauk tradús livru hanesan neʼe, maibé ninia prosesu simples tebes. Irmaun-irmán sira hakfodak atu hetan publikasaun hanesan neʼe iha ami-nia língua. Sira nunka hanoin katak livru neʼe sei tradús iha língua kiʼik. Sira kontente tebes tanba bele uza livru neʼe atu estuda mesak, prepara komentáriu no diskursu sira.”

• Iha Bíblia, loke ba versíkulu neʼebé ita atu halo riset.

• Hili númeru ba versíkulu. Iha menu neʼebé mosu, hili sinál ba Livru atu buka informasaun. Se sinál neʼe la iha, neʼe katak la iha referénsia husi Livru atu buka informasaun neʼebé esplika kona-ba versíkulu neʼe.

Iha Livru atu buka informasaun sei tau uluk referénsia neʼebé foun liu. Se Ita presiza referénsia neʼebé tuan, muda tun no neʼe sei mosu. Ba eskritura sira neʼebé iha ona mudansa kona-ba ninia esplikasaun, referénsia foun liu mak fó sai esplikasaun neʼebé agora ita uza.