Hanesan fó sai ona iha notísias foun, iha loron-domingu, 29 Outubru 2023, bomba rabenta iha reuniaun boot neʼebé halaʼo iha sidade Kerela, iha Índia. Triste mak irmán naʼin-rua mate hanesan notísias fó sai ona, no depois labarik-feto neʼebé tinan 12 mós mate. Irmaun-irmán naʼin-55 hetan kanek, balu hetan kanek todan.

Agora daudaun, irmán naʼin-tolu no irmaun naʼin-rua baixa hela ho kondisaun grave. Autoridade sira hatete katak bomba tolu ka liu mak rabenta maizumenus tuku 9.40 dadeer durante orasaun atu loke reuniaun boot. Polísia kaer ona suspeitu ba akontesimentu aat neʼe no halaʼo daudaun investigasaun.

Ami agradese tebes ba bombeiru no ambulánsia sira neʼebé toʼo lalais atu ajuda, no mós ba doutór no serbisu-naʼin sira iha ospitál neʼebé tau matan ba sira neʼebé hetan kanek.

Sira neʼebé tuir reuniaun boot mós agradese tebes no hetan korajen hodi sente domin no apoia neʼebé maluk fiar-naʼin sira hatudu ba malu. Irmán ida neʼebé iha salaun bainhira bomba rabenta, dehan: “Haʼu halo kedas orasaun ba Jeová. Irmaun asistente sira no irmaun sira seluk tau matan didiʼak ba ami no hakaʼas an atu salva ami lalais. Sira-nia hahalok haleno Jeová nia domin no halo ami fiar katak Jeová hanoin ami ida-idak.”

Reprezentante husi sukursál Índia, katuas área sira, no katuas sira iha kongregasaun kontinua fó ajuda no kmaan husi Bíblia ba sira neʼebé hetan impaktu husi akontesimentu neʼe. Katuas ida husi sukursál neʼebé halo viajen ba Kerala atu fó kmaan ba irmaun-irmán sira, dehan: “Maski irmaun-irmán sira laran-kanek no trauma, maibé haʼu hetan laran-manas tanba irmaun sira neʼebé hetan kanek hatudu atitude neʼebé pozitivu. Haʼu koʼalia ho sira barak. Hodi haree oinsá mak sira tau fiar ba Jeová, neʼe hametin duni haʼu-nia fiar.”

Ita halo orasaun ba vítima sira-nia família no sira hotu iha Índia neʼebé hetan impaktu husi akontesimentu aat neʼe. Ita hetan kmaan no dame iha laran tanba Bíblia promete kona-ba futuru neʼebé la iha tan violénsia, terus no mate. Antes ida-neʼe sei sai loos, ita hakarak duni atu kontinua tau fiar tomak ba Jeová.—Salmo 56:3.