Tribunál Aas Liu Hotu iha Roma fó sai desizaun importante iha loron 30 Augusto 2019 kona-ba direitu atu tau matan ba labarik no direitu ba inan-aman. Desizaun husi tribunál aas liu iha rai-Itália neʼe tane aas inan ida nia direitu atu hanorin ninia fiar ba ninia oan neʼebé sei kiʼik hela. No inan neʼe mak Testemuña ba Jeová.

Labarik nia aman neʼebé laʼós Testemuña no haketak malu ona ho labarik neʼe nia inan, dehan katak labarik neʼe tenke simu hanorin tuir deʼit aman nia fiar. Tribunál rua neʼebé kiʼik apoia aman neʼe nia hanoin. Sira dehan katak hanorin relijiaun seluk ba oan bele halo oan sai “bilán”. Desizaun neʼe hanetik inan nia direitu atu hanorin ninia fiar ba ninia oan. Tribunál Aas Liu Hotu anula desizaun husi tribunál kiʼik no konfirma katak inan no aman bele hanorin sira-nia oan kona-ba sira ida-idak nia fiar. Tribunál neʼe mós dehan katak relijiaun hotu “iha igualdade iha lei nia oin” no kondena hahalok “la justu” neʼebé tribunál kiʼik hatudu ba Testemuña ba Jeová. Tribunál mós deside katak se inan no aman la konkorda malu kona-ba edukasaun relijiaun nian ba sira-nia oan, juís la iha direitu atu deside relijiaun ida-neʼebé mak diʼak liu.

Ita hein katak tribunál nia desizaun neʼe sei sai nuʼudar ezemplu ba desizaun seluk iha futuru iha rai-Itália kona-ba direitu atu tau matan ba oan. Klaru katak ida-neʼe lori benefísiu ba inan no aman neʼebé hakaʼas an atu haboot oan “ho dixiplina no hanorin neʼebé tuir Jeová nia hakarak”.—Éfeso 6:4.