Irmaun Giandomenico Gullà, mak doutór ida neʼebé serbisu iha ospitál Erba iha Como, Itália. Nia hasoru difikuldade barak tanba pandemia COVID-19. Maski nuneʼe, ninia fiar halo nia sente dame iha nia neon. No rezultadu mak nia bele fó kmaan fali ba ema seluk. (2 Korinto 1:4) Ita bele haree ida-neʼe husi esperiénsia balu neʼebé nia konta liuhusi entrevista ho Departamentu informasaun ba públiku iha sukursál Itália.

Tuirmai neʼe mak entrevista neʼebé halo ho irmaun Giandomenico, entrevista neʼe hadiʼa ona uitoan atu bele klaru liután.

Ita bele konta ba ami situasaun saida deʼit mak Ita hasoru durante pandemia neʼe?

Giandomenico Gullà: Iha ospitál neʼebé haʼu serbisu bá, buat hotu akontese derrepente deʼit, hanesan tsunami. Ospitál nia laran tomak presiza organiza fali atu halo departamentu sira neʼebé atende deʼit ba pasiente sira neʼebé kona COVID-19. Iha situasaun triste neʼe nia laran, pasiente sira presiza halo izolamentu no labele hasoru sira-nia família no belun sira. Entaun haʼu mak ida neʼebé presiza kontaktu sira-nia família liuhusi telefone atu fó-hatene kona-ba sira-nia kondisaun. Momentu ida, iha kalan boot, haʼu tenke fó-hatene ba pasiente nia oan-mane ida katak ninia aman besik mate ona. Entaun haʼu uza haʼu-nia telefone atu halo vídeo call. Neʼe ajuda nia atu haree ninia apá ba dala ikus, maski ninia apá la book an ona. Neʼe mak tempu neʼebé triste tebes.

Oinsá mak Bíblia fó kmaan ba Ita?

GG: Haʼu haree katak haʼu-nia kolega serbisu balu dala barak sente estrese tebes. Maibé estuda Bíblia mesak ajuda tebes haʼu atu nafatin sente dame iha laran. Haʼu bele haree ho klaru katak Jeová prepara ona ita atu hasoru tempu susar sira hanesan neʼe. Mai haʼu, pandemia ida-neʼe hanesan prova seluk tan katak Bíblia nia profesia sira sai loos daudaun. No neʼe ajuda haʼu atu la sente estrese demais. Neʼe hametin tebes haʼu-nia fiar.

Oinsá mak kmaan neʼebé Ita simu husi Jeová ajuda Ita hodi fó kmaan fali ba ema seluk?

GG: Haʼu sente duni Ninia espíritu neʼebé forsa boot tebes, neʼe ajuda haʼu atu fó kmaan ba haʼu-nia família no mós ba ema iha serbisu fatin, no haʼu mós bele ajuda irmaun-irmán sira neʼebé hasoru susar ho pandemia neʼe.

Bele esplika oinsá mak Jeová ajuda Ita atu fó kmaan ba Ita-nia família?

GG: Maski haʼu presiza serbisu oras barak liután iha ospitál, haʼu hakaʼas an atu nafatin halo adorasaun ho haʼu-nia família. Haʼu haree katak neʼe hametin tebes haʼu-nia feen nia fiar. Ami sente unidade liu. Ami-nia adorasaun família nian mós ajuda haʼu atu fó kmaan ba ami-nia oan-feto, Ginevra, neʼebé besik tinan tolu. Ami hatene nia mós sente hanoin barak kona-ba neʼe tanba nia hatete: “Haʼu lakohi apá ba serbisu tanba iha neʼebá mak iha coronavirus” ka “Haʼu taʼuk apá sei la fila fali”. Atu halo nia sente kalma, ami loke knananuk husi Broadcasting, no neʼe halo nia oin-midar kedas.

Bele fó ezemplu ida kona-ba oinsá mak Ita fó kmaan ba Ita-nia maluk serbisu-naʼin sira?

GG: Kolega ida neʼebé serbisu iha haʼu-nia departamentu foin lalais komesa estuda Bíblia. Haʼu hasoru nia tinan balu liubá iha ospitál neʼebé uluk haʼu serbisu, no ami koʼalia hamutuk kona-ba Bíblia. Nia foin komesa estuda antes pandemia neʼe mosu no nia deside atu kontinua estuda. Agora daudaun, ami kontinua estuda liuhusi vídeo call, dala ruma semana ida dala rua. Haʼu kontente tebes kuandu nia dehan: “Estuda Bíblia ajuda haʼu atu iha moris neʼebé diʼak liu. Haʼu la hanoin barak demais. Haʼu aprende resposta barak ba pergunta sira hanesan tanbasá mak ita iha no tanbasá mak pandemia akontese. Tanba haʼu-nia fiar sai boot liután, neʼe hametin haʼu no fó esperansa ba haʼu-nia futuru.”

Oinsá mak Ita fó kmaan ba irmaun-irmán sira iha kongregasaun?

GG: Triste katak irmán ida husi haʼu-nia kongregasaun [irmán Daniela Sgreva] kona moras COVID-19 no presiza lori ba ospitál. Haʼu kontaktu irmaun naʼin-rua neʼebé iha ambulánsia, no ami arranja kona-ba transporte. Irmaun sira halo viajen kilómetru 50 atu bele bá foti nia. Nia kontente tebes kuandu haree sira! Kuandu irmán neʼe toʼo iha ospitál ho situasaun susar neʼe, nia hetan kmaan fali kuandu ami hasoru nia iha sala emerjénsia. Haʼu fó benvindu ba nia no tanba ami naʼin-tolu serbisu nuʼudar médiku, nia iha irmaun sira neʼebé haleʼu no besik nia! Hodi hanoin kona-ba domin no apoiu neʼebé nia simu husi irmaun-irmán sira, neʼe hametin tebes nia. Ho agradese boot, nia dehan: “Haʼu hatene Jeová komprende ita, maibé iha tempu ida-neʼe, nia halo liu fali buat neʼebé haʼu espera!”

Loroloron, haʼu sadere liután ba Jeová no ninia forsa. Kuandu haʼu ba ka fila serbisu ho haʼu-nia karreta, haʼu rona knananuk sira husi Broadcasting, atu bele fó haʼu forsa ba loron neʼe. Haʼu fó obrigadu ba Jeová ba ninia ajuda hotu, no nuʼudar haʼu rona ba knananuk Jeová sempre hamutuk ho ita, haʼu repete ba haʼu-nia an: “Jeová sempre hamutuk haʼu. Kaer haʼu liman; no hanorin haʼu; haʼu sei halo tuir.”