4 OUTUBRU 2022
JAPAUN
Sukursál Japaun prodús revista no livru sira ba tinan 50 ona
Iha tinan 2022, sukursál Japaun prodús revista no livru sira ba tinan 50 ona.
Husi tinan 1950 toʼo 1969, irmaun-irmán sira iha Japaun halaʼo serbisu haklaken ho badinas hodi hetan ajuda husi misionáriu maizumenus naʼin-70 no rezultadu mak Testemuña ba Jeová aumenta barak liután. Sira presiza livru no revista barak liután, tan neʼe Maromak nia organizasaun deside atu sukursál Japaun hahú print Livru Haklaken no Matan-moris bá!.
Iha Outubru 1969, durante Reuniaun Boot Internasionál ho tema “Dame iha mundu” neʼebé halaʼo iha Tokyo, irmaun Nathan H. Knorr fó sai katak sukursál foun sei harii iha sidade Numazu, besik Foho Fuji, no sei loke fábrika atu print livru sira.
Irmaun sira halo preparasaun ba print iha Betel iha Numazu
Projetu konstrusaun hahú iha Janeiru 1972. Iha Agostu 1972, sira iha ona mákina print neʼebé todan tonelada 40, no mós mákina atu prepara besi belar atu print, mákina atu suku no tesi livru sira. Ikusmai iha 8 Outubru 1972, sira print revista primeiru Matan-moris bá! iha lian Japaun iha sukursál foun. Irmaun ida neʼebé uluk serbisu ho mákina sira-neʼe hanoin-hetan kona-ba tempu neʼebá no hatete: “Haʼu haksolok tebes toʼo matan-been suli bainhira haree kaixa barak nakonu ho revista sira neʼebé foin print no prontu atu haruka ba fatin oioin.”
Iha tinan 1982, sukursál Japaun muda fali ba edifísiu foun iha sidade Ebina. Sukursál foun neʼe boot maizumenus dala tolu liu fali sukursál iha Numazu, no uza mákina print no mákina atu prodús livru sira lalais liu. Toʼo tempu neʼebá sira print deʼit revista sira, maibé sira mós komesa prodús Bíblia Sagrada Tradusaun Mundu Foun. Sira mós komesa prodús livru sira kona-ba Bíblia iha língua 200 liu.
Ita-nia irmaun sira halo serbisu ho mákina boot atu print livru sira iha Ebina, Japaun
Ohin loron, sukursál Japaun prodús Livru Haklaken no Matan-moris bá! hamutuk 13.200.000 kada fulan. Husi tinan 2013, sira mós prodús ona Bíblia hamutuk 20.000.000 liu iha língua 100 liu no haruka ba nasaun 50 liu iha mundu tomak.
Iha tinan 1972, maizumenus ema naʼin-13.000 mak haklaken kona-ba Maromak nia Ukun iha Japaun. Maibé liutiha tinan 50, iha tinan 2022, númeru neʼe aumenta toʼo 213.000. Ita kontente tanba fábrika atu print apoia duni serbisu haklaken iha Japaun no mós iha mundu tomak.—Mateus 28:19, 20.