Iha loron 12 Maiu 2023, Tribunál rekursu iha rai-Kénia foti desizaun importante neʼebé proteje alunu nia liberdade atu adora Maromak iha rai neʼe. Rai-Kénia iha ona lei neʼebé dehan katak labele obriga ema atu halo buat ruma neʼebé kontra sira-nia fiar. Maibé husi tinan 2015 toʼo agora, labarik sira husi Testemuña ba Jeová naʼin-41 neʼebé eskola hasai tanba sira lakohi partisipa iha atividade neʼebé relijiaun seluk mak halo.

Tribunál Rekursu nia desizaun neʼe liga ho buat ida neʼebé akontese iha tinan 2017. Alunu Testemuña naʼin-sia ho respeitu fó sai katak sira lakohi partisipa iha atividade relijiaun seluk nian iha eskola. Ikusmai, kazu neʼe lori ba tribunál. Iha tinan 2019, tribunál kiʼik foti desizaun katak eskola la kontra labarik Testemuña nia direitu umanus bainhira obriga labarik sira atu partisipa iha atividade relijiaun seluk nian. Maibé, iha loron 12 Maiu 2023, Tribunál Rekursu iha rai-Kénia fó sai katak tribunál kiʼik nia desizaun neʼe “kontra [alunu] nia direitu atu hetan edukasaun no direitu atu hetan respeitu”. Tribunál Rekursu mós fó sai katak regra neʼebé obriga Testemuña ba Jeová atu tuir atividade relijiaun nian mak “halo diskriminasaun, kontra konstituisaun no la vale”. Juís ida neʼebé tau matan kazu neʼe hakerek: “Tribunál nia desizaun neʼe sai matadalan ba eskola sira iha futuru bainhira halo desizaun neʼebé liga ho alunu nia direitu relijiaun nian.”

Desizaun neʼe hametin liután matadalan neʼebé Ministériu Edukasaun fó sai iha fulan-Marsu 2022. Matadalan neʼe fó sai katak eskola sira tenke respeitu alunu hotu nia direitu relijiaun nian. Laʼós rai-Kénia deʼit, nasaun barak iha Áfrika mós foti desizaun neʼebé proteje alunu Testemuña nia direitu umanus, inklui rai-Malavi no rai-Ruanda.

Joven sira neʼebé hatudu aten-brani iha rai-Kénia no iha mundu tomak bele fiar katak Jeová sente orgullu bainhira sira hamriik metin ba adorasaun neʼebé loos!—Provérbios 29:25.