Iha 8 Dezembru 2022, Tribunál Distritu Gwangju iha Koreia Súl sei konsidera kazu neʼebé envolve irmaun Hye-min Kim neʼebé la simu serbisu militár tanba ninia konxiénsia. Irmaun Hye-min mak ema primeiru neʼebé la simu serbisu sivíl alternativu (ACS) tanba nia sente ida-neʼe hanesan kastigu. Posibilidade mak nia tenke tama komarka ba fulan 36 no tama iha lista kriminál.

Períodu ba ACS iha Koreia Súl mak fulan 36, neʼe mak naruk liu fali nasaun barak iha mundu tomak, no mós naruk dala rua liu fali tempu ba serbisu militár. Durante tinan tolu neʼe, sira neʼebé la simu serbisu militár tanba sira-nia konxiénsia tenke hela iha asrama iha prizaun laran, no sira-nia liberdade mós limitadu tebes. Tan neʼe, matenek-naʼin barak iha nasaun seluk hatete katak neʼe mak hanesan “kastigu alternativu”, a laʼós serbisu sivíl alternativu ba ema neʼebé la simu serbisu militár.

Iha 28 Juñu 2018, Tribunál Konstituisaun iha Koreia Súl foti desizaun importante hodi rekoñese katak Konstituisaun Koreia proteje direitus husi ema neʼebé la simu serbisu militár tanba sira-nia konxiénsia, no fó avizu ba lejizladór sira neʼebé toma konta ba ACS: “Se durasaun ba ACS mak kleur no todan demais toʼo halo ema sente susar atu hili, ACS sei la kumpre ninia objetivu no sai hanesan deʼit ho kastigu. Neʼe kontra direitus importante seluk.”

Iha tinan 1998, Komisaun Nasoins Unidas ba Direitus Umanus halo rezolusaun hodi fó sai standar internasionál ba serbisu sivíl alternativu. Tuir rezolusaun neʼe, nasaun sira neʼebé iha serbisu militár obrigatóriu tenke arranja serbisu sivíl alternativu ba ema neʼebé la simu serbisu militár hodi tuir sira-nia konxiénsia. Serbisu alternativu neʼe tenke “fó benefísiu ba povu no labele sai hanesan kastigu”.

Neʼe laʼós primeiravés ba irmaun Hye-min atu hetan akuzasaun. Iha Setembru 2020, Tribunál Aas Liu iha Koreia Súl fó sai katak irmaun Hye-min la sala bainhira nia la simu serbisu militár tanba ninia konxiénsia. Semana balu liu tiha, nia rejistu ninia naran atu tuir programa ACS. Nia tenke hein toʼo sira bolu nia iha 7 Fevereiru 2022. Maibé, bainhira nia haree katak programa ACS mak hanesan kastigu, nia deside atu la tuir programa neʼe.

Se tribunál konkorda ho irmaun Hye-min nia desizaun, karik governu sei presiza halo mudansa ba programa ACS hodi la kontra standar internasionál. Se iha mudansa ba programa ACS, neʼe sei lori benefísiu laʼós deʼit ba ita-nia irmaun sira iha Koreia Súl no sira-nia família, maibé mós ba sidadaun Koreia hotu. Nuʼudar ita hein, ita halo orasaun ba irmaun-irmán hotu neʼebé hetan impaktu husi kazu neʼe, atu sira kontinua sadere ba Jeová. Ita fiar katak Jeová sei ajuda duni sira atu “tahan buat hotu ho pasiénsia no ksolok”.—Koloso 1:11.