Iha data 6 Fevereiru 2020, iha sidade Orenburg, Rúsia, guarda husi komarka Penál Kolónia No. 1 baku makaʼas ita-nia irmaun naʼin-lima, irmaun Aleksey Budenchuk, Gennadiy German, Roman Gridasov, Feliks Makhammadiyev, no Aleksey Miretskiy. Rezultadu mak irmaun Feliks Makhammadiyev presiza hetan tratamentu iha ospitál tanba ninia ruin-knosen tohar no ida-neʼe sona fali ninia pulmaun no ninia rins mós kanek. Depois guarda baku tiha irmaun sira, sira hatama irmaun Aleksey Budenchuk, Gennadiy German, Roman Gridasov, no Aleksey Miretskiy ba sela kastigu nian ho razaun neʼebé sira inventa katak irmaun sira-neʼe fuma sigarru. Maibé Testemuña ba Jeová la fuma ka hafoʼer sira-nia isin ho buat neʼebé la moos.

Iha data 19 Setembru 2019, Juís Dmitry Larin husi Tribunál Distritál Leninsky iha sidade Saratov, Rúsia fó sai liuhusi relatóriu ida katak irmaun naʼin-lima, hamutuk ho irmaun Konstantin Bazhenov tenke tama komarka. Irmaun sira-neʼe presiza sai dadur ba tinan rua ka ba tinan tolu ho balu. Iha data 20 Dezembru 2019, Tribunál Distritál Saratov nafatin deside atu la fó livre ba ita-nia irmaun sira. Semana balu liu tiha, guarda sira lori irmaun naʼin-neen ba fali prizaun. Maibé sira haruka irmaun Konstantin Bazhenov bá komarka Penál Kolónia No. 3 iha área Ulyanovsk, entaun nia la hamutuk ho irmaun seluk neʼebé hetan baku makaʼas husi guarda sira iha Penál Kolónia No. 1.

Iha data 6 Fevereiru 2020, irmaun naʼin-lima neʼebé toʼo iha Penál kolónia No. 1, hetan kedas baku husi guarda sira. Sira la hetan tratamentu, toʼo loron tuirmai doutór deskobre katak irmaun Feliks Makhammadiyev isin-manas makaʼas no mii raan. Antes administrasaun ba prizaun bolu ambulánsia, sira obriga irmaun Feliks atu asina dokumentu ida neʼebé deklara katak nia “monu iha hariis-fatin tanba namdoras”. Irmaun Feliks baixa no hetan operasaun, doutór sira hatama mangeira ba ninia pulmaun atu raan foʼer bele sai. Teste médiku mós hatudu katak irmaun Feliks nia saúde sai aat tanba hamlaha, irmaun Feliks iha moras selíaka no nia presiza han hahán neʼebé diʼak, maibé administrasaun ba prizaun la fó hahán neʼebé loos tuir ninia moras.

Ita hanoin tebes ita-nia irmaun sira iha Rúsia neʼebé ho laran-metin, nafatin tahan hasoru susar oioin no hahalok la justisa iha komarka. Ita fiar katak Jeová sei kontinua apoia sira atu bele kontinua tahan ho laran-metin.​—Filipe 1:27, 28.