Iha 9 Dezembru 2022, Sekretáriu Jerál husi Konsellu Europa (COE) haruka karta ba Ministériu Negósiu Estranjeiru iha Rúsia atu ezije Rúsia halo tuir desizaun sira neʼebé Tribunál Europeu ba Direitus Umanus (ECHR) fó sai ona. Neʼe inklui desizaun importante katak Rúsia kontra lei hodi bandu Testemuña ba Jeová. a

Karta neʼe fó-hanoin ba Rúsia katak maski sira laʼós tan membru husi COE dezde Marsu 2022, maibé governu Rúsia iha obrigasaun atu halo tuir desizaun sira neʼebé ECHR halo ona antes 16 Setembru 2022. Karta neʼe mós fó avizu katak Komisaun Ministru husi COE sei haree beibeik se Rúsia sei halo tuir Tribunál Europeu nia desizaun ka lae.

Husi Juñu 2022, Komisaun ezije Rúsia atu kansela Tribunál Aas Liu nia desizaun iha tinan 2017 kona-ba bandu Testemuña ba Jeová nia atividade relijiaun nian. Komisaun neʼe mós ezije Rúsia “atu konsidera fali sira-nia desizaun katak Testemuña ba Jeová mak organizasaun neʼebé fanátiku liu . . . , atu hapara prosesu hasoru Testemuña ba Jeová sira no hasai sira husi komarka, atu halakon rezultadu aat hotu neʼebé sira hetan tanba sai kriminozu, no mós fó fali propriedade neʼebé autoridade sira prenda, ka selu kompensasaun.” b

Toʼo agora, tanba Rúsia bandu Testemuña sira, neʼe hamosu ona problema hanesan kazu legál hasoru irmaun-irmán naʼin-660 liu, neʼebé halaʼo moris ho dame hodi tuir sira-nia fiar. Sira naʼin-360 liu mak tama ona komarka, no husi sira naʼin-360, naʼin-114 mak iha hela komarka ka hein hela iha sela atu hetan tesi-lia.

Iha irmaun-irmán naʼin-450 liu mak sira-nia naran tama ona iha lista federál Rúsia nuʼudar terrorista no ema neʼebé fanátiku demais, no neʼe lori susar ba sira no sira-nia família. Lista neʼe fó sai ba públiku no neʼe halo sira hetan reputasaun neʼebé la diʼak, no sira barak labele hetan serbisu. Susar seluk neʼebé sira hasoru mak labele asesu ba sira-nia konta bankária, hanaruk sira-nia asuransi, faʼan sira-nia propriedade, halo investimentu, simu liman-rohan, ka maski sosa sim card deʼit mós labele.

Ami kontente atu hatene katak COE kontinua buka justisa ba ita-nia irmaun-irmán sira iha Rúsia. Iha tempu neʼebé hanesan, ita hotu iha mundu tomak kontinua hetan anima liuhusi reportajen sira iha jw.org kona-ba oinsá mak irmaun-irmán sira iha Rúsia hatudu fiar, aten-brani, no kontente tanba Jeová nia ajuda.—Filipe 1:12-14.