Iha loron 22 Fevereiru 2022, Tribunál Europeu ba Direitus Umanus fó sai desizaun rua neʼebé apoia Testemuña ba Jeová naʼin-15. Kazu neʼe inklui violénsia neʼebé autoridade sira halo ba irmaun-irmán sira bainhira sira revista irmaun-irmán sira-nia uma entre tinan 2010 no 2012. Desizaun rua neʼe hatudu katak governu Rúsia halo violasaun ba irmaun-irmán sira-nia direitu no liberdade kona-ba relijiaun. Governu Rúsia tenke selu multa hamutuk dolar 112.323. No neʼe mak desizaun ikus.

Desizaun rua neʼe envolve kazu neen hasoru governu Rúsia. a Irmaun-irmán sira-nia advogadu esplika katak autoridade sira iha Rúsia kontra lei kuandu sira revista uma sira no Reuniaun-Fatin ida, obriga irmán naʼin-rua atu hasai roupa durante investigasaun no mós hadau sasán sira. Iha kazu balu, polísia FSB neʼebé lori kilat no uza masker ameasa ita-nia irmaun-irmán sira.

Advogadu internasionál ba direitu umanu naran André Carbonneau neʼebé ajuda ekipa legál ba kazu sira-neʼe esplika katak desizaun rua neʼe “mak importante tebes atu prova katak governu Rúsia kontra lei hodi tama arbiru ba Testemuña ba Jeová nia uma, neʼe akontese dala 1.700 husi tempu neʼebé governu Rúsia bandu Testemuña ba Jeová iha tinan 2017. Agora, se autoridade tama arbiru ba ema ida nia uma tanba deʼit ema neʼe mak Testemuña ba Jeová, sira kontra lei Konvensaun Europeu. Tribunál mós fó sai katak autoridade Rúsia halo sala tanba hanetik Testemuña sira atu haklaken husi uma ba uma. Neʼe hatudu katak Tribunál Europeu haree serbisu haklaken nuʼudar atividade relijiaun nian, no governu la iha direitu atu hanetik ida-neʼe.”

Maski desizaun rua neʼe la koʼalia kona-ba oinsá governu Rúsia fó terus ba Testemuña ba Jeová iha rai-Rúsia, maibé ida-neʼe loke dalan ba tribunál atu foti desizaun iha aban-bainrua kona-ba governu bandu ita-nia organizasaun nia atividade. Agora daudaun, iha tan kazu 60 iha Tribunál Europeu neʼebé envolve Testemuña ba Jeová iha Rúsia. Ita hein katak desizaun rua neʼe bele sai nuʼudar ezemplu ba Tribunál bainhira halo desizaun seluk iha aban-bainrua.

Ita hotu kontente atu haree autoridade sira ba direitu umanu rekoñese katak ita-nia irmaun-irmán iha Rúsia mak laran-metin. Desizaun sira-neʼe hatudu katak Jeová haraik bensaun ba ema neʼebé hakaʼas an atu defende ninia naran no apoia ninia direitu atu ukun.—Salmo 26:11.