Iha loron 7 Juñu 2022, Tribunál Europeu ba Direitus Umanus (ECHR) fó sai julgamentu a hasoru governu Rúsia tanba fó-terus ba Testemuña ba Jeová. ECHR fó sai katak Rúsia la tuir lei hodi bandu Testemuña ba Jeová iha tinan 2017, no bandu Testemuña nia publikasaun sira no website jw.org. ECHR haruka Rúsia atu hapara kazu hotu hasoru irmaun-irmán sira no hasai Testemuña hotu husi komarka, no fó orden ba Rúsia atu fó fali Testemuña nia rai no propriedade hotu neʼebé sira hadau ona ka selu dolar US $63.684.978 (euro 59.617.458) hodi taka buat neʼebé sira hadau. ECHR mós haruka Rúsia atu selu osan dolar US $3.682.445 (euro 3.447.250) ba Testemuña sira nuʼudar kompensasaun.

Julgamentu neʼe temi kazu 20 husi tinan 2010 toʼo 2019, neʼebé envolve ema no organizasaun legál hamutuk 1.400 liu. Maibé, julgamentu neʼebé ECHR halo neʼe afeta ema barak liután. Julgamentu neʼe fó sai katak Rúsia “tenke hapara kazu kriminál hotu neʼebé prosesu daudaun hasoru Testemuña ba Jeová . . . no fó fali liberdade ba Testemuña ba Jeová hotu”. (Letra metan husi ami.) Julgamentu neʼe fó prova katak ita-nia irmaun-irmán hotu iha Rúsia no iha fatin seluk mak sidadaun neʼebé halo tuir lei, maibé hetan akuzasaun neʼebé la loos no tama komarka.

Liuhusi julgamentu neʼe, ECHR fó sai ho klaru katak Rúsia halo akuzasaun neʼebé la loos kona-ba ita-nia atividade, fiar, publikasaun, no website, hodi dehan katak ita mak organizasaun neʼebé fanátiku liu. Porezemplu, haree toʼok pontu balu tuirmai:

• Asaun: ECHR fó sai katak tribunál Rúsia “la iha prova kona-ba Testemuña nia liafuan, hahalok, ka atividade neʼebé hatudu sai violénsia, odi ka diskriminasaun”. (§271)

• Fiar katak Testemuña ba Jeová iha lia-loos: “Ho dame no la obriga ema, halo ema seluk komprende tanbasá sira-nia relijiaun mak diʼak liu no anima ema atu husik ‘relijiaun falsu’ no tuir ‘relijiaun loos’ mak dalan legál atu uza liberdade kona-ba relijiaun no liberdade atu koʼalia.” (§156)

• Transfuzaun raan: “Desizaun atu la simu transfuzaun raan mak dalan ida atu uza ema ida-idak nia liberdade atu hili, no ninia direitu atu halo desizaun pesoál kona-ba ninia saúde, neʼebé hetan protesaun husi Konvensaun direitu umanus nian no Rúsia nia lei.” (§165)

• La tama militár tanba razaun konxiénsia: “Hanorin relijiaun nian atu la tama militár la kontra Rúsia nia lei ida.” (§169)

• Ita-nia publikasaun: “Testemuña nia atividade relijiaun no buat neʼebé fó sai iha sira-nia publikasaun sempre haleno dame neʼebé tuir sira-nia doutrina kona-ba la halo violénsia.” (§157)

• Website JW.ORG: ECHR dehan katak jw.org la fó sai informasaun neʼebé fanátiku demais. Se autoridade hakarak protesta informasaun balu iha website neʼe, sira presiza husu organizasaun neʼe atu hasai deʼit parte neʼebé sira protesta duké bandu website neʼe tomak. (§231 no §232)

Julgamentu neʼe kritika makaʼas autoridade Rúsia no dehan katak sira todan ba sorin, halo diskriminasaun, no “la hatudu hahalok laran-moos”. (§187) Porezemplu haree toʼok kona-ba pontu balu tuirmai:

• “Autoridade Rúsia obriga Testemuña ba Jeová atu taka sira-nia organizasaun relijiozu hotu iha Rúsia laʼós tanba razaun legál. Evidénsia hatudu katak autoridade sira iha Rúsia halo diskriminasaun hodi tesi-lia hasoru Testemuña ba Jeová nia atividade relijiozu no hakarak halo sira husik tiha sira-nia fiar no hapara ema seluk atu labele tuir sira-nia fiar.” (§254)

• Autoridade Rúsia “falta duni atu halo prosesu neʼebé loos”. Porezemplu Tribunál Aas Liu iha Rúsia fiar ba informasaun husi polísia no ema neʼebé fó-terus ba Testemuña duké ezamina rasik Testemuña nia publikasaun hodi la todan ba sorin. (§203)

• Rúsia nia lei kona-ba ema nia ideia no hahalok neʼebé fanátiku liu la fó sai ho klaru. Neʼe loke dalan ba autoridade sira atu kontra hasoru Testemuña ba Jeová hodi tuir deʼit sira-nia hakarak. (§272)

Ita la hatene oinsá julgamentu husi ECHR neʼe sei afeta situasaun iha Rúsia. Maibé, ita la sadere ba autoridade sira-nia ajuda atu tahan susar oioin. Duké halo nuneʼe, ita “hein nafatin ba Jeová” tanba “nia mak ita-nia ajuda-naʼin no ita-nia eskudu”.—Salmo 33:20.