Iha 13 Agostu 2019 Tribunál Rekursu iha sidade Kirov fó orden atu husik livre irmaun Andrey Suvorkov neʼebé idade 26 husi dadur uma nian. Maski irmaun Suvorkov hetan liberdade uitoan, maibé kazu kriminál neʼe sei halaʼo hela.

Uluk ami fó sai ona katak, iha 9 Outubru 2018, polísia kaptura irmaun Suvorkov hamutuk ho ninia padrastu no irmaun naʼin-tolu seluk. Iha momentu neʼebá, polísia lokál hamutuk polísia espesiál neʼebé tau masker ataka derrepente Testemuña nia uma hamutuk 19.

Irmaun Suvorkov konta fali buat neʼebé akontese bainhira polísia revista ninia uma: “Sira foti ami-nia sasán barak neʼebé folin-boot. Maibé haʼu no haʼu-nia feen la hanoin barak kona-ba neʼe tanba ami sempre halaʼo moris neʼebé simples no la hanoin demais kona-ba ami-nia sasán. Mateus 6:21 dehan: ‘Iha fatin neʼebé ó rai ó-nia rikusoin, ó-nia fuan mós sei hela iha neʼebá.’ Matadalan neʼe ajuda ami atu kalma nafatin.”

Depois neʼe, polísia loke kazu kriminál hasoru irmaun Suvorkov, ninia padrastu, no irmaun naʼin-tolu seluk tanba sira kanta knananuk adorasaun nian, estuda livru kona-ba Bíblia, no iha Bíblia Sagrada Tradusaun Mundu Foun iha lian Rusu. Polísia hatama sira iha komarka temporáriu durante tempu neʼebé sira hein ba tribunál atu foti desizaun hodi husik sira livre ka hatama sira iha komarka antes halaʼo sira-nia kazu.

Irmaun Suvorkov esplika tan: “Ba kalan rua haʼu iha komarka temporáriu. Haʼu halo orasaun la para. Haʼu fiar metin katak Jeová rona no apoia haʼu. Haʼu hanoin-hetan melodia husi knananuk adorasaun nian no kanta. Haʼu dekór ona knananuk 50 liu.”

Tribunál foti desizaun atu hatama irmaun Suvorkov no sira seluk iha komarka antes halaʼo sira-nia kazu iha tribunál. Durante semana primeiru iha komarka, irmaun Suvorkov hakaʼas an atu ajuda ema seluk. Nia dehan: “Haʼu deside atu temi irmaun sira-nia naran iha orasaun no mós hakerek karta hodi fó laran-manas ba ema sira neʼebé haʼu hanoin-hetan sira-nia enderesu. Neʼe halo haʼu kontente tebes.”—Apóstolu 20:35.

Liutiha fulan balu, governu muda irmaun hotu husi komarka hodi sira sai dadur iha uma, só deʼit irmaun Andrzej Oniszczuk mak nafatin iha komarka laran. Irmaun Suvorkov mak irmaun primeiru neʼebé sai livre husi dadur iha uma.

Irmaun Suvorkov hatete: “Kuandu haʼu hanoin kona-ba buat neʼebé akontese ona, haʼu kontente katak haʼu iha ona esperiénsia kona-ba tama komarka. . . . Haʼu la hatene saida mak sei akontese iha futuru no karik haʼu sei tama fali komarka. Maibé haʼu fiar metin katak haʼu sei simu ajuda husi Jeová no ninia organizasaun maski haʼu iha komarka laran. Kona-ba tama komarka, haʼu la taʼuk ida.”