Projetu konstrusaun no renovasaun iha sukursál Tailándia komesa iha tinan 2019 hodi hetan ajuda husi voluntáriu lokál no internasionál. Maski nuneʼe, kuandu pandemia COVID-19 komesa, husi voluntáriu internasionál naʼin-50, só ema naʼin-8 deʼit mak kontinua serbisu no restu tenke fila ba sira-nia nasaun. Bainhira governu hamenus restrisaun ba COVID-19, projetu bele laʼo fali. Sukursál konvida voluntáriu lokál barak liután atu hetan treinu no ajuda halo hotu projetu neʼe. Serbisu ikus husi projetu neʼe remata iha loron 30 Abríl 2023.

Irmaun Setthasat Tawansirikul no ninia feen Waraporn mós hola parte nuʼudar voluntáriu lokál. Foufoun sira hanoin barak tanba sira ladún iha esperiénsia. Setthasat hatete: “Bainhira ami toʼo iha neʼebá, ami simu treinamentu neʼebé diʼak loos.”

Irmaun-irmán sira neʼebé hola parte iha projetu neʼe sente kontente tebetebes, no neʼe book sira atu oferese sira-nia an atu halaʼo serbisu tempu-tomak seluk tan. Sira balu agora hola parte iha projetu konstrusaun iha área oioin neʼebé sukursál Tailándia mak tau matan. Irmán ida tuir Eskola ba Haklaken-Naʼin Tempu-Tomak. Sira seluk agora serbí iha Betel. Irmaun Rapeepat Woradetsakul neʼebé foin tama Betel hatete: “Simu Jeová nia ajuda durante projetu konstrusaun fó haʼu konfiansa neʼebé haʼu presiza atu simu konvite hodi serbí iha Betel. Haʼu fiar metin katak Jeová sei ajuda haʼu ho knaar foun neʼe.”

Projetu konstrusaun no renovasaun iha sukursál Tailándia inklui halo renovasaun ba hela-fatin no eskritóriu, harii fatin ba manutensaun no armazén, no hadiʼa karreta para fatin. Laʼós neʼe deʼit, sukursál mós sosa no renova apartamentu neen neʼebé besik sukursál atu uza nuʼudar hela-fatin ba família Betel.

Ami kontente tebes katak irmaun-irmán sira iha Tailándia fó sira-nia an atu halo Jeová nia serbisu no sente rasik liafuan iha Salmo 34:8 neʼebé hatete: “Koko no haree katak Jeová mak diʼak.”