Iha loron 24 Fevereiru 2022, Rúsia halo invazaun ba rai-Ukránia. Iha rai-Ukránia, iha Testemuña ba Jeová naʼin-129.000 hamutuk ho sira-nia oan sira. Sukursál organiza ona Komisaun ba dezastre 27 atu fó ajuda umanitáriu ba irmaun-irmán sira. Irmaun-irmán sira iha neʼebá mós hatudu domin ba malu hodi ajuda malu no apoia malu. Sira mós ajuda ema seluk durante tempu susar neʼe.

Irmaun-irmán barak nafatin hela iha rai-Ukránia, maibé irmaun-irmán balu deside atu halai ba nasaun seluk. Sira presiza forma, no formatura bele naruk toʼo maizumenus kilómetru 30 no tenke hein durante loron tolu ka haat atu bele liu imigrasaun. Irmaun-irmán sira iha área sira-neʼe buka irmaun-irmán sira iha formatura hodi bele fó hahán, hemu no mós fó ajuda seluk tan ba sira. Ikusmai, bainhira irmaun-irmán sira husi rai-Ukránia liu fronteira ba nasaun viziñu, irmaun-irmán sira neʼebé kaer kartás ho sinál jw.org simu sira no mós prontu atu fó kmaan no ajuda.

• Triste mak iha loron 1 Marsu 2022, irmaun ida neʼebé defisiente tilun husi sidade Kharkiv mate no ninia feen hetan kanek todan bainhira bomba rabenta iha sidade

• Irmán naʼin-3 tan hetan kanek

• Irmaun-irmán naʼin-5.000 husik sira-nia uma

• Uma 2 hetan estragu

• Uma 3 hetan estragu boot

• Uma 35 hetan estragu uitoan

• Reuniaun-Fatin 2 hetan estragu

• Irmaun-irmán barak hasoru situasaun susar tanba eletrisidade, mákina atu hamanas no rede telefone mate beibeik, no la iha bee moos

• Harii Komisaun ba dezastre hamutuk 27 iha rai-Ukránia

• Komisaun ba dezastre ajuda irmaun-irmán naʼin-867 atu hetan hela-fatin iha área neʼebé seguru liu

• Komisaun ba dezastre sira serbisu daudaun atu prepara buat oioin, hanesan ai-han no bee moos

Dadus iha leten bazeia ba relatóriu neʼebé foufoun ita simu.

Ita harohan ba Jeová atu ita-nia irmaun-irmán sira nafatin hatudu matenek no hetan kbiit atu bele tahan situasaun susar neʼe no kontinua hatudu domin ba malu.—Provérbios 9:10; 1 Tesalónika 4:9.