Testemuña ba Jeová rihun ba rihun sei iha área neʼebé funu makaʼas iha Ukránia neʼebé hahú husi 24 Fevereiru 2022. Grupu ida ho irmaun naʼin-21 husi sidade Kremenchuk no Poltava iha Ukránia hatudu domin neʼebé loos ba irmaun-irmán sira. Sira prontu atu bá área neʼebé perigu hodi salva maluk sira no lori sasán atu ajuda sira.

Iha semana neen nia laran, irmaun sira halo viajen maizumenus dala 80 ona, sura hamutuk kilómetru maizumenus 50.000 atu bá área neʼebé funu makaʼas hanesan Kharkiv hodi salva irmaun-irmán sira besik naʼin-400.

Sira lori ona ai-han tonelada 23, no mós ai-moruk, gazolina, no buat seluk. Antes halo viajen ida-idak, irmaun sira hanoin didiʼak hodi buka dalan neʼebé seguru liu no sees husi área neʼebé funu makaʼas hela. Dala ruma viajen ida bele toʼo oras 19 tanba presiza pasa-revista barak.

Durante viajen, aviaun funu nian semo iha sira-nia leten. Sira haree buat oioin neʼebé estraga ona ho bomba, hanesan uma-andár, tankedegerra, no karreta sira. Dala ruma, irmaun sira mós sente rai nakdoko kuandu bomba rabenta iha fatin neʼebé besik sira.

Iha 2 Abríl 2022, kuandu irmaun Roman prepara daudaun atu lori sasán oioin ba irmaun-irmán sira iha Kharkiv, misil (rudal) barak monu rajada deʼit iha dalan. Nia halai ba uma-andár neʼebé iha subar-fatin iha rai-okos. Liutiha minutu 30, nia haree katak misil barak monu ona iha dalan neʼebé nia atu liu.

Irmaun voluntáriu ida naran Volodymyr neʼebé xofér dehan: “Ami halo orasaun beibeik ba Jeová hodi husu matenek atu bele foti desizaun neʼebé diʼak.”

Oleksandr no ninia feen Valentyna hela iha Kharkiv ho ninia inan-aman neʼebé idade. Nuʼudar funu sai makaʼas, sira haree bomba neʼebé rabenta besik maizumenus metru 100 deʼit husi sira-nia uma. Sira la iha karreta, no sira labele halai ba área seluk.

Depois neʼe, irmaun sira mai atu salva sira. Oleksandr dehan: “Ami halo orasaun ba Jeová hodi fó agradese tanba irmaun sira ajuda ami.”

Vasyl ho ninia feen Natalia no sira-nia oan naʼin-tolu subar iha sira-nia uma nia rai-okos ba loron balu. Iha 29 Fevereiru 2022, bomba ida rabenta besik sira-nia uma kuandu sira subar hela iha rai-okos no sira-nia uma hetan estragu boot husi bomba. Vasyl hanoin-hetan tarutu makaʼas neʼebé nia rona kuandu bomba rabenta, no lampu hotu mate iha sira-nia fatin.

Kuandu funu sai kalma uitoan, família neʼe muda ba uma-andár iha fatin besik hodi subar iha rai-okos. Iha 3 Marsu 2022, irmaun sira hetan família neʼe no lori sira ba área neʼebé seguru liu.

Vasyl esplika oinsá ninia sentimentu kuandu sira hetan ajuda no toʼo iha fatin neʼebé seguru: “Ami agradese tebes ba Jeová. Ami sente kleur tebes ami laran-susar no hanoin barak kona-ba oinsá atu proteje oan sira, maibé ikusmai ami bele han hamutuk ho hakmatek.”

Irmaun Oleksandr neʼebé ajuda nuʼudar xofér, esplika katak buat neʼebé irmaun sira halo sai evidénsia ba unidade entre Jeová nia povu. Nia dehan: “Neʼe ajuda haʼu atu rekoñese oinsá Jeová hanoin ninia povu, haʼu sente haksolok tebes kuandu haree irmaun-irmán sira-nia oin neʼebé hatudu agradese loos.”

Ita agradese ba irmaun sira neʼebé fó ajuda, no ita harohan ba Jeová atu haraik bensaun ba sira, tanba sira-nia domin no aten-brani.—Roma 12:10.