Bainhira funu iha área Donetsk sai makaʼas iha Ukránia, irmaun Mykola Bozhedomov bá-mai Kramatorsk hodi ajuda ema barak atu halai husi área funu nian.

Maibé iha 8 Abríl 2022, Mykola mate kuandu bomba kona estasaun komboiu iha Kramatorsk, área Donetsk.

Iha tempu neʼebá, ema naʼin-50 liu mak mate, inklui Mykola neʼebé tinan 58, no irmán ida tan. No mós, ema naʼin-100 liu mak hetan kanek, neʼe inklui irmaun ida. Testemuña sira neʼebé moris liu akontesimentu neʼe dehan katak sira rona lian rabenta makaʼas tebes ba dala rua, tuirmai besi rohan barak semo namkari.

Irmán Nina neʼebé kaben ho Mykola ba tinan 32 ona dehan: “Haʼu-nia laʼen sempre tau uluk ema seluk nia diʼak. Liuliu nia laran-manas atu ajuda irmaun-irmán sira neʼebé idade no sira neʼebé moras. Maibé dala ida-idak neʼebé nia bá fali Kramatorsk, situasaun sai perigu liután. Neʼe mak dala ikus ba nia atu bá neʼebá.”

Sira naʼin-rua hetan batizmu hamutuk iha 1997. Mykola serbí nuʼudar katuas neʼebé laran-metin ba tinan barak. Irmaun-irmán sira hatudu domin boot ba irmán Nina no ajuda nia. Irmán Nina dehan: “Sira-nia liafuan neʼebé fó kmaan mai haʼu ajuda tebes haʼu iha tempu susar neʼe.”

Irmán Nina mós dehan katak nia hetan kmaan husi eskritura sira, liuliu Isaias 40:28-31. Nia dehan: “Jeová ajuda haʼu atu hetan fali kbiit, Jeová hatudu domin boot tebes mai haʼu. Antes neʼe, haʼu lee husi livru deʼit kona-ba domin boot hanesan neʼe, maibé agora haʼu rasik sente ida-neʼe.”

Ita halo orasaun hodi inklui irmán Nina no ema neʼebé sira-nia família no belun mate iha funu neʼe. Ita fiar katak Jeová sei kontinua ajuda sira.—Salmo 20:2.