Ita-nia irmaun-irmán sira iha sidade Mariupol, Kharkiv, Hostomel, no seluk tan hasoru daudaun susar boot tanba bomba kontinua rabenta iha rai-Ukránia. Irmaun-irmán balu labele sai husi sira-nia subar-fatin ka fatin protesaun durante maizumenus semana ida. Sira-nia hahán sai menus, no susar tebes atu komunika ho irmaun-irmán sira iha neʼebá tanba dala ruma eletrisidade, internét no rede telefone mate.

Triste mak irmaun Dmytro Rozdorskyi neʼebé idade 28 no serbí nuʼudar katuas kongregasaun ida iha Myrnohrad mate tanba hetan kanek todan depois sama bomba ida. Ita halo orasaun ba ema sira neʼebé lakon ema neʼebé sira hadomi no ba ita-nia irmaun-irmán sira iha área oioin neʼebé tropa sira kontinua tiru bomba barak.—2 Tesalónika 3:1.

Iha loron 7 Marsu 2022, iha relatóriu foun kona-ba rai-Ukránia:

• Irmaun-irmán naʼin-2 mate

• Irmaun-irmán naʼin-8 hetan kanek

• Irmaun-irmán naʼin-20.617 husik sira-nia hela-fatin hodi halai ba fatin seluk neʼebé seguru liu iha rai-Ukránia.

• Uma 25 hetan rahun ona

• Uma 29 hetan estragu boot

• Uma 173 hetan estragu uitoan

• Reuniaun-Fatin 5 hetan estragu

• Komisaun ba dezastre hamutuk 27 mak ajuda daudaun iha rai-Ukránia

• Komisaun ba dezastre ajuda irmaun-irmán naʼin-6.548 atu hetan hela-fatin iha área neʼebé seguru liu

• Irmaun-irmán naʼin-7.008 halai ona ba nasaun seluk no irmaun-irmán husi nasaun sira-neʼe ajuda sira

• Komisaun ba dezastre uza Salaun ba Asembleia 1 no mós Reuniaun-Fatin 30 iha parte oeste husi rai-Ukránia, hanesan iha área Chernevtsi, Ivano-Frankivsk, Lviv, no Transcarpathian nuʼudar fatin refujiadu ba irmaun-irmán sira