Ita-nia irmaun-irmán sira iha Ukránia kontinua apoia malu no hatudu domin neʼebé la hanoin an deʼit.

Irmán Olena mak tinan 81. Iha loron 6 Juñu, misil (rudal) ida rabenta besik tebes ninia uma. Misil neʼe harahun ninia viziñu nia uma, no halo rai kuak boot neʼebé naruk metru hitu. Irmán Olena nia uma mós hetan estragu boot.

Nia dehan: “Haʼu toba hela, no derrepente parede monu iha haʼu-nia ulun sorin kedas. Fatin neʼe sai nakonu ho rai-rahun. Vidru no fatuk namkari iha fatin hotu. Haʼu agradese ba Jeová tanba haʼu moris hela.” Minutu balu depois misil rabenta, irmaun-irmán sira mai haree irmán Olena, neʼe inklui irmaun ida neʼebé ninia uma rasik mós hetan estragu boot. Irmán Olena dehan: “Bainhira irmaun sira mai, sira hakfodak ho uma nia kondisaun toʼo labele koʼalia buat ida. Hodi haree deʼit sira mai, neʼe anima tebes haʼu. Haʼu kontente tebes tanba sira iha haʼu-nia sorin kedas.”

Irmaun katuas ida naran Serhii, neʼebé vizita beibeik irmán Olena hamutuk ho irmaun joven sira iha kongregasaun, dehan: “Bainhira haʼu hatene katak buat ruma rabenta besik irmán Olena nia uma, neʼe halo haʼu taʼuk no hanoin barak. Kuandu haʼu haree katak nia la hetan kanek boot, só deʼit kanek uitoan mak haʼu sente kmaan. Buat neʼebé halo haʼu hakfodak mak sasán primeiru neʼebé nia hakarak foti husi ninia uma neʼebé estraga ona mak livru kona-ba Bíblia neʼebé nia foin hetan loron balu liubá.”

Ikusmai, irmán Olena nia família hetan hela-fatin ba nia. Kongregasaun kontinua apoia nia, no katuas sira kontaktu irmán Olena loroloron. Irmaun-irmán sira arranja mákina kiʼik atu ajuda nia bele rona moos hodi bele hetan benefísiu husi reuniaun. Olena dehan: “Dala ruma haʼu sente la iha kbiit, maibé reuniaun sira fó kbiit mai haʼu. Haʼu-nia maluk fiar-naʼin sira kontaktu haʼu beibeik, no haʼu agradese tebes ba ida-neʼe.”

Kaben-naʼin ida konta kona-ba tempu neʼebé sira hela iha Reuniaun-Fatin nia sala iha rai okos hamutuk ho irmaun-irmán naʼin-200. Feen neʼe dehan: “Buat neʼebé book tebes haʼu-nia laran mak ajuda neʼebé katuas sira fó ho domin. Neʼe halo haʼu hanoin-hetan kona-ba David neʼebé tau ninia moris iha perigu laran atu hasoru leaun no ursu hodi salva ninia bibi. Katuas sira tau sira-nia moris iha perigu laran atu hetan ai-han no bee, no mina atu bele uza ba lampu. Ho ida-neʼe mak ami bele halaʼo reuniaun no grupu haklaken. Maski iha tempu neʼebé bomba barak monu, katuas sira-neʼe nafatin vizita irmaun-irmán sira neʼebé hela iha sira-nia uma, lori hahán no bee, no fó kmaan ba sira. Haʼu respeitu tebes katuas sira-neʼe. Uluk haʼu haree sira nuʼudar ema neʼebé hanorin no haklaken, maibé agora haʼu haree sira nuʼudar bibi-atan neʼebé bele tau fiar. Haʼu agradese tebes ba katuas sira neʼebé hatudu aten-brani, tau matan, no bele tau fiar!”

Irmaun-irmán sira iha kongregasaun ida iha Ukránia hakerek karta ba sukursál Ukránia kona-ba irmaun sira neʼebé dirije serbisu atu oferese ajuda umanitária: “Ami-nia laran nakonu ho agradese boot. Ami hakfodak hodi haree oinsá Jeová tau matan ami liuhusi maluk fiar-naʼin sira. Ami rasik sente duni Jesus nia liafuan neʼebé dehan: ‘Se imi hadomi malu, ema hotu sei hatene katak imi mak haʼu-nia dixípulu.’”—João 13:35.

Iha loron 21 Juñu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-42 mate

• Irmaun-irmán naʼin-83 hetan kanek

• Agora daudaun irmaun-irmán naʼin-31.185 husik sira-nia hela-fatin

• Uma 495 rahun hotu

• Uma 557 hetan estragu boot

• Uma 1.429 hetan estragu uitoan

• Reuniaun-Fatin 5 rahun

• Reuniaun-Fatin 8 hetan estragu boot

• Reuniaun-Fatin 34 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-52.348 atu hetan hela-fatin iha área neʼebé seguru liu

• Irmaun-irmán naʼin-23.433 halai ona ba nasaun seluk no irmaun-irmán husi nasaun sira-neʼe ajuda sira