Iha Ukránia tomak, irmaun-irmán sira kontente tanba bele haklaken fali iha fatin públiku no hetan rezultadu diʼak oioin. Katuas área no katuas kongregasaun sira hatoʼo relatóriu katak ema barak kontente atu haree fali ita-nia karrosa sira no ema balu dehan sira triste tanba kleur ona la haree Testemuña ba Jeová iha sira-nia área.

Tatiana husi kongregasaun Serhiivka iha área Odesa deside atu vizita ema oioin neʼebé uluk nia kontaktu antes pandemia hahú. Nia esplika: “Husi primeiru kedas, haʼu haree Jeová nia bensaun ba ami-nia hakaʼas an atu komesa fali haklaken.” Loron ida, nia vizita feto ida neʼebé uluk lakohi estuda Bíblia antes pandemia hahú. Agora, feto neʼe kontente atu koʼalia hamutuk tópiku oioin husi Bíblia no prontu atu estuda. Irmán Tatiana dehan: “Haʼu presiza vizita fali ema hotu neʼebé uluk haʼu vizita beibeik no oferese estuda Bíblia ba sira!”

Uluk Yevheniy no Lilia hela iha Mariupol, maibé sira presiza halai ba fatin seluk no agora sira hela iha área neʼebé seguru liu iha Ukránia. Sira naʼin-rua hola parte beibeik iha serbisu haklaken. Sira esplika katak haklaken ajuda sira atu la hanoin demais kona-ba problema neʼebé sira hasoru. Sira dehan: “Ami hatene katak ami labele ona atu halaʼo moris hanesan uluk. Susar tebes atu komesa moris foun, maibé ami hanoin-hetan katak Jeová nia liman nunka badak atu ajuda ninia atan sira. Jeová nia espíritu santu ajuda ami, no irmaun-irmán sira prontu atu ajuda ami hodi bele komesa moris foun iha fatin foun.”

Iha área seluk iha Ukránia, irmaun-irmán sira mós fó sasin liuhusi sira-nia hahalok diʼak. Porezemplu, grupu ida ho irmaun sira iha sidade Mykolaiv ajuda organizasaun internasionál umanitária nian ida hodi hadiʼa no arranja armazén neʼebé uza atu ajuda ema. Irmaun sira hadiʼa kanu bee, prepara fatin atu tau sasán, no haloot sasán oioin hamutuk tonelada balu. Bainhira reprezentante husi organizasaun neʼe mai haree sira-nia serbisu, nia komesa tanis hodi dehan: “Haʼu la imajina atu haree rezultadu diʼak hanesan neʼe.”

Maski ita-nia irmaun-irmán sira iha Ukránia hasoru susar, maibé sira sente haksolok tanba kontinua halaʼo serbisu haklaken ho laran-manas no “halo buat neʼebé diʼak”.—Galásia 6:9.

Iha loron 13 Jullu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-42 mate

• Irmaun-irmán naʼin-97 hetan kanek

• Agora daudaun irmaun-irmán naʼin-28.683 husik sira-nia hela-fatin

• Uma 524 rahun hotu

• Uma 588 hetan estragu boot

• Uma 1.554 hetan estragu uitoan

• Reuniaun-Fatin 5 rahun

• Reuniaun-Fatin 10 hetan estragu boot

• Reuniaun-Fatin 36 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-52.947 atu hetan hela-fatin iha área neʼebé seguru liu

• Irmaun-irmán naʼin-23.863 halai ona ba nasaun seluk no irmaun-irmán husi nasaun sira-neʼe ajuda sira