Husi loron 23 toʼo 31 Jullu, haklaken-naʼin barak husi Ukránia hetan batizmu iha reuniaun boot 2022 ho tema “Buka dame”! iha sira-nia rai ka iha nasaun seluk neʼebé sira halai bá. Toʼo loron 2 Agostu, ema husi Ukránia neʼebé hetan batizmu iha reuniaun boot neʼe mak hamutuk naʼin-1.113. Irmaun ida iha Ukránia dehan: “Funu mós labele hapara serbisu haklaken atu ajuda ema sai Jesus nia dixípulu, hanesan Jesus promete ona: ‘Haʼu sei hamutuk nafatin ho imi toʼo mundu neʼe nia rohan.’”—Mateus 28:20.

Ami kontente atu fó sai esperiénsia balu tuirmai.

Irmán Natalia husi Kreminna, área Luhansk mak tinan 63. Nia no ninia oan-feto naʼin-rua komesa estuda Bíblia ho Testemuña ba Jeová maizumenus iha tinan 1990. Ninia oan-feto sira laʼo ba oin no hetan batizmu, maibé Natalia lae. Bainhira funu hahú, família Testemuña ba Jeová ida lori Natalia hamutuk sira hodi halai ba área neʼebé seguru liu. Irmaun sira fó hela-fatin ba nia iha sala iha Reuniaun-Fatin nia rai okos iha Ivano-Frankivsk.

Natalia dehan: “Haʼu sente taʼuk tebes kuandu bomba barak monu, no depois neʼe haʼu haluha ona oinsá atu hamnasa. Irmaun-irmán sira hatudu domin neʼebé loos mai haʼu. Haʼu la imajina katak sira hanoin haʼu-nia presiza iha dalan hanesan neʼe. Iha tempu neʼebá, haʼu-nia domin ba Jeová komesa buras. Haʼu lee Bíblia beibeik, no irmán ida konvida haʼu atu estuda Bíblia hodi uza livru Moris Haksolok Ba Nafatin! Irmán neʼe mak prezente husi Jeová.” Natalia hatutan tan: “Agora haʼu kontente tebes tanba hetan batizmu nuʼudar Testemuña ba Jeová ida. Haʼu hakarak moris tuir mandamentu neʼebé furak liu: hadomi haʼu-nia Maromak Jeová ‘ho haʼu-nia laran tomak, ho haʼu-nia moris tomak no ho haʼu-nia neon tomak.’”—Mateus 22:37.

Irmán Olia husi Cherkasy mak haklaken-naʼin neʼebé seidauk hetan batizmu bainhira funu neʼe hahú. Iha loron 6 Marsu, nia halai ba Polónia hamutuk ho ninia oan-feto no bei-oan. Nia dehan: “Kuandu ami toʼo neʼebá, ami iha deʼit ami-nia pasta emerjénsia, maibé irmaun-irmán sira tau matan ami naʼin-tolu. Buat neʼe hotu fó konfiansa mai haʼu katak Jeová nia organizasaun iha unidade no ninia espíritu santu mak dirije organizasaun neʼe. Depois hetan esperiénsia hanesan neʼe, haʼu-nia desizaun sai metin liután atu dedika haʼu-nia moris ba Jeová. Nia ajuda haʼu iha tempu neʼebé susar liu, no agora haʼu hakarak serbí nia no hatudu haʼu-nia agradese ba nia.”

Yulia husi área Donetsk mak tinan 18. Nia sai boot iha família Testemuña ida maibé nia la laʼo ba oin toʼo batizmu. Nia fó sai esperiénsia ida neʼebé akontese la kleur depois funu hahú hodi dehan: “Haʼu latan hela iha rai no haʼu sente katak haʼu bele mate iha tempu naran deʼit. Estrada iha ami-nia uma oin hetan estragu totál, maibé ami moris hela. Depois hasoru situasaun neʼe no halo orasaun no medita kona-ba Jeová nia hahalok sira, haʼu sai besik liután ba Jeová no para atu dúvida se haʼu presiza dedika haʼu-nia moris ba nia ka lae. Hodi hatán haʼu-nia orasaun, Jeová hatudu oinsá nia besik tebes ho haʼu. Uluk haʼu iha deʼit koñesimentu kona-ba Maromak, maibé agora haʼu hadomi nia.” Yulia hetan batizmu iha 23 Jullu.

Bainhira funu hahú, David neʼebé tinan 11 ho ninia família halai ba Alemaña. Nia sai ona haklaken-naʼin neʼebé seidauk hetan batizmu kuandu nia tinan sia. Agora nia kontente hakaʼas an atu kumpre ninia planu espirituál oioin. Nia dehan: “Haʼu deside atu hetan batizmu tanba haʼu hadomi Jeová no hakarak sai ninia belun. Iha tempu neʼebé haʼu hetan batizmu, haʼu-nia matan-been tun tanba kontente tebes atu sai parte ba Jeová nia família. Haʼu gosta atu fó-hatene ema seluk kona-ba Jeová no ninia objetivu ba ema, entaun haʼu-nia planu tuirmai mak atu sai pioneiru. Haʼu mós hakarak serbí irmaun-irmán sira iha kongregasaun no espera katak loron ida haʼu bele sai atan ba kongregasaun. Haʼu-nia planu neʼebé boot liu mak serbí iha Betel. Neʼe mak haʼu-nia mehi husi tempu neʼebé haʼu vizita sukursál iha Lviv iha tinan 2018.”

Olena husi Kyiv sai haklaken-naʼin neʼebé seidauk hetan batizmu iha tinan 2011, maibé nia sai la ativu ba tinan sanulu. Iha tinan 2020, katuas sira husi kongregasaun kontaktu nia no fó broxura Kembalilah kepada Yehuwa. Nia dehan: “Haʼu komesa fali estuda Bíblia no tuir reuniaun. Maski nuneʼe, liutiha tempu balu, haʼu para fali. Durante funu neʼe, Jeová hatán haʼu-nia orasaun, no haʼu rekoñese katak Jeová proteje haʼu, hatudu ninia domin mai haʼu, no halo haʼu sente dame iha laran. Haʼu halai ba Roménia no hetan Testemuña sira. Irmaun sira hatudu domin no tau matan haʼu, haʼu sente neʼe hanesan Jeová mak taka haʼu ho manta neʼebé diʼak.” Olena hetan batizmu iha 24 Jullu. Nia dehan: “Haʼu agradese ba Jeová tanba hatudu pasiénsia boot mai haʼu. Agora haʼu hatene katak ‘iha situasaun hotu haʼu hetan forsa liuhusi nia neʼebé fó kbiit mai haʼu’.”—Filipe 4:13.

Iha loron 2 Agostu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-43 mate

• Irmaun-irmán naʼin-97 hetan kanek

• Agora daudaun irmaun-irmán naʼin-22.568 husik sira-nia hela-fatin

• Uma 586 rahun hotu

• Uma 613 hetan estragu boot

• Uma 1.632 hetan estragu uitoan

• Reuniaun-Fatin 5 rahun

• Reuniaun-Fatin 10 hetan estragu boot

• Reuniaun-Fatin 37 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-53.836 atu hetan hela-fatin iha área neʼebé seguru liu

• Irmaun-irmán naʼin-24.867 halai ona ba nasaun seluk no irmaun-irmán husi nasaun sira-neʼe ajuda sira