Iha Agostu 2022, irmaun-irmán sira hetan avizu katak sira bele komesa fali haklaken husi uma ba uma iha área neʼebé seguru. Irmaun-irmán barak laran-manas atu hola parte. Sira haree katak ema barak hakarak atu rona ba Bíblia nia mensajen. Ema ida neʼebé hakarak estuda Bíblia hatete: “Haree tiha terus no susar barak durante funu neʼe, haʼu haree klaru katak só Maromak mak bele rezolve ema nia problema sira.” Tuirmai mak esperiénsia balu husi haklaken uma ba uma.

Irmaun Ruslan husi kongregasaun Lanivtsi taʼuk uitoan atu komesa fali haklaken husi uma ba uma. Nia ho ninia feen halo orasaun ba Jeová atu hetan aten-brani no husu ajuda atu sira bele hasoru ema neʼebé interese kona-ba esperansa ba futuru. Kaben-naʼin neʼe hakfodak tebes tanba bainhira sira haklaken ba oras rua, sira koʼalia ho ema naʼin-ualu no sira hotu hakarak atu estuda Bíblia.

Bainhira irmán Olha husi kongregasaun Kremenets haklaken hela, mane ida hakbesik ba Olha no ninia pár no husu se sira naʼin-rua koʼalia kona-ba Maromak nia liafuan. Depois mane neʼe esplika: “Haʼu fuma no hemu tua demais. Haʼu hatene katak lakleur tan Maromak sei tesi-lia mai haʼu. Iha tempu neʼebá, haʼu lakohi hanesan haʼu ida agora neʼe.” Irmaun sira arranja atu mane neʼe bele komesa estuda Bíblia.

Bainhira irmaun Vasyl husi kongregasaun Lviv-Riasne-Skhidnyi haklaken hamutuk ho ninia grupu iha knua ida, nia rekoñese uma ida neʼebé nia vizita tinan barak liubá. Nia hanoin-hetan uluk feto neʼebé hela iha uma neʼe hirus no lakohi koʼalia ho Testemuña ba Jeová. Irmaun Vasyl deside atu dere odamatan no oferese estuda Bíblia. Nia hakfodak tanba feto neʼebé nia hasoru uluk mak loke odamatan no hatete katak nia hakarak komprende Bíblia Sagrada. Feto neʼe simu estuda Bíblia no irmaun sira arranja ema ida atu estuda ho nia.

Irmaun Serhii husi kongregasaun Illintsi hetan batizmu iha 2021 no nunka hola parte iha serbisu haklaken husi uma ba uma. Nia sente taʼuk uitoan entaun nia uza tempu atu prepara. Serhii hatete: “Haʼu haree vídeo ezemplu atu haklaken dala barak. Depois neʼe, buat neʼebé haʼu presiza mak aten-brani.” Nia dehan katak ninia taʼuk troka sai fali ksolok boot tanba nia haklaken liafuan diʼak ba ema seluk.

Buat neʼebé hanesan akontese ba irmán Nikol husi kongregasaun Rozdil. Nia sai haklaken-naʼin neʼebé seidauk hetan batizmu iha Agostu 2022. Nia dehan: “Haʼu hanoin barak tebes no taʼuk atu haklaken husi uma ba uma. Maibé halo tiha ida-neʼe, haʼu sente haksolok tebes bele konversa ho ema seluk kona-ba Jeová!”

Iha loron 11 Novembru 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-46 mate

• Irmaun-irmán naʼin-97 hetan kanek

• Agora daudaun irmaun-irmán naʼin-12.569 husik sira-nia hela-fatin

• Uma 590 rahun hotu

• Uma 645 hetan estragu boot

• Uma 1.722 hetan estragu uitoan

• Reuniaun-Fatin 6 rahun

• Reuniaun-Fatin 19 hetan estragu boot

• Reuniaun-Fatin 63 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-53.948 atu hetan hela-fatin iha área neʼebé seguru liu

• Irmaun-irmán naʼin-25.983 halai ona ba nasaun seluk no irmaun-irmán husi nasaun sira-neʼe ajuda sira