Husi tempu neʼebé funu komesa iha Ukránia iha Fevereiru 2022, Testemuña ba Jeová nia uma maizumenus 3.000 mak hetan estragu ka rahun. Iha fulan-Agostu, irmaun sira iha Ukránia hamutuk ho Departamentu ba Dezastre (DRD) no Departamentu Planeamentu no Konstrusaun Lokál, komesa hadiʼa fali uma balu iha área neʼebé seguru. Serbisu neʼe inklui troka uma kakuluk ka janela neʼebé aat ona, no hadiʼa estragu kiʼik sira. Iha situasaun balu, bainhira uma ida rahun, irmaun sira sei troka karreta para fatin ka armazén sai fali uma simples ida. Agora daudaun, iha projetu konstrusaun hamutuk 37 neʼebé kompletu ona, no 48 mak sei prosesu hela.

Susar atu hadiʼa uma durante tempu runguranga neʼe. Maibé neʼe la hanetik irmaun-irmán sira atu fó ajuda. Irmán Svitlana ho tinan 70, husi Velyka Dymerka, área Kyiv, hatete: “Haʼu la iha osan natoon atu hadiʼa haʼu-nia uma kakuluk no uma oin. Jeová fó supreza mai haʼu. Irmaun sira mai hadiʼa haʼu-nia uma iha loron tolu nia laran deʼit.”

Irmán Nadiia husi Horenka, área Kyiv, esplika katak serbisu umanitária neʼe fó sasin kapás ba ema. Nia hatete: “Projetu hadiʼa uma fó sasin boot ba ema hotu. Ema neʼebé haʼu la koñese mós koʼalia kona-ba domin loos neʼebé Testemuña ba Jeová hatudu ba malu. Sira admira tanba haʼu-nia maluk sira mai ajuda haʼu.”

Sira neʼebé lakon sira-nia uma rasik mós fó ajuda ba ema seluk. Ezemplu ida mak kaben-naʼin ida naran Yevhen no Tetiana. Sira-nia uma rahun tanba kona misil. Maibé, sira serbisu ho badinas atu ajuda maluk fiar-naʼin sira duké fokus ba buat neʼebé sira lakon. Irmaun Yevhen hatete: “Uluk kedas, ami-nia motivu primeiru mak atu ajuda ema seluk. Neʼe ajuda ami atu tahan hasoru ami-nia problema rasik.”

Depois irmaun-irmán sira hadiʼa tiha irmán Lidiia nia uma iha Hostomel, área Kyiv, neʼe book nia atu ajuda fali ema seluk. Nia hatete: “Ba semana rua, maizumenus irmaun-irmán naʼin-16 hadiʼa haʼu-nia uma. Haʼu sente hanesan iha mundu foun ona. Agora haʼu hakarak ajuda fali ema seluk.”

Foin lalais, membru ida husi Komisaun Sukursál Ukránia vizita área sira neʼebé halaʼo hela serbisu umanitária no enkoraja irmaun-irmán sira neʼebé lakon sira-nia uma. Nia hatete: “Irmaun-irmán sira iha rai-Ukránia sempre hatudu domin boot ba malu. Maibé, funu neʼe halo ami hadomi malu liután. Haʼu kontente tebes atu haree katak bainhira irmaun-irmán sira simu tiha ajuda, neʼe book sira halo buat barak liután iha serbisu haklaken no fó agradese liután ba Maromak hanesan temi iha 2 Korinto 9:12.”

Iha loron 20 Dezembru 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik sei iha barak liután, tanba susar atu komunika ho área hotu iha Ukránia.

• Irmaun-irmán naʼin-47 mate

• Irmaun-irmán naʼin-97 hetan kanek

• Agora daudaun irmaun-irmán naʼin-11.477 husik sira-nia hela-fatin

• Uma 590 rahun hotu

• Uma 645 hetan estragu boot

• Uma 1.722 hetan estragu uitoan

• Reuniaun-Fatin 7 rahun

• Reuniaun-Fatin 19 hetan estragu boot

• Reuniaun-Fatin 68 hetan estragu uitoan

• Komisaun ba dezastre hamutuk 26 mak ajuda daudaun iha Ukránia

• Komisaun ba dezastre ajuda irmaun-irmán naʼin-54.212 atu hetan hela-fatin iha área neʼebé seguru liu

• Irmaun-irmán naʼin-26.892 halai ona ba nasaun seluk no irmaun-irmán husi nasaun sira-neʼe ajuda sira