Iha área balu hanesan Mariupol neʼebé funu sai makaʼas, eletrisidade, rede telefone no internét mate, no labele uza mákina atu hamanas. Uma sira-nia janela hotu rahun. Hahán no bee hela uitoan deʼit. Iha irmaun-irmán naʼin-2.500 liu neʼebé labele sai husi Mariupol. Iha sidade balu hanesan Bucha, Chernihiv, Hostomel, Irpin, Kyiv, no Sumy, dalan balu loke ona atu ema bele sai husi sidade. Neʼe loke oportunidade ba irmaun-irmán barak atu halai ba fatin neʼebé seguru liután.

Iha irmaun ida ho tinan 36 neʼebé hela iha Hostomel no serbí nuʼudar katuas no pioneiru, nia halai hamutuk ho ninia feen no inan-aman. Irmaun neʼe konta buat neʼebé akontese bainhira ema ataka sidade neʼe:

“Elikópteru sira semo iha ami-nia uma leten. Militár nia karreta barak tebes iha estrada iha tempu hotu. Soldadu sira tama ami-nia uma bainhira ami subar iha kuartu iha rai okos. Sira ida tiru ami-nia fatin ba dala balu no kilat musan sira kona haʼu-nia amá nia pasta emerjénsia, maibé ami la hetan kanek. Ba oras tolu ka haat, ami la book an no nonook deʼit, no durante tempu neʼe ami rona kilat tarutu beibeik no bomba barak rabenta iha área neʼe. . . . Dadeer-saan tuirmai kuandu ami saʼe karreta no halai, funu komesa besik ami-nia fatin. Tankedegerra sira iha estrada. . . . Neʼe situasaun neʼebé perigu tebes, maibé perigu liután se ami la halai.

“Ami-nia moris troka duni ho akontesimentu neʼe. Ami aprende oinsá atu aplika Bíblia nia prinsípiu sira. Porezemplu, ami aprende oinsá atu la hanoin resin kona-ba loron aban, kontente ho buat báziku neʼebé bele sustenta ami-nia moris, no tau fiar ba Jeová iha tempu susar.”

Ami fiar katak Maromak Jeová hatene kona-ba susar hotu neʼebé irmaun-irmán sira iha Ukránia hasoru. Nia sei tau matan duni ba sira-nia presiza.—2 Pedro 2:9.

Iha loron 10 Marsu 2022, iha relatóriu foun kona-ba rai-Ukránia:

• Irmaun-irmán naʼin-2 mate

• Irmaun-irmán naʼin-8 hetan kanek

• Irmaun-irmán naʼin-25.407 husik sira-nia hela-fatin hodi halai ba fatin seluk neʼebé seguru liu iha rai-Ukránia

• Uma 25 rahun hotu

• Uma 59 hetan estragu boot

• Uma 222 hetan estragu uitoan

• Reuniaun-Fatin 7 hetan estragu

• Komisaun ba dezastre hamutuk 27 mak ajuda daudaun iha rai-Ukránia

• Komisaun ba dezastre ajuda irmaun-irmán naʼin-10.566 atu hetan hela-fatin iha área neʼebé seguru liu

• Irmaun-irmán naʼin-9.635 halai ona ba nasaun seluk no irmaun-irmán husi nasaun sira-neʼe ajuda sira