Ami triste tebes atu fó-hatene katak ita-nia irmán naʼin-rua mate iha Mariupol kuandu ema soe bomba. Agora, sei iha irmaun-irmán naʼin-2.000 liu neʼebé labele sai husi sidade neʼe tanba funu makaʼas. Durante loron balu nia laran, maizumenus Testemuña naʼin-150 halai sai husi sidade neʼe. Irmaun sira husi komisaun ba dezastre koko ona atu lori sasán oioin ba Mariupol, maibé sira tenke fila fali tanba ema ataka sira hamutuk ho ema husi organizasaun seluk neʼebé mós atu fó ajuda umanitária iha neʼebá. Bomba ida monu iha jardín iha reuniaun-fatin neʼebé liga ho Salaun Asembleia. Iha tempu neʼebá, maizumenus irmaun-irmán naʼin-200 mak hela iha reuniaun-fatin nia sala ida iha rai okos. Sira la hetan kanek, maibé sira-nia karreta hetan estragu, no neʼe halo susar liután ba sira atu halai sai husi sidade neʼe.

Irmaun katuas kongregasaun ida (foto iha kraik) hamutuk ho ninia família konsege halai sai husi Mariupol. Nia dehan: “Ami lakon ona ami-nia apartamentu, serbisu, no kontaktu ho irmaun-irmán sira. Baibain ami presiza loron ida atu bele toʼo iha neʼe, maibé foin lalais ami presiza loron neen. Kuandu ami saʼe karreta no halai, ami haree suar husi bomba sira iha estrada nia sorin-sorin neʼebé seidauk rabenta. Iha dalan, irmaun sira ajuda ami atu hetan ai-han no fatin atu toba. Ami sente katak Aman Jeová tau matan duni ami . . . Neʼe book ami atu tau fiar tomak ba Jeová.”

Testemuña sira neʼebé sai husi Ukránia halo viajen dook atu halai ba nasaun oioin iha Europa nuʼudar refujiadu. Porezemplu, irmaun ida neʼebé serbí nuʼudar atan ba kongregasaun, hamutuk ho ninia feen no oan naʼin-tolu neʼebé tinan 7, 11, no 16, halai ba Portugál tanba sira iha família Testemuña iha neʼebá. Sira presiza hein ba oras 11 atu liu fronteira, tuirmai sira halo viajen ba loron haat ho kilómetru 4.000 liu hodi toʼo família nia fatin iha Portugál. Sira toʼo fatin neʼe iha oras neʼebé reuniaun foin atu hahú. Maski sira la hatene lian Portugés, maibé sira asiste reuniaun hodi tuir sira-nia toman espirituál nuʼudar família. Kongregasaun neʼe hetan anima tanba haree katak família neʼe haksolok nafatin maski hasoru susar boot.

Irmán ida neʼebé halai ba Alemaña hamutuk ho ninia família dehan: “Lee Bíblia, hanoin pozitivu, no hanoin kona-ba esperansa furak neʼebé ita hotu iha, neʼe fó forsa no anima ami . . . . Ami sente ona Jeová mak dirije no ajuda ami liuhusi irmaun-irmán sira. Sira simu ami no ajuda tebes ami iha Ukránia, iha Ungria, no agora iha Alemaña!”

Klaru katak Jeová ajuda daudaun irmaun-irmán hotu iha Ukránia.—Salmo 145:14.

Iha loron 16 Marsu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik loloos sei iha barak liután, tanba susar atu komunika ho área hotu iha Ukránia:

• Irmaun-irmán naʼin-4 mate

• Irmaun-irmán naʼin-19 hetan kanek

• Irmaun-irmán naʼin-29.789 husik sira-nia uma hodi halai ba fatin seluk neʼebé seguru liu iha Ukránia

• Uma 45 rahun hotu

• Uma 84 hetan estragu boot

• Uma 366 hetan estragu uitoan

• Reuniaun-Fatin 16 hetan estragu

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-20.981 atu hetan hela-fatin iha área neʼebé seguru liu

• Irmaun-irmán naʼin-11.973 halai ona ba nasaun seluk no irmaun-irmán husi nasaun sira-neʼe ajuda sira