Ita kontinua halo orasaun ba irmaun-irmán sira iha Mariupol neʼebé ema kontinua halo funu no tiru bomba. Triste tebes, ita-nia irmaun-irmán naʼin-6 mate tanba kona bomba. Sura hamutuk, toʼo agora irmaun-irmán naʼin-10 mak mate iha Ukránia. No mós hanesan notísias fó sai ona, semana kotuk ema soe bomba ba teatru ida neʼebé ema naʼin-1.000 liu mak iha laran. La iha irmaun ka irmán neʼebé mate iha ataka neʼe, maibé balu hetan kanek.

Maizumenus irmaun-irmán naʼin-750 halai sai ona husi Mariupol, no maizumenus naʼin-1.600 mak sei iha sidade laran. Sira barak hela iha sidade nia parte leste neʼebé agora Rúsia mak kontrola.

Hanesan temi ona iha relatóriu, irmaun-irmán maizumenus naʼin-200 subar hela iha Reuniaun-Fatin nia sala ida iha rai okos neʼebé liga ho Salaun Asembleia. Bainhira ami kontaktu sira, irmaun sira iha neʼebá fó-hatene sira-nia situasaun hodi dehan:

“Bainhira ema tiru bomba tuituir malu, irmaun-irmán barak sente taʼuk tebes. Balu komesa tanis. Kuandu bomba sira rabenta iha liʼur, ami hanoin katak ami sei mate ho bomba ka ahi. Katuas ida fó sujestaun atu kanta ita-nia knananuk sira. Ami kanta hamutuk knananuk 10 toʼo 15 tuituir malu. Nuʼudar bomba sira rabenta makaʼas liután toʼo halo uma nakdoko, ami mós kanta ho lian boot liután. Tuirmai ami lee Salmo 27 no koʼalia hamutuk. Depois neʼe, ema hotu koʼalia kona-ba sira-nia eskritura favoritu hodi esplika oinsá mak eskritura neʼe hametin sira. . . . Ami sente duni katak Jeová mak ‘Aman neʼebé laran-sadiʼa no Maromak neʼebé fó kmaan ba ema iha situasaun hotu’, no nia ajuda duni ami atu sente hakmatek iha tempu susar neʼe.”—2 Korinto 1:3, 4.

Irmaun katuas sira no komisaun ba dezastre hakaʼas an atu kontaktu irmaun-irmán sira no lori hahán no ai-moruk kuandu presiza, maski neʼe perigu tebetebes. Kuandu irmaun sira-neʼe buka irmaun-irmán iha sidade laran, dala ruma sira presiza dolar iha rai tanba ema tiru malu. Ita hafolin irmaun sira-neʼe neʼebé ‘tau sira-nia moris iha perigu laran’ atu ajuda maluk fiar-naʼin sira.—Roma 16:4.

Tanba la iha ona gás no eletrisidade, irmán sira neʼebé aten-brani teʼin hahán iha liʼur hodi sunu ai. Tuirmai lori hahán neʼe ba irmaun-irmán neʼebé idade ona no sira neʼebé defisiente. Irmaun-irmán barak lakon ona sira-nia uma, karreta, no sasán oioin, maibé sira agradese ba irmaun-irmán sira-nia ajuda no domin.

Sira neʼebé hela iha subar-fatin hakaʼas an atu kontinua halaʼo atividade espirituál hodi estuda Bíblia hamutuk no fahe Bíblia nia mensajen ba ema seluk kuandu iha oportunidade.

Iha loron 22 Marsu 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik loloos sei iha barak liután, tanba susar atu komunika ho área hotu iha Ukránia.

• Irmaun-irmán naʼin-10 mate

• Irmaun-irmán naʼin-27 hetan kanek

• Irmaun-irmán naʼin-33.180 husik sira-nia uma hodi halai ba fatin seluk neʼebé seguru liu iha Ukránia

• Uma 78 rahun hotu

• Uma 102 hetan estragu boot

• Uma 484 hetan estragu uitoan

• Reuniaun-Fatin 1 rahun

• Reuniaun-Fatin 4 hetan estragu boot

• Reuniaun-Fatin 18 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-25.069 atu hetan hela-fatin iha área neʼebé seguru liu

• Irmaun-irmán naʼin-14.308 halai ona ba nasaun seluk no irmaun-irmán husi nasaun sira-neʼe ajuda sira