Triste tebes atu fó sai katak ita-nia irmaun-irmán barak liután mate tanba funu iha Ukránia. Sura hamutuk, irmaun-irmán naʼin-28 mate ona.

Hanesan notísias internasionál fó sai, funu makaʼas akontese iha sidade sira neʼebé besik Kyiv kuandu funu hahú. Maizumenus Testemuña naʼin-4.900 mak hela iha área neʼe, no sira naʼin-3.500 liu halai ona ba fatin neʼebé seguru.

Esperiénsia sira tuirmai hatudu oinsá irmaun-irmán sira iha área sira-neʼe kontinua hatudu fiar metin maski hasoru susar boot tebes.

Katuas Kristaun ida naran Oleksandr husi sidade Makariv, halai ba área neʼebé seguru iha Ukránia sentrál. Maibé nia hanoin kona-ba Testemuña naʼin-haat iha ninia grupu haklaken neʼebé labele kontaktu, tan neʼe nia bá fali área funu nian atu buka sira. Nia dehan: “Haʼu komprende katak Jeová hafolin tebes ema neʼebé serbí nia. . . . Kuandu haʼu toʼo irmaun ida nia uma, haʼu haree katak bomba sira kona ona fatin neʼe. Odamatan atu tama ba kuartu iha rai okos mak taka hela, no maski haʼu bolu, la iha ema ida mak hatán. Neʼe halo haʼu taʼuk.” Oleksandr sobu odamatan hodi tama ba laran, no hetan ema grupu ida neʼebé hateke ba nia. Neʼe mak Testemuña sira hamutuk ho viziñu sira neʼebé subar hela.

Irmaun Yaroslav neʼebé subar iha fatin neʼe esplika katak sira subar iha rai okos ba loron ualu. Nia dehan: “Ami iha deʼit biskuit balu no bee kopu ida ba ema ida loron ida. Maibé ami lee Bíblia no livru sira, halo orasaun, no anima malu. Kuandu haʼu rona Oleksandr bolu haʼu-nia naran, haʼu hanoin soldadu sira mai atu kaer haʼu. Haʼu hanoin haʼu sei mate. . . . Maibé loloos, nia salva ami hotu. Ami agradese ba Jeová tanba ami iha família espirituál neʼebé hadomi ami, halo orasaun ba ami, no mós prontu atu tau sira-nia moris iha perigu laran hodi salva ami.”

Pylyp no irmaun ida seluk deside atu lori ai-han ba maluk sira iha sidade Borodianka. Iha 17 Marsu, kuandu sira lori karreta ba sidade neʼe, soldadu sira hapara Pylyp nia karreta no hadau ai-han. Tuirmai sira tahan irmaun naʼin-rua neʼe, tau aljemas no taka sira-nia matan ho hena, no lori sira ba kuartu kiʼik ida iha rai okos hamutuk ho mane naʼin-hitu. Loron rua tuirmai, ema hatama sira ba kadeia no guarda sira halo violénsia ba sira durante kalan neʼe. Pylyp dehan: “Haʼu la hatene se haʼu bele moris ka lae. Haʼu halo orasaun atu haʼu bele laran-metin nafatin.”

Durante ema baku sira, Pylyp komesa halo orasaun ho lian hodi temi kona-ba irmán ferik sira neʼebé la iha ai-han, ninia família rasik, no nia fó obrigadu ba Jeová tanba bele serbí Jeová ho kontente ba tinan barak. Guarda neʼe lori fali Pylyp ba kadeia, no Pylyp kontinua halo orasaun ba soldadu sira hodi sira bele komprende katak irmaun sira-neʼe laʼós ema perigu. Irmaun rua neʼe hahú haklaken ba guarda sira. Durante loron rua, sira haklaken ba guarda hotu neʼebé sira hasoru. Laʼós neʼe deʼit, mane prizioneiru ida hatudu interese ba Bíblia. Nia fó obrigadu ba irmaun sira-neʼe. Ikusmai iha 27 Marsu, irmaun sira-neʼe no mane neʼebé hatudu interese sai livre.

Irmán klosan ida naran Svitlana husi Bucha labele halai sai husi área funu nian durante semana rua. Nia dehan: “Agora haʼu komprende liután katak dame husi Jeová mak importante tebes. Hetan Maromak nia dame la dehan katak ita sempre hatene saida mak ita presiza halo. Maibé kuandu ita la hatene solusaun ba ita-nia problema, ita sadere tomak ba Jeová.”

Bainhira Svitlana halo viajen ba área neʼebé seguru liu iha Ukránia, nia haklaken ba feto ida no ninia sobriñu. Sira hotu toʼo iha área neʼebé seguru no família Testemuña ida mak hasoru sira. Família neʼe fó hela-fatin ba Svitlana no mós feto neʼe ho ninia sobriñu iha kalan neʼe. Loron tuirmai, feto neʼe husu oinsá atu tuir reuniaun no husu mós Bíblia no ita-nia livru. Svitlana kontinua kontaktu ho nia.

Iha loron 12 Abríl 2022, iha relatóriu foun kona-ba Ukránia. Númeru sira-neʼe bazeia ba relatóriu sira neʼebé konfirma ona husi irmaun sira iha neʼebá. Maibé, karik loloos sei iha barak liután, tanba susar atu komunika ho área hotu iha Ukránia.

• Irmaun-irmán naʼin-28 mate

• Irmaun-irmán naʼin-48 hetan kanek

• Irmaun-irmán naʼin-40.778 husik sira-nia uma hodi halai ba fatin seluk neʼebé seguru liu

• Uma 278 rahun hotu

• Uma 268 hetan estragu boot

• Uma 746 hetan estragu uitoan

• Reuniaun-Fatin 1 rahun

• Reuniaun-Fatin 9 hetan estragu boot

• Reuniaun-Fatin 26 hetan estragu uitoan

• Komisaun ba dezastre hamutuk 27 mak ajuda daudaun iha Ukránia

• Komisaun ba dezastre ajuda irmaun-irmán naʼin-41.974 atu hetan hela-fatin iha área neʼebé seguru liu

• Irmaun-irmán naʼin-18.097 halai ona ba nasaun seluk no irmaun-irmán husi nasaun sira-neʼe ajuda sira