Haʼu sai boot iha área hakmatek besik sidade Tampere iha rai-Finlándia. Haʼu-nia família ladún relijiozu, maibé hafolin edukasaun no hahalok diʼak. Haʼu-nia inan mak ema Alemaña, no bainhira haʼu kiʼik dala ruma haʼu vizita avó sira iha Alemaña Oeste.

 Haʼu gosta desportu husi kiʼik kedas. Kuandu haʼu sei labarik, haʼu halo desportu oioin, maibé kuandu haʼu tinan 14, haʼu deside atu fokus ba tenis. Bainhira tinan 16, loroloron haʼu tuir treinamentu profisionál dala rua iha loron, no mós haʼu treinu mesak iha kalan. Haʼu gosta buat hotu kona-ba tenis, no neʼe treinu haʼu-nia mentál no fíziku. Haʼu mós gosta ransu ho kolega sira no dala ruma hemu serveja hamutuk, maibé haʼu nunka uza droga ka hemu tua demais. Tenis mak buat neʼebé importante liu iha haʼu-nia moris.

 Haʼu komesa tuir torneiu ATP bainhira haʼu tinan 17. a Depois manán tiha iha torneiu balu, haʼu sai famozu iha rai-Finlándia. Kuandu tinan 22, haʼu-nia naran tama iha lista ema na’in-50 neʼebé joga tenis makaʼas iha mundu tomak.

 Durante tinan barak, haʼu ba rai oioin iha mundu tomak nuʼudar jogadór profisionál. Haʼu haree fatin balu neʼebé furak, maibé haʼu mós nota katak iha problema barak iha mundu, inklui krime, ema uza droga, no problema ho ambiente. Porezemplu, kuandu haʼu iha Estadus Unidus, ema bandu ami atu labele ba área balu iha sidade laran tanba iha krime oioin no perigu demais. Haʼu sente la diʼak kona-ba buat hotu neʼe. Maski haʼu halo duni buat neʼebé haʼu gosta tebes, maibé haʼu la sente kontente.

 Haʼu-nia namorada, Sanna komesa estuda Bíblia ho Testemuña ba Jeová. Foufoun haʼu goza nia uitoan, maibé haʼu la kontra. Ami kaben iha tinan 1990, no tinan tuirmai nia hetan batizmu nuʼudar Testemuña ba Jeová. Kona-ba haʼu, haʼu laʼós ema neʼebé relijiozu, maibé haʼu fiar katak Maromak iha. Haʼu hanoin-hetan uluk haʼu-nia avó-feto iha rai-Alemaña sempre lee Bíblia, no nia mós hanorin haʼu oinsá atu halo orasaun.

 Loron ida, bainhira Sanna no haʼu vizita kaben-naʼin Testemuña ida, laʼen neʼebé naran Kari hatudu mai haʼu Bíblia nia profesia kona-ba “loron ikus sira”. (2 Timóteo 3:1-5) Neʼe kona loos haʼu-nia laran, tanba haʼu rekoñese katak neʼe esplika tanbasá mak mundu neʼe aat tebes. Iha loron neʼe, ami ladún koʼalia tan kona-ba relijiaun. Maibé husi tempu neʼebá, haʼu ho Kari komesa koʼalia hamutuk kona-ba Bíblia, no haʼu sente katak buat hotu neʼebé haʼu aprende mak lójiku. Haʼu-nia moris mak okupadu tebes no haʼu sempre halo viajen ba fatin oioin, tan neʼe susar ba ami atu hasoru malu beibeik, maibé Kari la rende an. Nia hakerek karta hodi hatán pergunta sira neʼebé haʼu husu durante ami-nia estuda Bíblia. Bíblia fó resposta ba pergunta kleʼan hotu kona-ba ita-nia moris iha dalan lójiku, no neineik-neineik haʼu komprende Bíblia nia tema mak kona-ba Maromak sei kumpre ninia objetivu hotu liuhusi ninia Ukun. Haʼu mós aprende kona-ba Maromak nia naran Jeová, no mós buat neʼebé nia halo ona mai ita, neʼe kona haʼu-nia laran. (Salmo 83:18) Buat neʼebé book tebes haʼu-nia laran mak Maromak nia arranju kona-ba Jesus nia sakrifísiu neʼebé kasu ita-nia sala. Arranju neʼe laʼós deʼit dalan ba Maromak atu rezolve problema hotu tuir justisa, maibé neʼe mak dalan neʼebé Maromak hatudu ninia domin boot. (João 3:16) Haʼu mós aprende katak haʼu iha oportunidade atu sai Maromak nia belun no moris ba nafatin iha paraízu neʼebé nakonu ho dame. (Tiago 4:8) Haʼu komesa husu ba haʼu-nia an: ‘Oinsá mak haʼu bele hatudu agradese ba Maromak?’

 Haʼu hanoin didiʼak kona-ba haʼu-nia moris. Haʼu aprende husi Bíblia katak ita bele sai kontente liu kuandu fó, no haʼu hakarak haklaken ba ema seluk kona-ba haʼu-nia fiar. (Apóstolu 20:35) Nuʼudar jogadór profisionál haʼu dook husi uma maizumenus loron 200 iha tinan ida nia laran. Haʼu-nia oráriu no treinamentu fó impaktu boot ba haʼu-nia família nia moris. Haʼu rekoñese katak haʼu tenkesér halo mudansa.

 Haʼu hatene katak se haʼu para nuʼudar jogadór profisionál tanba relijiaun, ema barak sei la komprende. Maibé oportunidade atu koñese Jeová liután no simu moris rohan-laek mak folin-boot liu fali prémiu naran deʼit neʼebé haʼu bele manán, entaun la susar ba haʼu atu foti desizaun. Haʼu deside atu la tau atensaun ba ema seluk nia liafuan tanba neʼe mak haʼu-nia desizaun. Eskritura neʼebé anima tebes haʼu atu hamriik metin mak Salmo 118:6 neʼebé dehan: “Jeová iha haʼu-nia sorin; haʼu sei nunka taʼuk. Saida mak ema bele halo ba haʼu?”

 Iha tempu neʼebá, sponsor balu oferese kontratu neʼebé diʼak tebes no neʼe sei apoia haʼu-nia moris nuʼudar jogadór. Se haʼu simu ida-neʼe, haʼu bele kontinua moris nuʼudar jogadór ba tinan barak no la presiza hanoin barak kona-ba osan. Maibé haʼu deside tiha ona saida mak haʼu sei halo, entaun haʼu la simu buat neʼebé sira oferese no depois tempu balu haʼu para tuir torneiu ATP. Haʼu kontinua estuda Bíblia, no iha loron 2 Jullu 1994 haʼu hetan batizmu nuʼudar Testemuña ba Jeová.

 Haʼu komesa hanoin kona-ba Maromak, laʼós tanba hasoru terus boot ka tanba haʼu buka lia-loos husi tempu uluk. Haʼu sente katak haʼu iha moris neʼebé diʼak no haʼu kontente ona. Maski nuneʼe, haʼu aprende katak loloos ita-nia moris iha objetivu boot liután, no haʼu sente hanesan lia-loos husi Bíblia hein haʼu atu buka-hetan ida-neʼe. Haʼu-nia moris sai diʼak liu fali buat neʼebé haʼu bele imajina! Haʼu-nia família nia relasaun diʼak sai metin liután no iha unidade liután. No haʼu kontente tebes tanba haʼu-nia oan-mane naʼin-tolu mós moris tuir haʼu-nia ezemplu, laʼós nuʼudar jogadór, maibé nuʼudar ema Kristaun.

 Haʼu gosta tenis toʼo agora. Durante tinan barak, haʼu halo serbisu neʼebé liga ho tenis hanesan nuʼudar treinadór no tau matan tenis-fatin. Maibé haʼu la tau uluk desportu iha haʼu-nia moris. Uluk, haʼu treinu durante oras barak semana-semana hodi sai jogadór neʼebé diʼak liután atu bele manán. Agora nuʼudar haklaken-naʼin tempu tomak, haʼu kontente atu uza haʼu-nia tempu hodi ajuda ema seluk aprende no aplika Bíblia nia prinsípiu sira neʼebé troka ona haʼu-nia moris. Haʼu hetan ksolok neʼebé boot tebes kuandu tau uluk haʼu-nia relasaun diʼak ho Maromak Jeová no fahe esperansa furak ba ema seluk.​—1 Timóteo 6:19.