Haʼu boot nuʼudar ema Katólika iha sidade Rochester, Novaiorke. Haʼu-nia inan-aman fahe malu bainhira haʼu tinan ualu. Entaun iha loron baileet, haʼu hela ho amá iha uma aluga ba ema kiak sira, no iha findesemana haʼu hela hamutuk ho apá iha área neʼebé iha ema riku barak. Haʼu haree katak susar duni ba haʼu-nia amá atu haboot oan naʼin-neen. Neʼe halo haʼu hakarak sai riku hodi bele ajuda haʼu-nia família.

 Apá hakarak haʼu atu hetan susesu, entaun nia arranja atu haʼu vizita eskola neʼebé famozu kona-ba sai manajer ba otél. Haʼu gosta tebes eskola neʼe no aplika ba eskola neʼe, haʼu sente katak Maromak hatán haʼu-nia orasaun kona-ba sai ema riku no moris kontente. Haʼu estuda kona-ba administrasaun ba otél, lei oioin kona-ba halaʼo negósiu, no sistema finansas durante tinan lima no durante tempu neʼe, haʼu serbisu iha otél kasino iha sidade Las Vegas, Nevada.

 Bainhira tinan 22, haʼu sai asistente ba vise-prezidente iha otél kasino. Ema haree haʼu nuʼudar ema riku no susesu, dala barak haʼu han hahán neʼebé diʼak liu no hemu tua neʼebé karun liu. Haʼu-nia kolega sira dehan: “Fokus ba osan, tanba neʼe mak buat neʼebé importante liu iha mundu.” Tuir sira-nia hanoin, osan mak xave atu hetan ksolok neʼebé loos.

 Haʼu-nia serbisu mak atu atende no tau matan ba ema riku sira neʼebé mai Las Vegas atu taru osan. Maski sira mak ema riku, sira haree la kontente. Haʼu mós komesa sente ladún kontente. Tuir loloos, nuʼudar haʼu sai riku liután, haʼu sai laran-susar liután no haʼu labele toba-dukur iha kalan. Haʼu komesa hanoin atu oho an. Haʼu lakon ona esperansa iha haʼu-nia moris, no haʼu halo orasaun ba Maromak hodi husu: “Oinsá haʼu bele hetan kontente neʼebé loos?”

 Maizumenus iha tempu neʼebá, haʼu-nia biin naʼin-rua neʼebé sai ona Testemuña ba Jeová muda mai Las Vegas. Maski haʼu la simu livru husi sira, maibé haʼu konkorda atu lee haʼu-nia Bíblia hamutuk sira. Iha haʼu-nia Bíblia, Jesus nia liafuan hakerek ho kór-mean. Tanba haʼu fiar buat hotu neʼebé Jesus koʼalia, haʼu-nia biin sira koʼalia mai haʼu liuliu kona-ba Jesus nia liafuan. Haʼu mós lee Bíblia kuandu haʼu mesak.

 Buat barak neʼebé haʼu lee husi Bíblia halo haʼu hakfodak. Porezemplu, Jesus dehan: “Bainhira imi halo orasaun, la bele koalia fila ba fila mai hanesan fali jentiu sira, tanba sira hanoin dehan harohan ho liafuan naruk mak foin sira-nia maromak simu.” (Mateus 6:7, Bíblia Kadi Kapasidade) Maibé, uluk padre ida fó haʼu Jesus nia imajen no dehan katak se haʼu halo orasaun ba imajen neʼe, hodi repete orasaun Ami Aman dala sanulu no Ave Maria dala sanulu, Maromak sei fó haʼu osan boot tuir haʼu-nia presiza. Maibé se haʼu halo orasaun hodi repete beibeik liafuan neʼebé hanesan, neʼe hanesan koʼalia fila ba fila mai. Haʼu mós lee Jesus nia liafuan neʼebé dehan: “Keta bolu ema ida aman iha rai, basá imi-nia Aman ida deʼit, neʼebé iha lalehan.” (Mateus 23:9, Liafuan diak ba imi, segunda edisaun) Entaun haʼu husu ba haʼu-nia an: ‘Tanbasá mak haʼu no haʼu-nia maluk Katólika sira bolu amlulik sira nuʼudar “Padre”?’

 Loron ida, haʼu lee livru Tiago iha Bíblia, no haʼu komesa hanoin kleʼan kona-ba haʼu-nia moris. Tiago kapítulu 4 dehan: “Imi la hatene katak wainhira imi habelun ho mundu, imi halo funu hasoru Maromak? Neʼe duni, ema neʼebé hakarak habelun mundu halo nia an Maromak nia funu-balun.” (Tiago 4:4, Liafuan diak ba imi, segunda edisaun) No versíkulu 17 kona tan haʼu-nia laran: “Ema neʼebé hatene buat neʼebé loos maibé la halo nia, halo sala.” Entaun haʼu telefone haʼu-nia biin sira no fó-hatene sira katak haʼu sei para serbisu iha otél kasino tanba serbisu neʼe envolve buat barak neʼebé haʼu lakohi halo tan, inklui taru osan no hahalok kaan-teen.

 Haʼu hakarak hametin haʼu-nia relasaun ho Maromak, no mós ho haʼu-nia inan-aman no mós biin-alin sira. Entaun haʼu deside atu halo haʼu-nia moris simples hodi bele iha tempu atu halo ida-neʼe. Maibé la fasil atu halo mudansa. Porezemplu, otél neʼebé haʼu serbisu oferese pozisaun neʼebé aas liu ho saláriu boot dala rua ka dala tolu. Maibé depois halo tiha orasaun, haʼu deside katak haʼu lakohi kontinua halaʼo moris hanesan neʼe. Haʼu husik haʼu-nia serbisu, muda ba amá nia armazén, no komesa serbisu kiʼik atu pres restaurante nia menu sira.

 Maski Bíblia ajuda haʼu atu tau uluk buat neʼebé importante iha haʼu-nia moris, maibé haʼu nafatin lakohi tuir reuniaun husi Testemuña ba Jeová. Haʼu-nia biin sira husu haʼu kona-ba tanbasá haʼu la gosta Testemuña sira. Haʼu hatán: “Imi-nia Maromak Jeová haketak família. Haʼu iha tempu atu hamutuk ho família só deʼit iha loron Natál no mós selebra tinan, maibé imi la selebra loron sira-neʼe.” Haʼu-nia biin ida komesa tanis no husu haʼu: “Ó iha neʼebé iha loron sira seluk? Ami hakarak hamutuk ho ó iha tempu naran deʼit. Maibé ó hakarak mai só deʼit iha loron-boot sira-neʼe tanba ó hanoin katak ó presiza mai.” Ninia liafuan neʼe kona loos haʼu-nia laran, no haʼu mós komesa tanis hamutuk ho nia.

 Neʼe mak tempu neʼebé haʼu komprende katak haʼu mak hanoin sala no loloos Testemuña ba Jeová hadomi sira-nia família. Entaun haʼu deside atu tuir sira-nia reuniaun ida. Iha neʼebá, haʼu hasoru Kevin, Testemuña ida neʼebé iha esperiénsia atu hanorin Bíblia ba ema no haʼu komesa estuda Bíblia ho nia.

 Kevin no ninia feen halaʼo moris neʼebé simples hodi nuneʼe sira bele uza tempu barak atu ajuda ema seluk komprende Bíblia. Sira mós uza sira-nia osan rasik atu bá Áfrika no Amérika Sentrál hodi ajuda harii sukursál ba Testemuña sira iha rai sira-neʼe. Sira moris kontente loos no hadomi malu. Haʼu hanoin: ‘Haʼu hakarak tebes atu moris hanesan sira.’

 Kevin hatudu mai haʼu vídeo ida kona-ba oinsá misionáriu sira moris kontente, no haʼu deside katak neʼe mak buat neʼebé haʼu hakarak halo. Iha tinan 1995, depois haʼu estuda didiʼak Bíblia durante fulan neen, haʼu hetan batizmu nuʼudar Testemuña ba Jeová. Bainhira haʼu halo orasaun, haʼu la husu tan rikusoin, maibé haʼu husu: “Labele husik haʼu sai kiak ka sai riku.”—Provérbios 30:8.

 Haʼu hetan ona rikusoin neʼebé loos. Rikusoin neʼe laʼós osan, maibé neʼe mak haʼu-nia relasaun diʼak ho Maromak no moris neʼebé kontente. Haʼu hasoru haʼu-nia feen doben Nuria iha rai-Onduras, no uluk ami hamutuk serbí nuʼudar misionáriu iha rai-Panamá no agora ami serbí nuʼudar misionáriu iha rai-Méxiku. Haʼu sente katak Bíblia nia liafuan tuirmai mak loos duni: “Bensaun husi Jeová mak halo ema sai riku, no nia la fó susar hamutuk ho ida-neʼe.”—Provérbios 10:22.