Haʼu-nia família husi rai-Tonga, nasaun neʼebé inklui illa maizumenus 170 iha tasi Pasífiku Súl parte oeste. Iha rai-Tonga ami moris simples no la iha karreta ka eletrisidade. Maibé ami-nia uma iha bee ho torneira, no ami mós hakiak manu. Kuandu feriadu, haʼu, haʼu-nia maun no alin ajuda ami-nia aman atu halo toʼos. Ami iha hudi, talas, kumbili, no ai-farina. Haʼu-nia aman hetan osan uitoan husi toʼos neʼe atu apoia família tanba osan husi ninia serbisu seluk uitoan deʼit. Hanesan ema barak iha rai-Tonga, ami-nia família iha respeitu kleʼan ba Bíblia no ami toman atu bá misa. Maibé, ami fiar katak atu iha moris diʼak ami presiza muda ba nasaun neʼebé riku liu.

 Bainhira haʼu tinan 16, haʼu-nia tiu ajuda ami-nia família atu muda ba Kalifórnia, Estadus Unidus. Neʼe la fasil tanba iha neʼebá kultura la hanesan duni ho ami-nian. Maski ami-nia osan aumenta, ami hela iha fatin neʼebé iha ema kiak barak, violénsia no droga. Iha kalan ami sempre rona ema tiru malu no viziñu hotu taʼuk gang sira. Ema barak lori kilat atu proteje sira-nia an no mós atu oho fali sira-nia inimigu. Kartús ida sei iha hela haʼu-nia hirus matan husi tempu neʼebé ema tiru malu.

 Iha eskola sekundária, haʼu hakarak joven seluk atu simu haʼu. Entaun haʼu komesa tuir festa boot sira, hemu lanu, halo violénsia no uza droga. Ikusmai haʼu toman uza droga neʼebé forte. Hodi hetan osan atu hola droga, haʼu sai naʼok-teen. Maski nuʼudar família ami sempre bá misa, maibé haʼu nunka hetan ajuda atu tahan hasoru kolega neʼebé tenta haʼu atu halo sala. Dala barak polísia kaer haʼu tanba halo violénsia. Haʼu-nia moris sai aat no arbiru liután, no ikusmai haʼu tama komarka.

 Iha tinan 1997 bainhira haʼu sei iha komarka, iha dadur ida neʼebé haree haʼu kaer hela Bíblia. Neʼe mak tempu Natál no baibain ema Tonga haree tempu neʼe nuʼudar santu liu. Nia husu se haʼu hatene saida mak loloos Bíblia dehan kona-ba tempu neʼebé Kristu moris, maibé haʼu la hatene buat neʼebé Bíblia dehan. Nia hatudu husi Bíblia buat neʼebé akontese kuandu Jesus moris, no haʼu haree katak Bíblia la temi buat neʼebé relijiaun barak hanorin. (Mateus 2:1-12; Lucas 2:5-14) Haʼu hakfodak loos, no haʼu hanoin kona-ba saida tan mak Bíblia hanorin. Mane neʼe baibain tuir reuniaun husi Testemuña ba Jeová neʼebé halaʼo iha komarka laran, no haʼu mós foti desizaun atu tuir. Tempu neʼe sira koʼalia kona-ba livru Apokalipse. Maski haʼu ladún komprende buat neʼebé sira dehan, haʼu rekoñese katak buat hotu neʼebé sira hanorin mai husi Bíblia.

 Bainhira Testemuña ba Jeová husu se haʼu hakarak estuda Bíblia ho sira, haʼu simu ho kontente. Ba dala primeiru, haʼu aprende kona-ba Bíblia nia promesa ba futuru atu halo mundu sai paraízu. (Isaias 35:5-8) Se haʼu hakarak halo Maromak kontente, haʼu presiza halo mudansa boot iha haʼu-nia moris. Haʼu hatene katak Maromak Jeová sei la husik haʼu tama paraízu se haʼu la troka haʼu-nia hahalok aat. (1 Korinto 6:9, 10) Tan neʼe haʼu halo desizaun atu kontrola haʼu-nia hirus, la fuma, no nunka tan hemu lanu no uza droga.

 Iha tinan 1999, antes haʼu sai husi komarka, sira muda haʼu ba komarka seluk. Ba tinan ida liu, haʼu labele kontaktu Testemuña ba Jeová sira. Maibé haʼu laran-metin atu kontinua troka haʼu-nia moris. Iha tinan 2000, governu deporta haʼu husi Estadus Unidas no haruka haʼu fila ba Tonga.

 Bainhira fila ba Tonga, haʼu kontaktu kedas Testemuña ba Jeová no komesa estuda fali Bíblia ho sira. Haʼu gosta loos buat neʼebé haʼu aprende, no haʼu kontente kuandu haree Testemuña ba Jeová iha Tonga sira-nia hanorin mós bazeia ba eskritura husi Bíblia hanesan ho irmaun sira iha Estadus Unidus.

 Iha ami-nia aldeia haʼu-nia aman mak ema boot tanba nia iha pozisaun aas iha ninia igreja. Tan neʼe haʼu-nia família konfuzaun no hirus uitoan kuandu haʼu ransu ho Testemuña ba Jeová. Maibé ikusmai haʼu-nia inan-aman kontente katak Bíblia nia matadalan ajuda haʼu hadiʼa haʼu-nia moris.

 Buat ida neʼebé susar tebes ba haʼu atu troka mak hemu kava, neʼebé ema barak hemu demais iha Tonga. Mane barak gasta oras barak semana-semana hodi hemu kava neʼebé halo husi pimenta nia abut no bele halo ema lanu. Tempu neʼe haʼu foin fila ba haʼu-nia rai no haʼu komesa iha toman atu kalan-kalan bá hemu kava ho ema seluk toʼo lanu no besik dezmaia. Problema neʼe mós akontese tanba haʼu toman ransu ho kolega neʼebé la hafolin Bíblia nia matadalan. Ikusmai, irmaun sira ajuda haʼu komprende katak haʼu-nia toman neʼe hakanek Maromak. Haʼu halo mudansa hodi bele hetan Maromak nia bensaun no halo nia kontente.

 Haʼu komesa tuir reuniaun hotu husi Testemuña ba Jeová. Tanba haʼu ransu ho ema neʼebé hakarak halo Maromak kontente, neʼe ajuda haʼu atu tahan hasoru tentasaun. Iha tinan 2002, haʼu hetan batizmu hodi sai Testemuña ba Jeová.

 Maromak nia pasiénsia ajuda haʼu hanesan temi iha Bíblia: “Jeová . . . hatudu pasiénsia ba imi tanba nia lakohi ema ida lakon maibé nia hakarak ema hotu atu arrepende sala.” (2 Pedro 3:9) Loloos Jeová bele halakon mundu aat neʼe tinan barak liubá, maibé nia la halo nuneʼe hodi ema hanesan haʼu bele iha relasaun diʼak ho nia. Haʼu hanoin katak karik nia sei uza haʼu atu ajuda ema seluk mós troka sira-nia moris.

 Ho Jeová nia ajuda haʼu la estraga tan haʼu-nia moris. Uluk haʼu naʼok atu hola droga, maibé agora para ona. Liután neʼe, haʼu koko ajuda haʼu-nia maluk sira atu sira mós sai Jeová nia belun. Depois hetan batizmu no sai Testemuña ba Jeová, haʼu mós hetan feen neʼebé laran-diʼak, naran Tea. Agora ami iha oan-mane ida no ami-nia moris família nian mak kontente loos. Hamutuk ami hanorin ema seluk kona-ba esperansa ba futuru husi Bíblia atu moris ba nafatin iha paraízu neʼebé nakonu ho dame.