Haʼu moris iha sidade La Ceiba, rai-Onduras. Haʼu iha biin naʼin-haat no haʼu mak oan-ikun. Iha família laran, haʼu mesak deʼit mak defisiente tilun. Ami-nia família hela iha área neʼebé nakonu ho krime oioin, no ami mak kiak tebes. Ami-nia moris sai susar liután bainhira apá mate iha asidente durante serbisu, iha tempu neʼebá haʼu maizumenus tinan haat.

 Amá hakaʼas an atu tau matan haʼu-nia biin sira no haʼu, maibé dala barak ninia osan la toʼo atu sosa haʼu-nia roupa. Kuandu udan, haʼu sente malirin tanba haʼu la iha roupa manas.

 Nuʼudar haʼu sai boot, haʼu aprende Língua Jestual Onduras (LESHO) atu haʼu bele komunika ho ema seluk neʼebé defisiente tilun. Maibé amá no haʼu-nia biin sira la hatene Língua Jestual Onduras, sira uza deʼit sinál balu neʼebé sira rasik mak inventa atu komunika ho haʼu. Maibé amá hadomi haʼu no proteje haʼu husi perigu oioin. Nia uza sinál balu hodi fó avizu mai haʼu atu haʼu bele hasees an husi hahalok la diʼak hanesan fuma no hemu tua demais. Tan neʼe haʼu nunka monu ba problema hanesan neʼe.

 Bainhira haʼu kiʼik, amá lori haʼu ba igreja Katólika, maibé haʼu la komprende buat ida tanba la iha ema neʼebé tradús mai haʼu. Haʼu sente baruk loos no para bá igreja bainhira haʼu tinan 10. Maski nuneʼe, haʼu hakarak hatene liután kona-ba Maromak.

 Iha tinan 1999, kuandu haʼu tinan 23, haʼu hasoru feto ida husi Estadus Unidus neʼebé tuir igreja evanjéliku. Nia hanorin haʼu kona-ba Bíblia no mós Língua Jestual Amerikanu (ASL). Haʼu gosta tebes buat neʼebé haʼu aprende kona-ba Bíblia, no haʼu deside atu sai pastór. Tan neʼe, haʼu muda ba rai-Porturriku atu hetan treinamentu Kristaun iha fatin ba ema defisiente tilun. Bainhira haʼu fila ba La Ceiba iha tinan 2002, haʼu harii igreja ba ema defisiente tilun sira hamutuk ho haʼu-nia kolega balu. Sira ida mak Patricia, no ikusmai nia sai haʼu-nia feen.

 Nuʼudar pastór, haʼu fó diskursu ho língua LESHO, hatudu dezeñu oioin kona-ba istória husi Bíblia, no halo drama oioin neʼebé bazeia ba Bíblia atu ajuda ema defisiente tilun komprende. Haʼu mós vizita ema oioin neʼebé defisiente tilun iha sidade seluk neʼebé besik hodi anima no ajuda sira tahan hasoru sira-nia problema oioin. Haʼu mós halo viajen nuʼudar misionáriu hodi bá Estadus Unidus no rai-Zámbia. Maibé realidade mak haʼu ladún hatene buat barak kona-ba Bíblia. Haʼu hanorin deʼit buat neʼebé uluk haʼu aprende no buat neʼebé haʼu komprende husi dezeñu sira. Tuir loloos, haʼu iha pergunta barak tebes neʼebé la hetan resposta.

 Loron ida, ema balu husi haʼu-nia igreja komesa habelar lia-bosok oioin kona-ba haʼu. Sira dehan katak haʼu mak lanu-teen no la laran-metin ba haʼu-nia feen. Neʼe halo haʼu laran-kraik no sente hirus. Lakleur depois neʼe, Patricia no haʼu husik igreja neʼe.

 Uluk Testemuña ba Jeová vizita beibeik Patricia no haʼu, maibé ami nunka rona ba sira. Depois ami husik ami-nia igreja, Patricia komesa estuda Bíblia ho feen-laʼen Testemuña, naran Thomas no Liccy. Haʼu hakfodak tanba maski sira laʼós defisiente tilun, maibé sira hatene língua jestual. Entaun lakleur haʼu tuir sira-nia estuda.

 Ami estuda ba fulan balu hodi uza vídeo ASL nian. Maibé bainhira ami-nia kolega balu duun katak Testemuña ba Jeová tuir deʼit ema, ami para estuda Bíblia ho sira. Maski Thomas hatudu evidénsia ba haʼu katak Testemuña ba Jeová la tuir ema nuʼudar sira-nia ulun-naʼin, maibé haʼu la fiar.

 Fulan balu liutiha, kuandu Patricia hetan depresaun makaʼas, nia halo orasaun hodi husu Maromak atu book Testemuña ba Jeová mai fali ami-nia uma. Lakleur deʼit, viziñu ida neʼebé Testemuña vizita Patricia no nia oferese atu husu Liccy mai vizita Patricia. Liccy hatudu katak nia mak belun neʼebé loos. Nia vizita Patricia semana-semana hodi anima nia no estuda Bíblia ho nia. Maibé, haʼu sei duvida ho Testemuña sira.

 Iha tinan 2012, Testemuña ba Jeová halo kampaña espesiál hodi fahe DVD Ita Hakarak Hatene Lia-Loos ka lae? iha língua LESHO. Liccy fahe DVD neʼe mai ami. Bainhira haʼu haree, haʼu hakfodak loos hodi hatene katak doutrina barak neʼebé uluk haʼu hanorin hanesan infernu no mate-klamar, la mai husi Bíblia.

 Iha semana tuirmai, haʼu bá Reuniaun-Fatin husi Testemuña ba Jeová atu koʼalia ho Thomas. Haʼu dehan ba nia katak haʼu hakarak hanorin lia-loos kona-ba Bíblia ba ema seluk neʼebé defisiente tilun, maibé laʼós nuʼudar Testemuña ba Jeová. Haʼu-nia hakarak mak harii haʼu-nia igreja rasik ba ema defisiente tilun. Thomas gaba haʼu-nia laran-manas kona-ba neʼe, maibé nia mós hatudu Éfeso 4:5 neʼebé dehan katak kongregasaun Kristaun neʼebé loos presiza iha unidade.

 Thomas mós hatudu mai haʼu vídeo Testemuña ba Jeová—Hatudu fiar liuhusi hahalok, parte 1 Sai husi nakukun laran iha Língua Jestual Amerikanu. Vídeo neʼe hatudu oinsá mak mane grupu ida buka-hatene didiʼak kona-ba Bíblia atu bele komprende lia-loos báziku husi Bíblia. Nuʼudar haʼu nonton vídeo neʼe, haʼu komprende buat neʼebé mane sira-neʼe sente. Hanesan sira, haʼu mós buka lia-loos. Vídeo neʼe halo haʼu fiar metin katak Testemuña sira hanorin lia-loos tanba sira-nia fiar bazeia deʼit ba Bíblia. Entaun haʼu komesa fali estuda Bíblia, no iha tinan 2014, haʼu no Patricia hetan batizmu nuʼudar Testemuña ba Jeová.

 Haʼu gosta kongregasaun husi Testemuña ba Jeová tanba moos iha dalan morál, hanesan ho Maromak neʼebé moos. Ema neʼebé serbí Jeová koʼalia liafuan moos no hatudu hahalok neʼebé moos ba malu. Sira iha dame no anima malu. Testemuña sira iha unidade no sira hotu hanorin lia-loos neʼebé hanesan husi Bíblia, maski sira hela iha nasaun oioin no koʼalia língua la hanesan.

 Haʼu hetan haksolok hodi aprende buat neʼebé Bíblia hanorin. Porezemplu, haʼu aprende katak Jeová mak Maromak neʼebé Kbiit Boot Liu Hotu, no Ukun-Naʼin Boot Liu. Nia hadomi ema hotu, ema neʼebé defisiente tilun no mós ema neʼebé bele rona. Haʼu hafolin Maromak nia domin ba haʼu. Haʼu mós aprende katak mundu neʼe sei sai paraízu furak no ita iha oportunidade atu moris ba nafatin ho saúde perfeitu. Haʼu hein namanas ba tempu neʼe!

 Haʼu no Patricia gosta tebes atu haklaken kona-ba Bíblia ba ema oioin neʼebé defisiente tilun. Agora, haʼu estuda Bíblia ho ema balu neʼebé sai membru ba igreja neʼebé uluk ami harii. Uluk bainhira haʼu sai pastór, haʼu iha pergunta oioin kona-ba buat neʼebé haʼu hanorin. Maibé ikusmai haʼu hetan resposta ba haʼu-nia pergunta sira liuhusi estuda Bíblia hamutuk ho Testemuña ba Jeová.