Ema barak mai vizita bee-tudak neʼebé besik sidade Pagsanjan iha rai-Filipinas. Iha neʼebá haʼu-nia aman, naran Nardo Leron, sai boot iha família neʼebé kiak tebes. Bainhira nia haree korrupsaun iha governu, polísia no ninia serbisu-fatin, nia sai la kontente no hirus.

 Haʼu-nia inan-aman serbisu kole hodi sira bele haboot oan naʼin-ualu. Dala barak, sira serbisu dook no la fila ba uma ba tempu kleur tanba halo toʼos iha foho. Baibain, la iha ema atu tau matan ba haʼu no haʼu-nia maun Rodelio, no dala barak ami hamlaha deʼit. Tempu neʼebá, maski ami sei labarik, ami la iha tempu atu halimar. Bainhira ami tinan hitu, ami ida-idak komesa halo toʼos, no leba nuu todan nuʼudar ami saʼe foho nia dalan kloot sira. Se ami labele hiʼit nuu tanba todan liu, ami tenke dada deʼit.

 Ami-nia aman baibain baku ami, maibé ami triste liu bainhira haree nia baku ami-nia inan. Ami koko atu hapara nia, maibé la konsege. Tempu neʼe, Rodelio no haʼu halo planu katak ami sei oho ami-nia aman kuandu ami boot ona. Haʼu hakarak deʼit aman neʼebé hatudu domin ba ami.

 Bainhira haʼu tinan 14 haʼu labele tahan ona no husik uma tanba hirus ho haʼu-nia aman nia violénsia. Ba tempu uitoan haʼu la iha uma no hela iha dalan, no haʼu komesa fuma ganja. Ikusmai haʼu hetan serbisu iha ró, no lori ema atu haree bee-tudak.

 Tinan balu liutiha, haʼu bá universidade iha sidade Manila. Maibé haʼu la iha tempu atu estuda tanba findesemana haʼu tenke fila ba Pagsanjan hodi serbisu. Haʼu sente katak haʼu-nia moris la iha objetivu, no maski haʼu fuma ganja, neʼe la hamenus ona haʼu-nia estrese. Tan neʼe haʼu koko droga seluk neʼebé forte liu. Baibain ema neʼebé uza droga mós hola parte iha sala seksuál. Loroloron haʼu haree ema neʼebé kiak, la iha justisa, no hetan terus. Haʼu hakribi governu no hanoin katak problema hotu mak husi sira. Haʼu husu Maromak, “Tansá mak moris hanesan neʼe?” No maski haʼu buka-hatene relijiaun oioin, haʼu la hetan resposta. Haʼu uza droga barak tan hodi taka haʼu-nia laran-triste.

 Iha tinan 1972, estudante sira iha rai-Filipinas halo demonstrasaun hasoru governu. Haʼu mós hola parte, no ikusmai violénsia mosu. Polísia kaer ema barak, no liutiha fulan balu, governu uza militár atu kontrola nasaun tomak.

 Haʼu hela fali iha dalan no taʼuk katak polísia sei kaer haʼu tanba hola parte atu kontra governu. Atu hetan osan hola droga, haʼu naʼok sasán no ikusmai haʼu mós faʼan an ba ema riku no estranjeiru sira. Maski haʼu moris ka mate, haʼu la preokupa ida.

 Tempu neʼe, haʼu-nia inan no alin-mane komesa estuda Bíblia ho Testemuña ba Jeová. Haʼu-nia aman hirus tebes, no nia sunu sira-nia livru sira. Maibé sira naʼin-rua tahan no ikusmai hetan batizmu no sai Testemuña ba Jeová.

 Loron ida, Testemuña ba Jeová ida koʼalia ho haʼu-nia aman kona-ba Bíblia nia promesa katak aban-bainrua sei iha justisa neʼebé loos iha mundu tomak. (Salmo 72:12-14) Nia gosta tebes esperansa neʼe no foti desizaun atu estuda Bíblia. Iha Bíblia laran nia aprende kona-ba Maromak nia ukun neʼebé sei lori justisa no mós kona-ba kritériu neʼebé Maromak hakarak laʼen no aman atu kumpre. (Éfeso 5:28; 6:4) Lakleur depois neʼe, nia no haʼu-nia maun-alin hotu sai Testemuña ba Jeová. Maibé haʼu la hatene buat ida kona-ba neʼe, tanba haʼu dook husi uma.

 Iha tinan 1978 haʼu muda ba rai-Austrália. Maski nasaun neʼe iha dame no ema barak riku, haʼu-nia laran sente la hakmatek. Haʼu nafatin hemu tua demais no uza droga. Fulan balu liutiha, Testemuña ba Jeová vizita haʼu. Sira hatudu husi Bíblia katak sei iha mundu neʼebé nakonu ho dame, no haʼu gosta loos maibé haʼu deskonfia sira no lakohi atu envolve an ho relijiaun neʼe.

 Liutiha neʼe, haʼu fila ba rai-Filipinas ba semana balu. Haʼu-nia alin sira fó-hatene haʼu katak ami-nia aman halo mudansa boot ona no sai ema diʼak, maibé haʼu laran-kanek nafatin no dada an husi nia.

 Haʼu-nia alin-feto uza Bíblia hodi esplika tanbasá moris nakonu ho terus no la iha justisa. Haʼu hakfodak loos katak feto neʼebé joven hela no ladún iha esperiénsia bele fó resposta ba haʼu-nia pergunta sira. Antes haʼu fila fali ba Austrália, haʼu-nia aman fó livru Saudara Dapat Hidup Kekal dalam Firdaus di Bumi. a Nia hatete ba haʼu “Keta buka resposta iha fatin neʼebé sala. Livru neʼe sei ajuda ó hetan buat neʼebé ó buka hela.” Nia husu haʼu atu kontaktu Testemuña ba Jeová kuandu haʼu fila ba Austrália.

 Haʼu halo tuir haʼu-nia aman nia konsellu no buka Reuniaun-Fatin husi Testemuña ba Jeová neʼebé besik haʼu-nia uma iha sidade Brisbane. Haʼu komesa estuda Bíblia semana-semana. Bíblia nia profesia sira iha Daniel kapítulu 7 no Isaias kapítulu 9 hatudu katak Maromak nia governu, neʼebé la iha korrupsaun ida, sei ukun ita hotu iha futuru. Haʼu aprende katak ita sei hela iha mundu neʼebé furak. Haʼu hakarak Maromak simu haʼu, maibé haʼu hatene katak haʼu presiza kontrola haʼu-nia sentimentu, la uza tan droga, hemu tua demais, no la halo sala seksuál. Entaun, haʼu haketak malu ho feto neʼebé hela hamutuk ho haʼu, no para hemu tua no la uza droga. Nuʼudar haʼu-nia fiar ba Jeová aumenta, haʼu halo orasaun katak nia mós ajuda haʼu halo mudansa seluk.

 Neineik-neineik haʼu komprende katak Bíblia nia hanorin bele duni ajuda ema atu halo mudansa boot. Bíblia dehan katak se ita hakaʼas an, ita bele “tau fali hahalok foun.” (Koloso 3:​9, 10) Haʼu hakaʼas an atu halo nuneʼe, no haʼu mós rekoñese katak, karik buat neʼebé haʼu rona husi haʼu-nia família kona-ba haʼu-nia aman troka ninia hahalok mak loos. Duké sente hirus no laran-kanek, haʼu hakarak halo dame ho nia. Ikusmai haʼu fó perdua haʼu-nia aman no sentimentu laran-kanek neʼebé uluk iha husi kiʼik la iha ona.

 Bainhira haʼu sei joven, dala barak haʼu tuir deʼit ema seluk nia hahalok aat. Bíblia nia avizu mak loos, ransu ho ema aat estraga toman diʼak. (1 Korinto 15:33) Agora haʼu hetan ona kolega diʼak husi Testemuña ba Jeová, no sira ajuda haʼu sai ema ho hahalok diʼak. Husi sira haʼu mós hetan haʼu-nia feen doben, Loretta. Ami naʼin-rua hanorin ema seluk oinsá Bíblia bele ajuda sira.

 Uluk haʼu hanoin katak haʼu-nia aman nunka bele troka. Haʼu agradese katak Bíblia ajuda nia sai laʼen neʼebé haraik an, hatudu domin ba haʼu-nia inan, no ema kristaun neʼebé halo dame. Depois haʼu hetan tiha batizmu no sai Testemuña ba Jeová iha tinan 1987, haʼu hasoru haʼu-nia aman, no nia hakoʼak haʼu. Neʼe mak dala primeiru iha haʼu-nia moris!

 Ba tinan 35 liu, haʼu-nia aman hakaʼas an hamutuk ho haʼu-nia inan hodi fahe esperansa husi Bíblia ba ema seluk. Nia sai ema badinas no sempre ajuda ema seluk. Durante tempu neʼe haʼu-nia domin ba nia aumenta no mós dalan neʼebé haʼu respeitu nia. Haʼu sente orgullu katak haʼu mak ninia oan. Nia mate iha tinan 2016, maibé haʼu hanoin nafatin nia, tanba ami naʼin-rua halo mudansa boot ho ami-nia hahalok nuʼudar ami halo tuir Bíblia nia hanorin. Agora haʼu la rai sentimentu aat ida ba nia. Haʼu mós agradese katak haʼu hetan ona haʼu-nia Aman iha lalehan, Maromak Jeová, neʼebé promete katak nia sei halakon terus no susar ba família hotu.