“Se ó hakarak tebes aprende kona-ba Maromak, metin nafatin ho Testemuña ba Jeová sira.” Haʼu hakfodak loos kuandu rona ema dehan nuneʼe. Iha tempu neʼe, haʼu foin komesa estuda Bíblia ho Testemuña ba Jeová. Haʼu sei esplika uitoan kona-ba haʼu-nia moris hodi ita bele komprende buat neʼebé haʼu sente.

 Haʼu moris iha sidade naran Quezaltepeque iha rai-Elsalvadór. Haʼu mak oan númeru neen husi oan na’in-15. Haʼu-nia inan-aman hakaʼas an atu haboot haʼu atu laran-moos no halo tuir lei. No dala ruma Testemuña ba Jeová ida naran Leonardo no irmán naʼin-rua vizita ami hodi hanorin Bíblia. Maibé haʼu la simu buat neʼebé sira hanorin no halo desizaun barak neʼebé la diʼak. Bainhira haʼu tinan 14, haʼu komesa hemu tua no uza droga hamutuk ho haʼu-nia kolega eskola. Ikusmai sira husik eskola no tama gang, no haʼu mós tuir sira. Loron tomak ami hein iha dalan, obriga ema atu fó osan no mós naʼok atu sosa droga no tua.

 Gang neʼe sai haʼu-nia família foun. Haʼu fiar katak haʼu tenke laran-metin ba sira. Porezemplu, loron ida kolega ida husi ami-nia gang foin uza droga no depois neʼe nia baku haʼu-nia viziñu. Viziñu neʼe konsege kaer haʼu-nia kolega no bolu polísia. Haʼu hirus tebes, nuneʼe haʼu baku viziñu neʼe nia karreta ho ai atu obriga nia husik haʼu-nia kolega sai. Viziñu neʼe husu haʼu atu para, maibé haʼu la rona no baku rahun karreta.

 Bainhira haʼu tinan 18, haʼu-nia gang baku malu ho polísia. Haʼu atu tuda sira ho bomba neʼebé haʼu halo iha uma, maibé bomba neʼe rabenta iha haʼu-nia liman. Haʼu la hatene oinsá neʼe akontese, maibé haʼu haree haʼu-nia liman neʼebé rahun ona no haʼu dezmaia kedas. Kuandu haʼu hadeer haʼu iha ospitál tiha ona, no sira fó-hatene haʼu katak haʼu-nia liman loos la iha ona, haʼu-nia tilun sorin loos sai diuk no haʼu-nia matan iha sorin loos mós aat ona.

 Maski haʼu iha kanek barak, kuandu haʼu sai husi ospitál haʼu fila kedas ba haʼu-nia gang. Lakleur polísia kaer tan haʼu, no haʼu tama komarka. Iha komarka laran haʼu-nia relasaun ho membru seluk husi haʼu-nia gang sai metin liután. Loron tomak ami hamutuk, husi dadeer kuandu ami matabixu no komesa fuma ganja toʼo kalan kuandu ami toba ona.

 Bainhira haʼu sei iha komarka, Leonardo vizita haʼu. Kuandu ami koʼalia, nia hatudu ba tato iha haʼu-nia liman loos. Nia husu, “Ó hatene ka lae, pontu tolu neʼe signifika saida?” Haʼu dehan, “Sin haʼu hatene, neʼe signifika seks, droga no múzika rock-and-roll”. Maibé Leonardo hatán: “Ba haʼu, neʼe signifika ospitál, komarka, no mate. Ó tama ospitál tiha ona, no agora ó iha komarka. Tuirmai mak mate.”

 Leonardo nia liafuan halo haʼu hakfodak. Nia koʼalia loos. Haʼu-nia moris sei lori haʼu ba mate. Leonardo husu haʼu atu estuda Bíblia ho nia, no haʼu simu. Buat neʼebé haʼu aprende husi Bíblia troka haʼu-nia moris. Porezemplu, Bíblia dehan katak “Ransu hamutuk ho ema aat sei estraga morál neʼebé diʼak.” (1 Korinto 15:33, nota-rodapé) Nuneʼe, primeiru haʼu tenke buka kolega foun. Entaun haʼu la tuir tan enkontru ho membru gang sira, maibé komesa tuir reuniaun neʼebé Testemuña ba Jeová halaʼo iha komarka laran. Iha reuniaun ida haʼu hasoru mane seluk naran André neʼebé mós iha komarka maibé nia hetan batizmu tiha ona no sai Testemuña ba Jeová. Nia husu haʼu atu matabixu hamutuk ho nia. Uluk haʼu fuma ganja dadeer-dadeer, maibé neʼe troka no haʼu komesa haʼu-nia loron hodi koʼalia kona-ba versíkulu ida husi Bíblia ho André.

 Membru seluk husi gang haree katak haʼu-nia hahalok troka ona. Tan neʼe, gang nia boot ida dehan katak nia presiza koʼalia ho haʼu. Haʼu taʼuk tebes. Baibain susar tebes atu husik no sai livre husi gang, entaun haʼu la hatene saida mak nia sei halo kuandu hatene kona-ba haʼu-nia planu. Nia dehan: “Ami haree katak ó la tuir ona ami-nia enkontru, maibé tuir deʼit Testemuña ba Jeová nia reuniaun sira. Ó-nia planu saida?” Haʼu fó-hatene nia katak haʼu hakarak kontinua estuda Bíblia no troka haʼu-nia moris. Dalan neʼebé nia hatán halo haʼu hakfodak, nia dehan katak membru husi gang sei respeitu haʼu-nia desizaun, só deʼit se haʼu hatudu tebes katak haʼu hakarak sai Testemuña ba Jeová. Tuirmai nia dehan: “Se ó hakarak tebes aprende kona-ba Maromak, metin nafatin ho Testemuña ba Jeová sira. Ami hatene katak ó sei la halo tan hahalok aat. Haʼu fó parabéns ba ó tanba ó tama ona dalan neʼebé loos. Testemuña ba Jeová bele ajuda tebes ó. Uluk haʼu estuda ho sira kuandu hela iha Estadus Unidus, no ema balun husi haʼu-nia família mak Testemuña ba Jeová. Keta taʼuk. Hakaʼas an nafatin.” Haʼu sei sente taʼuk, maibé iha tempu hanesan haʼu mós sente haksolok. Iha haʼu-nia laran haʼu fó obrigadu ba Maromak Jeová. Haʼu sente hanesan manu neʼebé semo livre husi gaiola, no Jesus nia liafuan kona haʼu-nia laran: “Imi sei hatene lia-loos, no lia-loos sei halo imi livre.”​—João 8:32.

 Haʼu-nia kolega balu tenta haʼu hodi fó droga. No tuir loloos dala ruma haʼu uza fali droga. Maibé haʼu halo orasaun ho laran no ikusmai haʼu la monu tan ba haʼu-nia fraku.​—Salmo 51:10, 11.

 Bainhira haʼu sai husi komarka, ema barak hanoin katak haʼu sei fila ba haʼu-nia moris uluk nian, maibé haʼu la halo nuneʼe. Tuir loloos, haʼu ba komarka dala barak atu haklaken ba ema iha neʼebá kona-ba Bíblia. Ikusmai haʼu-nia kolega uluk nian fiar katak haʼu-nia moris troka ona. Maibé problema mak haʼu-nia inimigu uluk nian la hatene katak haʼu troka ona.

 Loron ida haʼu haklaken hela ho irmaun ida, no derrepente deʼit ema ho kroʼat husi gang seluk haleʼu ami no hakarak oho haʼu tanba uluk ami kontra malu. Irmaun neʼe hatudu aten-brani no koko esplika ho respeitu ba sira katak haʼu sai ona husi haʼu-nia gang. Nuʼudar nia koʼalia haʼu hakaʼas an atu kalma nafatin. Sira baku haʼu no bandu haʼu atu labele tama tan iha fatin neʼe. Sira la uza sira-nia kroʼat no husik ami fila. Bíblia ajuda tebes haʼu atu troka haʼu-nia moris. Uluk haʼu sempre buka atu selu aat fali. Maibé agora haʼu tuir Bíblia nia konsellu iha 1 Tesalónika 5:15: “Kuidadu bá katak ema ida la selu aat ho aat ba ema seluk, maibé sempre buka atu halo buat neʼebé diʼak ba malu no mós ba ema hotu.”

 Husi tempu neʼebé haʼu sai Testemuña ba Jeová, haʼu hakaʼas an hatudu hahalok laran-moos. Maibé neʼe la fasil. Maski nuneʼe, ho ajuda husi Maromak Jeová, konsellu husi Bíblia, no ajuda husi haʼu-nia kolega foun, haʼu hetan susesu. Haʼu nunka hakarak fila ba haʼu-nia moris uluk nian.​—2 Pedro 2:22.

 Uluk haʼu halo violénsia no sempre hirus. Haʼu fiar duni katak loloos haʼu mate ona se uluk haʼu la troka haʼu-nia moris aat neʼe. Bíblia nia hanorin halo haʼu sai ema neʼebé foun. Haʼu la halo ona hahalok aat. Haʼu aprende atu halo dame ho ema neʼebé uluk mak haʼu-nia inimigu. (Lucas 6:​27) No agora haʼu kontente atu iha kolega neʼebé ajuda haʼu haburas hahalok diʼak. (Provérbios 13:20) Haʼu iha moris kontente neʼebé iha objetivu, no serbí Maromak neʼebé prontu atu perdua haʼu-nia hahalok aat.​—Isaias 1:​18.

 Iha tinan 2006, haʼu tuir eskola ba haklaken-naʼin kristaun neʼebé klosan. Tinan balun depois neʼe haʼu kaben, no agora ami haboot ami-nia oan-feto. Agora haʼu uza tempu barak atu hanorin ema seluk matadalan husi Bíblia neʼebé uluk ajuda ona haʼu. Haʼu mós serbí nuʼudar katuas iha kongregasaun, no koko atu ajuda joven sira hasees an husi sala neʼebé uluk haʼu halo kuandu haʼu sei joven. Duké keʼe rai-kuak ba haʼu-nia an, agora haʼu hakaʼas an atu hetan futuru neʼebé Maromak promete iha Bíblia laran.