Haʼu moris iha sidade Ciudad Obregón iha rai-Méxiku parte norte. Haʼu mak oan númeru lima husi maun-alin naʼin-sia. Ami hela iha sidade ninin, no haʼu-nia apá iha toʼos kiʼik ida. Ami gosta hela iha fatin neʼe, no ami-nia família moris kontente. Maibé, kuandu haʼu tinan lima, anin-boot estraga ami-nia toʼos, entaun ami tenke muda ba fatin seluk.

 Haʼu-nia apá iha serbisu neʼebé manán osan, maibé nia mós sai lanu-teen. Neʼe lori susar ba ami-nia família. Haʼu no haʼu-nia maun naʼin-rua komesa fuma sigarru neʼebé ami naʼok husi apá. Bainhira haʼu tinan neen, haʼu lanu ba dala primeiru. Liutiha tempu balu, ami-nia inan-aman fahe malu no haʼu-nia hahalok sai aat liután.

 Ami-nia amá hola mane seluk no ami oan sira mós hela hamutuk ho sira. Mane neʼe la fó osan ba haʼu-nia amá, no osan neʼebé amá hetan husi serbisu la toʼo ba ami-nia presiza. Tan neʼe, ami oan sira mós buka serbisu, maibé osan neʼebé ami hetan mak uitoan deʼit. Haʼu hamoos sapatu, no faʼan paun, jornál, xumingál no buat seluk. Haʼu mós laʼo iha sidade laran hodi buka hahán restu iha ema riku nia foʼer-fatin.

 Kuandu haʼu tinan sanulu, mane ida husu haʼu atu serbisu ho nia iha sentru foʼer-fatin iha sidade. Haʼu simu serbisu neʼe, para eskola no sai husi uma. Nia selu haʼu maizumenus dolar ida loroloron no fó haʼu hahán restu neʼebé nia hetan iha foʼer-fatin neʼe. Haʼu uza sasán neʼebé haʼu hetan iha fatin neʼe hodi harii hela-fatin kiʼik ba haʼu. Ema sira neʼebé hela iha neʼebá gosta tolok no halo hahalok la morál. Sira barak mak lanu-teen no uza droga. Neʼe mak tempu neʼebé aat tebes iha haʼu-nia moris, kalan-kalan haʼu tanis no sente taʼuk. Haʼu moe tebes ho haʼu-nia an tanba haʼu kiak no la eskola. Haʼu hela iha neʼebá maizumenus tinan tolu, ikusmai haʼu muda ba distritu seluk iha rai-Méxiku. Iha neʼebá, haʼu serbisu iha toʼos atu kuʼu ai-funan no kabas-rahun, no mós halibur tohu no keʼe fehuk-ropa.

 Tinan haat liutiha, haʼu fila ba sidade Ciudad Obregón. Haʼu-nia tia ida neʼebé matan-dook fó kuartu ida iha ninia uma ba haʼu atu hela. Haʼu komesa mehi aat no sente estrese tebes toʼo hanoin atu oho an. Kalan ida, haʼu halo orasaun ba Maromak hodi dehan: “Naʼi, se Ita-Boot iha duni, haʼu hakarak hatene kona-ba Ita-Boot, no haʼu sei serbí Ita-Boot ba nafatin. Se relijiaun neʼebé loos mak iha duni, haʼu hakarak hatene.”

 Husi kiʼik kedas, haʼu gosta aprende kona-ba Maromak. Bainhira haʼu sei labarik hela, haʼu bá igreja oioin, maibé haʼu sente katak sira hotu la hanorin buat neʼebé loos. Sira ladún koʼalia kona-ba Bíblia ka ajuda haʼu hatene kona-ba Maromak. Igreja balu koʼalia barak liu kona-ba osan, no igreja seluk iha membru sira neʼebé halo sala seksuál.

 Kuandu haʼu tinan 19, haʼu-nia rian fó-hatene haʼu katak Testemuña ba Jeová hatudu ba nia Bíblia nia hanorin kona-ba adora estátua. Nia lee Éxodo 20:4, 5 ba haʼu. Neʼe dehan katak ita labele halo estátua. No versíkulu 5 dehan: “Imi labele hakruʼuk ba sira ka serbí sira, tanba haʼu, Jeová, imi-nia Maromak, mak Maromak neʼebé hakarak ema atu adora haʼu mesak deʼit.” Haʼu-nia rian husu haʼu: “Se Maromak uza estátua sira hodi halo milagre no hakarak ita adora estátua sira, tanbasá nia bandu ida-neʼe?” Neʼe halo haʼu hanoin didiʼak. Ami koʼalia tan kona-ba Bíblia ba dala balu, no maski ami koʼalia ba tempu naruk, haʼu sente tempu liu lalais tanba haʼu gosta tópiku neʼe.

 Lakleur, nia konvida haʼu tuir Testemuña ba Jeová nia reuniaun ida. Haʼu gosta tebes buat neʼebé haʼu haree no rona iha neʼebá. Joven sira mós hola parte iha reuniaun no koʼalia moos iha plataforma! Haʼu hanoin: ‘Sira simu edukasaun kapás iha neʼe!’ Maski haʼu-nia fuuk naruk no hatais sabraut, sira simu haʼu ho laran-diʼak. No depois reuniaun hotu, família ida konvida haʼu atu han hamutuk ho sira.

 Kuandu estuda Bíblia ho Testemuña ba Jeová, haʼu aprende katak Maromak Jeová mak Aman domin nian neʼebé hanoin ita ida-idak no la fihir ema tuir sira-nia osan, pozisaun, rasa ka edukasaun. Loloos nia la todan ba sorin. (Apóstolu 10:34, 35) Ikusmai, haʼu la sente triste tan, tanba haʼu bele hatene didiʼak Maromak no iha relasaun diʼak ho nia.

 Haʼu-nia moris komesa sai diʼak. Haʼu para fuma, la hemu lanu, no la tolok tan. Haʼu la hakribi tan haʼu-nia moris, no mós la mehi aat tan. Maski la hetan edukasaun no hetan trauma bainhira sei labarik, maibé haʼu la sente tan katak haʼu la iha folin.

 Haʼu iha feen neʼebé diʼak tebes tanba hadomi Jeová no apoia tebes haʼu. Agora, haʼu serbí nuʼudar katuas área no vizita kongregasaun sira hodi fó laran-manas no hanorin haʼu-nia família espirituál. Haʼu agradese ba Bíblia tanba ajuda kura haʼu-nia laran-kanek no fó haʼu edukasaun neʼebé diʼak liu kona-ba Maromak. Haʼu la moe ona ho haʼu-nia an.